ރިޒޯޓުތަކުގެ މަތީ މަގާމުތަކުގެ 50 ޕަސެންޓް ދިވެހިންނަށް ހާއްސަކުރަން އަމާޒެއް ކަނޑައަޅާފައިވެ އެވެ. އެގޮތުން ފަސް އަހަރު ތެރޭގައި 500 ދިވެހިންނަށް ލީޑާޝިޕް ތަމްރީން ދޭނެ އެވެ.
ރާއްޖޭގެ ޓޫރިޒަމްގައި މިހާރު ގިނައީ ބިދޭސީންނެވެ. ވަޒީފާ ހޯދަން އެތައް ދިވެހިންނަށް ކިޔޫގައި ތިއްބަސް ދިވެހިންނަށް ވަޒީފާ ނުދޭ ކަމަށް ގިނަ ޝަކުވާ ތަކެއް އޮވެ އެވެ. މައިގަނޑު ސަބަބަކީ ރިސޯޓުތަކުގެ ސީނިއާ މަގާމުތަކުގައި ބިދޭސީން ތިބުމެވެ. އެހެންވެ މިކަން ބަދަލުކޮށް، އެ މަގާމުތައް ދިވެހިންނަށް ހޯދައިދޭނެ ކަމުގެ ވައުދެއް އެމްޑީޕީން ކޮށްފި އެވެ. މި ވައުދުގައިވާ ގޮތުންނަމަ ފަސް އަހަރުތެރޭ 500 ވެރިން އުފައްދާނެ އެވެ.
އަންނަ މަހުގެ ނުވަ ވަނަ ދުވަހު އޮންނަ ރިޔާސީ އިންތިހާބަށް އެމްޑީޕީން ނެރެފައިވާ މެނިފެސްޓޯގެ އިގްތިސޯދީ ބަިއިގެ ޓޫރިޒަމަށް ހާއްސަކޮށްފައިވާ ވައުދުތަކުގައިވާ ގޮތުން މަތީ ތައުލީމާއި ތަމްރީންގެ ޕްރޮގްރާމްތަކުގެ ތެރެއިން ފަތުރުވެރިކަމަށް ހާއްސަ ފުރުސަތުތައް ކަނޑައަޅައި، ރިޒޯޓުތަކުގެ މަތީ މަގާމުތަކުގެ 50 ޕަސެންޓް ދިވެހިންނަށް ހާއްސަ ކުރުމުގެ އަމާޒެއް ވަނީ ކަނޑައަޅާފަ އެވެ. އެގޮތުން ފަސް އަހަރު ތެރޭގައި 500 ދިވެހިންނަށް ޓޫރިޒަމް ދާއިރާގެ ލީޑަޝިޕް ސްކޮލަޝިޕްތައް ފޯރު ކޮށްދޭނެ އެވެ.
މި ބަލާ ގުޅިގެން ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވި ގޮތުގައި ދިވެހި ޓޫރިޒަމްގެ ވެރިންގެ ގޮތުގައި ދިވެހިން ހެދުމަކީ ސަރުކާރުގެ އަމާޒެކެވެ.
ޓޫރިޒަމް ދާއިރާއަށް ދިވެހިން ތަމްރީންކޮށް ނެރުމާއި ދިވެހިން އުފެއްދުމާއި ރިސޯޓުވެރިންނަށް ދިވެހިން އުފެއްދުމަކީ ތާއަބަދު ދައްކާ ވާހަކައެކެވެ. ނަމަވެސް ރިސޯޓުތައް ގިނަވެ އެނދު އިތުރު ވިޔަސް މިކަންކަން ކުރަން އެއްވެސް ކަމެއް ނުކުރެވޭ ކަމަށް ތަޖުރިބާކާރުން ވިދާޅުވެ އެވެ. އަދި މިކަމުގެ ނަތީޖާއެއްގެ ގޮތުގައި ޓޫރިޒަމްގައި މަސައްކަތް ކުރާ ދިވެހިންގެ އަދަދު މަދުވަމުންދާ ކަމަށް ތަފާސް ހިސާބުތަކުން ދައްކަ އެވެ.