ހުޅުމާލޭން ގޯތިދޭ ސަރަހައްދާއެކު ތިން ތަނެއް ހިއްކަން ލަންކާ ކުންފުންޏަކަށް

ހުޅުމާލޭން ގޯތިދޭ އޭރިއާއެކު ތިން ސަރަހައްދެއް ހިއްކަން ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕަނީ ޕްރައިވެޓް ލިމިޓެޑް (ސީއެމްސީ) އާ މިއަދު ހަވާލުކޮށްފި އެވެ. 

އާބަންކޯގައި މިއަދު ބޭއްވި ރަސްމިއްޔާތެއްގައި އެއްބަސްވުމުގައި ހުޅުމާލެ އަދި ތިލަފުށި ބަލަހައްޓާ ކުންފުނީގެ ފަރާތުން ސޮއިކުރެއްވީ މެނޭޖިން ޑިރެކްޓަރު އަހުމަދު އާތިފު އެވެ.  އާބަންކޯ އިން މިއަދު ހަވާލުކުރި ސަރަހައްދުތަކުގެ ތެރޭގައި ހިމެނޭ އެންމެ މުހިންމު އެއް ސަރަހައްދަކީ "ބިންވެރިޔާ ސްކީމު" ގެ ދަށުން ހުޅުމާލެ ފަޅުން 1،300 ގޯތިދޭން ހިއްކާ ސަރަހައްދެވެ. 

މި ސަރަހައްދުން ގޯތިލިބޭ މީހުންގެ ގުރުއަތު ނެގުން މިހާރު ދަނީ ކުރިއަށެވެ. މީގެ އިތުރުން ސަފާރީތަކަށް ހާއްސަކޮށް ބަނދަރެއް ހަދަން ހިއްކާ ދިޔަނެރު ފަޅު ވެސް ހިމެނެ އެވެ. 

ތިން ސަރަހައްދު ހިއްކަން ހަވާލު ކުރިނަމަވެސް މި މަސައްކަތް ކުރަން ހަރަދު ކުރަނީ ކިހާވަރެއް ކަމެއް އެ ކުންފުނިން ހާމަކޮށްފައެއް ނުވެ އެވެ. އާބަންކޯ އިން ބުނީ ސޮއިކުރެވުނު އެއްބަސްވުމުގެ ދަށުން ސީއެމްސީއާ ހަވާލްކޮށްގެން ބިން ހިއްކުމަށް ހަމަޖެހިފައިވަނީ ހުޅުމަލޭގެ ފޭސް 3 އަދި ހުޅުމާލެ ކައިރީގައި އޮންނަ ދިޔަނެރު ފަޅުގެ އިތުރުން ތިލަފުށި އޭރިއާ ޑީ ކަމަށެވެ.   

އާބަންކޯއިން ބުނީ މި މަޝްރޫއުގެ ދަށުން ގެދޮރުވެރިކަމުގެ ބޭނުންތަކާއި، އިންޑްސްޓްރިއަލް ބޭނުންތަކާއި މެރީނާގެ ބޭނުންތައް ފުއްދުމަށް ވަރަށް ބޮޑު އެހީ އަކަށް ވެގެންދާނެކަމަށް މި ކޯޕަރޭޝަނުން ގަބޫލު ކުރާ ކަމަށެވެ. އަދި އެ ކުންފުނީގެ  އަޒުމަކީ މިފަދަ ތަފާތު މަޝްރޫއުތައް މެދުވެރިކޮށް ފަހި މާދަމާ އަކަށް މަގުފަހިވެގެންދާނެ އެތަކެއް ތަރައްގީގެ މަރުހަލާތައް ކުރިއަށް ގެންދިއުން ކަމަށެވެ.