ރާއްޖޭގެ ޖުމްލަ ރިޒާވު ދަށްވުމާއެކު ޔޫޒަބަލް ރިޒާވް ވެސް ވަނީ 148 މިލިއަން ޑޮލަރަށް މަދުވެގެން ގޮސްފަ އެވެ. މެއި މަހު ޔޫޒަބަލް ރިޒާވުގައި 370 މިލިއަން ޑޮލަރު ހުރި ނަމަވެސް މިހާރު ރިޒާވުގައި ހުރީ 148 މިލިއަން ޑޮލަރެވެ.
މި އަހަރުގެ މެއި މަހަށްވުރެ ޖޫން މަހު ރާއްޖޭގެ ޖުމްލަ ރިޒާވުން 46 މިލިއަން ޑޮލަރު (707 މިލިއަން ރުފިޔާ) މެދުވެފައިވާ ކަމަށް ދައްކައިފި އެވެ.
ދައުލަތުގެ ރިޒާވް ބަލަހައްޓާ މޯލްޑިވްސް މަނިޓަރީ އޮތޯރިޓީގެ ހިސާބުތައް ދައްކާ ގޮތުގައި މެއިގައި ރިޒާވުގައި 748.15 މިލިއަން ޑޮލަރު ހުރި ނަމަވެސް ޖޫންގައި މި އަދަދު ވަނީ 702.16 މިލިއަން ޑޮލަރަށް ވެއްޓިފަ އެވެ. މިއީ ގާތްގަނޑަކަށް 46 މިލިއަން ޑޮލަރުގެ މަދުވުމެކެވެ.
ޖުމްލަ ރިޒާވް މި އަދަދަށް މަދުވެގެން ދިއުމާއެކު ރާއްޖޭގެ ޔޫޒަބަލް ރިޒާވް ނުވަތަ ބޭނުން ކުރެވޭ ރިޒާވަށް ވެސް ވަނީ އަސަރު ކޮށްފަ އެވެ. މެއި މަހު ޔޫޒަބަލް ރިޒާވުގައި 370 މިލިއަން ޑޮލަރު ހުރި ނަމަވެސް މިހާރު ރިޒާވުގައި ހުރީ 148 މިލިއަން ޑޮލަރެވެ. މިއީ ގާތްގަނޑަކަށް ދެމަހުގެ އިމްޕޯޓަށްވާ ފައިސާ އެވެ.
ރާއްޖޭގެ ރިޒާވްއަކީ ކޮންމެ މަހަކު ދަށްވެ އިތުރުވާ އެއްޗެކެވެ. އޭގެ މައިގަނޑު ސަބަބަކީ ލޯނުތައް އަނބުރާ ދެއްކުން އިތުރުވުމާއި އިމްޕޯޓްއަށް ގިނަ އަދަދެއްގެ ފައިސާ ރިޒާވުން ނަގަން ޖެހުމެވެ. މިފަހުގެ ތާރީހުގައި ރާއްޖޭގެ ރިޒާވް އިތުރު ވެގެން ދިޔައީ މިދިއަ ޑިސެމްބަރު މަހު އެވެ. ރިޒާވްގެ ނަމްބަރު އެއް ބިލިއަން ޑޮލަރަށް އެެރި އެވެ. ނަމަވެސް މި އަދަދަށް ރިޒާވް މަތިވެގެން ދިޔައީ އިންޑިއާގެ މަރުކަޒީ ބޭންކު ރިޒާވް ބޭންކް އޮފް އިންޑިއާ (އާރުބީއައި) އާއި ރާއްޖޭގެ އެމްއެމްއޭއިން ހެދި ކަރަންސީ ސްވޮޕް ނުވަތަ ފައިސާ ބަދަލު ކުރުމުގެ އެއްބަސްވުމުގެ ސަބަބުންނެވެ.