އެސްއެމްސް ތައްޔާރުވަނީ ދުނިޔޭގެ އެންމެ ބިޒީ ބަނދަރުތަކާ ރާއްޖޭގެ އެތެރެ ގުޅާލަން

މޯލްޑިވްސް ނޭޝަނަލް ސްޓޭޓް ޝިޕިން (އެމްއެސްއެސް) ތައްޔާރުވަމުން ގެންދަނީ ދުނިޔޭގެ އެންމެ ބިޒީ ޕޯޓްތަކާއި ރާއްޖޭގެ ރީޖަނަލް ބަނދަރުތައް ގުޅާލަން ކަމަށް ބުނެފި އެވެ. 

ގައުމީ ޝިޕިން ކުންފުނީގެ މައި ހިއްސާދާރު އެސްޓީއޯގެ މެނޭޖިން ޑިރެކްޓަރު އަބްދުﷲ ސައީދު ވިދާޅުވީ ޝިޕިން ކުންފުނިން ތައްޔާރު ވަމުން ގެންދަނީ ދުނިޔޭގެ ކޮންޓެއިނާ އޮޕަރޭޝަންގެ އެންމެ ބިޒީ ބަނދަރުތަކާ ރާއްޖޭގެ އެތެރޭގެ ބަނދަރުތައް ގުޅާލާށެވެ. ރާއްޖެއަށް އަންނަ ކޮންޓެއިނާތައް އާއްމުކޮށް ޓްރާންސިޓް ވަނީ ސްރީލަންކާ އާއި ދުބާއީ ފަދަ ބޮޑެތި ބަނދަރުތަކުގަ އެވެ. 

"އަޅުގަނޑުމެން މަސައްކަތް ކުރަމުން މިދަނީ އެއް ދުވަހަކު އަޅުގަނޑުމެން މިދަނީ އިގްތިސޯދީ ތަނބެއްގެ ގޮތުގައި މި ސިނާއަތް ދިރުވަން. މަގްސަދަކީ އަޅުގަނޑުމެންގެ ސަރަޙައްދީ ބަނދަރުތަކާއި ދުނިޔޭގެ އެންމެ ބިޒީ ކަނޑުގެ މަރުކަޒުތަކާ ދެމެދު އެއްވެސް ދަތިކަމެއް ނެތި ގުޅިގެން ދިއުން،" އެމްއެސްއެސް އުފައްދައި ފުރަތަމަ އެމްޑީގެ މަގާމު ފުރުއްވި ސައީދު ވިދާޅުވި އެވެ. 

އެސްޓީއޯ އިން ސީދާ ރީޖަނަލް ބަނދަރުތަކަށް ކޮންޓެއިނާ އުފުލުގެ އޮޕަރޭޝަން ފެށުމުގެ ގޮތުން އާ ބޯޓެއް ގެނެސް ޖުލައި މަހު އޮޕަރޭޝަން ފަށަން ތައްޔާރުވަމުންނެވެ. ގައުމީ ބޯޓު ކުންފުނިން މިފަހަރުގެ ދަތުރުތަކަށް ގެންނަނީ އެއްފަހަރާ 100 ކޮންޓެރިއާ އުފުލުމުގެ ގާބިލްކަން ހުރި ބޮޑު ބޯޓެކެވެ. އެހެންވެ މި ފަހަރުގެ އޮޕަރޭޝަން ފީޒިބަލް ވާނެ އެވެ. 

އެއް ސަބަބަކީ ބޮޑެތި ލައިނާތަކުން ދުބާއީ / ސްރީލަންކާއަށް ބާލާ ކޮންޓެއިނާތައް އުފުލުމުގެ ކުޅަދާނަކަން މި ބޯޓަށް އޮތުމެވެ. އެވަރުގެ ނަމްބަރެއް މި ބޯޓުން ގެންނަން ފުރުސަތު ފަހިވުމެވެ. އެހެންވެ، އެހެން ވިޔަފާރިވެރިންގެ މުދަލާއި އައްޑޫ މުދާ އެއްކޮށް ގެންގޮސް އައްޑޫ ކޮންޓެއިނާ ހިތަދޫ ޕޯޓަށް ބޭލުމުގެ ފުރުސަތު އޮންނާނެ އެވެ.

އެމްޑީ ސައީދު "މި" ނޫހަށް ވިދާޅުވެފައިވާ ގޮތުގައި މިހާރު ވެސް ބައެއް ވިޔަފާރިވެރިން މުދަލުގެ ޑިއުޓީގެ އިނާޔަތް ހޯދަން ސަރަައްދީ ބަނދަރުތަކަށް މުދާ ކްލިއާ ކުރެ އެވެ. އެހެންވެ އާ ބޯޓުގެ ސަބަބުން މާލެ ބަނދަރުން ކޮންޓެއިނާ ބާލައިގެން ވިޔަފާރިވެރިން އުފުލަން ޖެހޭ ތަކުލީފު ކުޑަ ވެގެންދާނެ އެވެ.

"އަގު ވެސް އާއްމު ރީޒަނަބަލް ވާނެ. އެކަމަކު މި ވަގުތު ސީދާ އަގު ބުނެލަން ދަތި. ހަމަ ގައިމު ވެސް ވިޔަފާރިވެރިންނަށް ލުއި ވެފައި ފަސޭހަ ދަތުރުތަކަށް ވާނެ،" ސައީދު ވިދާޅުވި އެވެ.