ބީއެމްއެލް ކޮމިއުނިޓީ ފަންޑަށް ޕްރޮޕޯސަލް ހުށައަޅަން ހުޅުވާލައިފި

ބީއެމްއެލް ކޮމިއުނިޓީ ފަންޑުގެ މިއަހަރުގެ ދެވަނަ ފިޔަވަހީގައި ޕްރޮޕޯސަލް ހުށައެޅުމުގެ ފުރުސަތު އެ ބޭންކުން މިއަދު ހުޅުވާލައިފި އެވެ.

ބީއެމްއެލްގެ ކޮމިއުނިޓީ ފަންޑަކީ ހިލޭ ސާބަހަށް މަސައްކަތްކުރާ ޖަމިއްޔާތަކުން ރަށްރަށުގައި ހިންގަން ބޭނުންވާ ޕްރޮޖެކްޓްތަކަށް މާލީ އެހީތެރިކަން ފޯރުކޮށްދޭ ފަންޑެކެވެ. އެ ފަންޑުން އެހީ ހޯދަން ހުށަހެޅުމުގެ ފުރުސަތު ލިބެނީ ރަޖިސްޓަރީ ކޮށްފައިވާ ޖަމިއްޔާތަކަށެވެ.

ތިމާވެށްޓާ ގުޅުންހުރި ޕްރޮޖެކްޓް ތަކާއި ތަޢުލީމާއި ކުޅިވަރު ހަރަކާތްތަކުގެ އިތުރުން މުޖުތަމައުގެ ލާބަޔާއި މަންފާއަށް އަމާޒުކޮށް ހުށަހަޅާ ޕްރޮޖެކްޓް ތެރެއިން ހޮވޭ ކޮންމެ ޕްރޮޕޯސަލެއްގެ ހަރަކާތްތައް ހިންގަން 50،000 ރ. ބޭންކުން ދެއެވެ. ބީއެމްއެލް ކޮމިއުނިޓީ ފަންޑުން މިއަހަރުވެސް 20 ޕްރޮޖެކްޓެއް ހިންގަން މާލީ އެހީތެރިކަން ފޯރުކޮށްދޭނެ އެވެ. 

ގައުމީ ބޭންކުން މިހާރު ވަނީ މާލެ އާއި ރަށްރަށަށް ނިސްބަތްވާ، ރަޖިސްޓަރީ ކޮށްފައިވާ ޖަމިއްޔާތަކަށް ޕްރޮޕޯސަލްގެ ފުރުސަތު ހުޅުވާލާފަ އެވެ. މި ފިޔަވަހީގައި ވެސް އެންމެ ރަނގަޅު 10 ޕްރޮޖެކްޓް ހޮވާނެ އެވެ. 

ދިވެހި ބޭންކުގެ ކޮމިއުނިޓީ ފަންޑަށް ޕްރޮޕޯސަލް ހުށަހެޅުމުގެ ސުންގަޑި އަކީ އަންނަ މަހުގެ 10 ވަނަ ދުވަހެވެ. ޕްރޮޕޯސަލާއި އެޕްލިކޭޝަން ފޯމު އީމެއިލް މެދުވެރިކޮށް ވެސް ހުށަ އެޅޭނެއެވެ. ކޮމިއުނިޓީ ފަންޑާ ގުޅޭ އިތުރު މައުލޫމާތު ބޭންކުގެ ވެބްސައިޓުން ލިބެ އެވެ.