"ބްރިޖު ތިލަފުއްޓާ ގުޅާލުން އަންނަ އަހަރު، ގިރާވަރާވެސް ގުޅާލާނެ"

ތިލަމާލެ ބްރިޖް މަަޝްރޫއުގެ ދަށުން މާލެއާ ވިލިމާލެ، ވިލިމާލެއާ ގުޅިފަޅު އަދި ގުޅިފަޅާއި ތިލަފުށި މި އަންނަ އަހަރަށް ގުޅާލެވޭނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯޯލިހް މިއަދު ވިދާޅުވެއްޖެ އެވެ.

ތިލަމާލެ ބްރިޖަކީ މި ސަރުކާރުން ރާއްޖޭގައި މިހާތަނަށް ހިންގާ އެންމެ އަގު ބޮޑު މަޝްރޫއެވެ. ތިލަމާލެ ބްރިޖް މަަޝްރޫއުގެ މަސައްކަތް ހަވާލު ކޮށްފައި ވަނީ އިންޑިއާގެ އެފްކޮންސް އިންފްރާސްޓްރަކްޗާ ޕްރައިވެޓް ލިމިޓެޑް ކުންފުންޏެވެ.

ގުޅިފަޅު ބިންހިއްކުމުގެ މަޝްރޫއު ފަށްޓަވައިދެއްވައި މިއަދު ދެއްކެވި ވާހަކަފުޅުގައި ރައީސް ސޯލިހް ވަނީ ތިލަމާލެ ބްރިޖް މަަޝްރޫއާ ގުޅޭގޮތުން ވެސް ވާހަަކަ ދައްކަވާފައެވެ. ރައީސް ވިދާޅުވީ ބިންވެރިޔާ ސްކީމް ހުޅުވައިލީ މާލޭ ރައްޔިތުންނަށް ހަމަނޭވާ ލެވޭނެ ގޮތެއް ހަދައިދޭން ކަމަށާ މަޝްރޫއު މުޅިން ފުރިހަމަ ވާނީ މާލެއިން ތިލަފުއްޓަށް އަޅާ ބްރިޖުން ސަރަހައްދު ގުޅާލުމުން ކަމަށެވެ.

މާލެ ރައްޔިތުންނަށް މި ބުރުގައި ހުޅުމާލެއިން 2200 ގޯތި، ގުޅިފަޅުން 2000 ގޯތި އަދި ގިރާވަޅުފަޅު ހިއްކައިިގެން 2000 ގޯތި ދޫކުރަން ވަނީ ނިންމާފައެވެ. ރައީސް ވިދާޅުވީ އަންނަ އަހަރުގެ ނިޔަލަށް ތިލަފުއްޓާއި ހަަމައަށް ބުރިޖުން ގުޅާލެވޭނެ ކަމަށެވެ. އަދި މުޅި މަޝްރޫއު ނިންމާލާނީ ގިރާވަރާ ގުޅާލުމަށް ފަހު ކަމަށެވެ.

"ސާޅީހަކަށް އަހަރު ފަހުން މާލޭ ރައްޔިތުންނަށް ގޯތި ދިނުމަށް ބިންވެރިޔާ ސްކީމް ހުޅުވައިލީ މާލޭ ރައްޔިތުންނަށް ހަމަނޭވާ ލެވޭނެ ގޮތެއް ހަދައިދޭން. އެ މަޝްރޫއު މުޅިން ފުރިހަމަ ވާނީ މާލެއިން ތިލަފުއްޓަށް އަޅާ ބްރިޖުން އެ ސަރަޙައްދާއި މާލެއާ ގުޅައިލުމުން. އިރާދަކުރެއްވިއްޔާ މި އަންނަ އަހަރުގެ ތެރޭގައި އެ ބްރިޖުގެ މަސައްކަތް ވެސް ނިމި ބޭނުން ކުރަން ފެށޭނެ. އެއަށް ފަހު ދެން ކުރަން އޮތް ކަމަކީ އެ ބްރިޖް ގޮސް ގިރާވަރާ ގުޅައިލުން. އިރާދަކުރެއްވިއްޔާ އެ މަސައްކަތް ވެސް އަޅުގަނޑުމެން ކުރާނަން،" ރައީސް ވިދާޅުވި އެވެ.

