އާސަންދަ ބަޖެޓު ހުސް، ސަބްސިޑީއާއެކު ހަރަދު ހަތަރު ބިލިއަނަށް

މި އަހަރު ހަރަދު ކުރަން ފާސް ކުރި އާސަންދައިގެ ބަޖެޓު ހުސްވެ، ސަބްސިޑީއާއެކު ޖުމްލަ ހަރަދު ހަތަރު ބިލިއަން ފަހަނަ އަޅައިފި އެވެ. 

ފިނޭންސުގެ ހިސާބުތައް ދައްކާ ގޮތުން އާސަންދައަށް ހަރަދު ކުރަން މި އަހަރު އެއް ބިލިއަން ރުފިޔާ ދިން ނަމަވެސް މިހާތަނަށް 1.3 ބިލިއަން ރުފިޔާ ވަނީ މި ބަޖެޓުން ހަރަދު ކޮށްފަ އެވެ. މިދިޔަ އަހަރުގެ މި މުއްދަތާ ހަމައަށް ބަލާނަމަ އާސަންދައިގެ ހަރަދު އުޅެނީ 959.7 މިލިއަން ރުފިޔާގަ އެވެ. 

އާސަންދައިގެ އިތުރުން އެންމެ ބޮޑަށް ހަރަދުތައް އިތުރު ވެގެން ގޮސްފައި ވަނީ ސަރުކާރުން ދޭ ސަބްސިޑީގެ ބަޖެޓެވެ. މި ބަޖެޓުގެ ޖުމްލަ ހަރަދު މިހާރު ހުރީ 2.5 ބިލިއަން ރުފިޔާގަ އެވެ. ނަމަވެސް މި އަހަރު ހަރަދު ކުރަން ފާސް ކޮށްފައިވަނީ 2.2 ބިލިއަން ރުފިޔާ އެވެ. 

ސަބްސިޑީ އާއި އާސަންދައިގެ ހަރަދުތައް މަތިވެގެން ދިއުމުގެ ނަތީޖާއަކީ މި ދެބައި އެއްކޮށް ބަލާނަމަ ޖުމްލަ ހަރަދު 3.8 ބިލިއަން ރުފިޔާ ނުވަތަ ގާތްގަނޑަކަށް ހަތަރު ބިލިއަން ރުފިޔާއަށް އަރައިގެން ދިއުމެވެ. 

މި ދެ ބައިގެ ހަރަދު މަތިވެގެން ދިޔައިރު ހަރަދު ބަޖެޓުން ބޮޑު އަދަދެއް މިހާރު ވަނީ ހޭދަވެފަ އެވެ. މި އަހަރު ހަރަދު ކުރަން ފާސްކުރި ޖުމްލަ ބަޖެޓަކީ 40.7 ބިލިއަން ރުފިޔާ އެވެ. މި އަހަރުގެ މިހާތަނަށް ބަޖެޓުގެ 69 ޕަސެންޓް ވަނީ ހަރަދުވެފަ އެވެ.  އެއީ 26 ބިލިއަން ރުފިޔާ އެވެ.