އިލްޔާސްގެ އެޖެންޓަކަށް ނިއުމާ، ފާރިސްގެ އެޖެންޓަކަށް ޒަބީހު

ދަ ޑިމޮކްރެޓްސްގެ ރިޔާސީ ކެންޑިޑޭޓް އިލްޔާސް ލަބީބުގެ އިންތިހާބީ އެޖެންޑަކަށް ފާތިމަތު ނިއުމާ އަދި މޯލްޑިވްސް ރިފޯމް މޫވްމަންޓްގެ ރިޔާސީ ކެންޑިޑޭޓް ފާރިސް މައުމޫންގެ އިންތިހާބީ އެޖެންޑަކަށް އިސްމާއީލް ޒަބީހު ހަމަޖައްސައިފި އެވެ.

އެކަން އެ ދެ ބޭފުޅުން ވަނީ އިއުލާނު ކުރައްވާފައެވެ.

އިލްޔާސް ލަބީބުގެ އިންތިހާބީ އެޖެންޑަކަށް ހަމަޖެއްސި ފާތިމަތު ނިއުމާއާ ފާރިސް މައުމޫންގެ އިންތިހާބީ އެޖެންޑަކަށް ހަމަޖެއްސި އިސްމާއީލް ޒަބީން އަކީ ވެސް ކުރީން މި ސަރުކާރުގެ މަގާމުތަކުގައި ތިއްބެވި ބޭފުޅުންނެވެ.

ދަ ޑިމޮކްރެޓްސްއާ ގުޅިވަޑައިގަތުމަށް ނިއުމާ އިސްތިއުފާ ދެއްވީ އިއްޔެ އެވެ. ނިއުމާ ހުންނެވީ މިނިސްޓްރީ އޮފް ނެޝަނަލް ޕްލޭނިން ހައުސިން އެންޑް އިންފްރާސްޓްރަކްޗާގެ ޑެޕިއުޓީ މިނިސްޓަރަކަށެވެ. ނިއުމާ އަކީ އެމްޑީޕީ މެނިފެސްޓޯ އެކުލަވާލުމުގައި މިހާތަނަށް މުހިންމު ދައުރެއް އަދާކުރައްވަމުން އައި ބޭފުޅެކެވެ.

މިނިސްޓްރީ އޮފް ހަޔާ އެޑިއުކޭޝަންގެ ޑެޕިއުޓީ މިނިސްޓަރުގެ މަގާމުގައި ހުންނަވަނިކޮށް ޒަބީހު ވަކިކުރެއްވީ އެވެ. ޖޫން 22 ގައި ޒަބީހު ވަކިކުރެއްވީ ވަކި ސަބަބެއް ނާންގަވައެވެ.