ތިލަމާލެ ބްރިޖްގެ ޝެޑިއުލް އޮތްގޮތުން އޮގަސްޓް 2023ގެ ނިޔަލަށް މާލެއާ ވިލިމާލެ ގުޅާލަން ޖެހެ އެވެ. ނަމަވެސް އެ މުއްދަތު މިހާރު ނިންމޭނެ ކަމުގެ އެއްވެެސް ޔަގީން ކަމެއް ނެތެވެ. ބްރިޖުން ނިމިފައި ވަނިކޮށް ފެންނަނީ ވަރަށް ކުޑަ މިންވަރެކެވެ.

ޑިސެމްބަރު 2023 އާ ހަމަށް ވިލިމާލޭން ގުޅިފަޅަށް ގުޅާލަން ޖެހެއެވެ. އަދި ތިލަފުއްޓާއި ގުޅިފަޅު ގުޅާލައި ނޮވެމްބަރު 2024 އަށް ނިންމަން ޖެހޭނެ އެވެ.

ތިލަމާލެ ބްރިޖް މަަޝްރޫއުގެ މަސައްކަތް ހަވާލު ކޮށްފައި ވަނީ އިންޑިއާގެ އެފްކޮންސް އިންފްރާސްޓްރަކްޗާ ޕްރައިވެޓް ލިމިޓެޑް ކުންފުންޏެވެ. ނަމަވެސް މިހާރު މަސައްކަތް ހިނގަމުންދާ ގޮތުން އެ ކުންފުންޏަށް އެ މަސައްކަތް ކުރެވޭނެ ކަމާމެދު ވަރަށް ބޮޑަށް ވަނީ ސުވާލު އުފެދިފައެވެ. 

ބްރިޖްގެ މަސައްކަތަށް އަމާޒު ވަމުންދާ ފާޑުކިޔުންތަކާއި ގުޅިގެން ސަރުކާރުން މިހާރު ވަނީ ބްރިޖްގެ މަސައްކަތް ޝެޑިއުލުން ކައްސާލާފައިވާ ކަމަށް އެއްބަސްވެފައެވެ.

މެއި 23 ގައި މަޖިލީހުގައި، ޕްލޭނިން މިނިސްޓަރު މުހައްމަދު އަސްލަމް ވިދާޅުވި ގޮތުގައި މާލޭން ތިލަފުއްޓަށް އަޅާ ބުރިޖް / ތިލަމާލެ ބްރިޖްގެ މަސައްކަތަށް އިތުރު ވަގުތެއް ދީފައެއް ނުވާނެ އެވެ. ނަމަވެސް ޑީލޭތަކެއް އުޅޭ ކަމަށް ބުނެވިދާނެ އެވެ.

އެކަމަކު އިތުރަށް "ޓައިމް އެކްޓެންޝަނެ" އް ދޭން ގަސްތު ނުކުރައްވާ ކަމަށް ވެސް ވިދާޅުވި އެވެ.

 "އޭގެ ތެރޭން [ލަސްވާ] ކަންތައް ތަކުން ކޮންމެ ވެސް މިންވަރެއް ކެޗަޕް ކުރެވޭނެ. ތަފްސީލްތައް އަޅުގަނޑަށް އެނގޭ. ބްރިޖުގެ މަސައްކަތުއި ލަސްވުމެއް އުޅޭ. އެކަމަކު ކުރިއަށް އެބަދޭ،" އަސްލަމް ވިދާޅުވި އެވެ. 

މި ވާހަކަފުޅަށް ފަހު މިނިސްޓަރު ވިދާޅުވީ ގުޅީފަޅުގައި ޑެކް ސެންޝަންތަކުގެ މަސައްކަތް ވެސް ކުރިއަށްދާ ކަމަށެވެ. އަދި މިއީ ކުރިން ފެނުނު ބްރިޖާ ތަފާތު ބްރިޖެއް ކަމަށެވެ. 

"މި ބްރިޖު އަޅަމުންދަނީ ކުރިން ފެނުނު ގޮތަށް ޓެމްޕަރަރީ ޕްލެޓްފޯމް ހަދާފައެއް ނޫން. ޖަހަމުންދާ ތަނބުތައް އެހުރީ އަސްލު ހުންނަން ޖެހޭ ތަންތަނުގަ. އެންމެ ފުރަތަމަ ޖެހި ދެ ތަނބު ނޫނީއްޔާ. އެއީ ޓްރައިލް ދެ ތަނބު. އެހެންވެ މަސައްކަތް ކުރިއަށް ދޭ، އެކަމަކު ކޮންމެވެސް ވަރެއްގެ ލަސްވުމެއް އެބައުޅޭ،" އަސްލަމް ވިދާޅުވި އެވެ.