މިދިޔަ އަހަރު ޑިއުޓީގެ އިނާޔަތް: 1.6 ބިލިއަން ރުފިޔާގެ މުދަލަށް

ރާއްޖެއަށް އެތެރެ ކުރާ މުދަލަށް ކޮންމެ އަހަރަކު ވެސް ބޮޑުތަނުން ޑިއުޓީގެ އިނާޔަތް ދެއެވެ. ނަމަވެސް ކުރިން މި މައުލޫމާތަކީ އާއްމުކޮށް އެނގެން އޮންނަ ހާމަކުރާ މައުލޫމާތެއް ނަމަވެސް މި އިނާޔަތް ދޭ ކުންފުނިތަކާއި ވަކިވަކި ފަރާތްތައް މިހާރު ނޭނގެ އެވެ. 

ހަމައެކަނި އެނގެނީ އަހަރު ނިންމާއިރު ޑިއުޓީގެ އިނާޔަތް ލިބުނު އަދަދު ގަނޑުކޮށް އެނގޭ ނަމްބަރެވެ. ގަނޑުކޮށް އެނގޭ މި ނަމްބަރުން ދައްކާ ގޮތުގައި މިދިޔަ އަހަރު ރާއްޖެއަށް އެތެރެކުރި މުދަލުގެ ތެރޭން 1.6 ބިލިއަން ރުފިޔާއަށްވުރެ ގިނަ ރުފިޔާގެ މުދަލަށް ޑިއުޓީގެ އިނާނަތް ނުވަތަ މައާފުވަނީ ދީފަ އެވެ. 

ހިސާބުތައް ދައްކާ ގޮތުގައި މިދިޔަ އަހަރު ރާއްޖެއަށް 10 ބިލިއަން ރުފިޔާގެ މުދާ ވަނީ އެތެރެެ ކޮށްފަ އެވެ. މި މުދަލުގެ ތެރޭން 1,600,676,358.83 ބިލިއަން ރުފިޔާގެ އަގު ހުރި މުދަލަށް ޑިއުޓީ ވަނީ މައާފު ކޮށްދީފަ އެވެ. އަހަރުން އަހަރަށް ބަލާއިރު ޑިއުޓީގެ އިނާޔަތްދޭ އަދަދު ދަނީ މަތިވަމުންނެވެ. 

ޑިއުޓީގެ އިނާޔަތް ދެނީ ކޮން ބަޔަކަށް؟ ރާއްޖޭގައި  އިންވެސްޓްމަންޓުގެ ގާނޫނުގެ ދަށުން މަޝްރޫއު ހިންގަން އަންނަ ފަރާތްތަކާއި ސަރުކާރުން ކަނޑައަޅާ މަޝްރޫއުތަކެއް ހިންގަން އަންނަ ފަރާތްތަކުން އެތެރެކުރާ މުދަލަށް ޑިއުޓީ މައާފުކޮށްދެ އެވެ. ނަމަވެސް މިހާރު ޑިއުޓީގެ މައާފުދޭ ފަރާތުގެ ނަން ހާމައެއް ނުކުރެ އެވެ.  

ސަރުކާރުން 2017 ވަނަ އަހަރު އާއްމުކުރި މައުލޫމާތުތަކަށް ބަލާއިރު ރާއްޖެ ސިނަމާލެ ބްރިޖު އެޅި ސީސީސީ ކުންފުންޏަށް ޑިއުޓީގެ ބޮޑު އިނާޔަތެއް ލިބުނެވެ. އޭރު ހިންގި ރިސޯޓުތަކުގެ މަޝްރޫއުތަކަށް އެތެރެކުރި ސާމާނަށްވެސް ބޮޑުތަނުން ޑިއުޓީ މައާފުކޮށްދިނެވެ.