ތޮއްޑޫ ތަރައްގީކޮށް ރައްޔިތުންގެ ދިރިއުޅުމުގެ ފެންވަރު ރަނގަޅު ކުރަން ކައުންސިލުން ގިނަ މަސައްކަތްތަކެއް ކުރެ އެވެ. މި މަސައްކަތުގެ ދަށުން އޯޕަން އެކްސްސެސް ނެޓްވޯކު އަޅަންވެސް ނިންމާފައިވެ އެވެ.
ތޮއްޑޫ ކައުންސިލްގެ ރައީސް އަހުމަދު ކަރަމް ވިދާޅުވީ ކުރިން ދޫކުރި 100 ގޯތީގެ މައްސަލަ ކޯޓުން ނިމުމާއެކު ގޯތިތައް ހައްގުވާ ފަރާތްތަކަށް ގޯތީގެ ރަޖިސްޓްރީ ދޭން ފަށާފައިވާ ކަމަށެވެ.
"މިހާރު ބައެއް ފަރާތްތަކަށް ރަޖިސްޓްރީގެ ލިޔުންވެސް ވާނީ ހަވާލުކޮށްފަ. އެކަން ވަރަށް އަވަހަށް ނިންމާލަން މަސައްކަތް މިިކުރަނީ،" ކަރަމް ވިދާޅުވި އެވެ.
ލޭންޑް ޔޫސް ޕްލޭން ހަދައި އެ ޕްލޭނުގައި ގޯތިދޫކުރަން ކަނޑައެޅި ސަރަހައްދުން ދޫކުރި ގޯތިތަކުގެ ސައިޒަކީ 3،000 އަކަފޫޓެވެ. މީގެ އިތުރުންވެސް ކައުންސިލުން ދަނީ އިތުރު 200- 250 އާ ދެމެދު އަދަދަކަށް ގޯތިދޭން ތައްޔާރު ވަމުންނެވެ.
ކަރަމް ވިދާޅުވީ އެރަށަކީ ރާއްޖޭގެ ރަށްތަކަށްވުރެ ނިސްބަތުން ބޮޑު ރަށެއް ނަމަވެސް ގިނަ އަދަދެއްގެ ގޯތި ދޫކުރުމަކީ ގޮންޖެހުންތައް ހުރި ކަމެއް ކަމަށެވެ. ނަމަވެސް ރައްޔިތުންގެ ހިޔާލު ހޯދައިގެން ކަންކަން ކުރަމުން ގެންދާނެ ކަމަށް އޭނާ ވިދާޅުވި އެވެ.
ތޮއްޑޫއަކީ ރާއްޖޭގެ އެހެން ރަށްތަކާ ހިލާފަށް ރަށު ތަރައްގީގެ ޕްލޭނެއްގެ ދަށުން ހިންގަމުން ގެންދާ ރަށެވެ. މި ރަަށުގެ ކަންކަން ބަލަހައްޓަން ކައުންސިލް ކުންފުންޏެއް އުފައްދައި އެ ކުންފުންޏަށް ވަނީ ގިނަ މަސައްކަތްތަކެއް ހަވާލުކޮށްފަ އެވެ.