ސެންޗޫރިއަން މަސްވެރިކަމުގެ ވިޔަފާރީގެ ތެރެއަށް - އެކްސްޕޯޓް ޔޫރަޕަށް

ދިވެހި ކުންފުންޏެއް ކަމަށްވާ ސެންޗޫރިއަން މީގެ ކުރިން ފެނިގެން ގޮސްފައި ވަނީ ލޮޖިސްޓިކްގެ ހިދުމަތް ދޭ ކުންފުންޏެއްގެ ގޮތުގަ އެވެ. ނަމަވެސް ކޮވިޑާއެކު ކުރި ތަޖުރިބާއިން އިބްރަތް ހާސިލްކޮށް ވިޔަފާރި އިތުރު އެހެން ދިމާލަކަށް މިވަނީ ފުޅާ ކޮށްފަ އެވެ؛ އެ ކުންފުނިން މިއަދު މިވަނީ ޔޫރަޕަށް މަސް އެކްސްޕޯޓް ކުރަން ފަށާފަ އެވެ. 

ސެންޗޫރިއަންގެ ޗެއާމަން އަހްމަދު މައުމޫން (ކެޕްޓަން މާނު) "މި" ނޫހަށް މިއަދު ވިދާޅުވީ އެ ކުންފުނިން މަސްވެރިކަމުގެ ވިޔަފާރިއަށް ނުކުމެ ދިވެހި މަހަށް ރަނގަޅު އަގެއް ހޯދައި ދިނުމުގެ މަސައްކަތް ފަށާފައިވާ ކަމަށެވެ. 

"މަސް ބޭރު ކުރަން މި ފެށީ ޔޫރަޕާއި އެމެރިކާއަށް. ޔޫރަޕަށް އެކްސްޕޯޓް ކުރެވޭ ކޮލިޓީގައި މަސައްކަތް މި ފެށީ. ދިވެހި ކަޅުބިލަމަހާއި ކަންނެލި ބޭރު ކުރަނީ. އެކަމަކު ހަމައެކަނި ކަނޑުމަސް އެކަންޏެއް ނޫން ފަރުމަސް ވެސް ބޭރު ކުރެވޭނެ،" މާނު ވިދާޅުވި އެވެ. "އައިސް އަޅައިގެން ގެންނަ [ޗިލްޑް ފިޝް] އަދި ގަނޑުކުރި މަސް ވެސް އެކްސްޕޯޓް ކުރެވޭނެ." 

ސެންޗޫރިއަން އިން ވަނީ މަސްވެރިކަމުގެ ވިޔަފާރިއަށް ނުކުމެ ސެންޗޫރިއަންސް ފިޝަރީޒް އިންވެސްޓްމަންޓްގެ ނަމުގައި ކުންފުންޏެއް އުފައްދާފަ އެވެ. މިއީ އިސް މަގާމުތަކުގައި ދިވެހިން މަސައްކަތް ކުރާ ކުންފުންޏެކެވެ. 

މާނު ވިދާޅުވި އެ ކުންފުނިން މި މަސައްކަތް ކުރަނީ ހިންމަފުށީގައި އަމިއްލަ ކުންފުންޏަކުން ހިންގަމުން ދިޔަ ފެކްޓްރީއަށް ނަގައިގެން ކަމަށާ ނަމަވެސް މާލެ ސަރަހައްދުގައި އަމިއްލަ ފެކްޓްރީއެއް ހެދުމުގެ މަސައްކަތް ވެސް ފަށާފައިވާ ކަމަށެވެ. 

"މިއީ ދުވާލަކު 10 ނޫނީ 20 ޓަނުގެ މަސް ޕްރޮސެސް ކުރެވޭ ފެކްޓަރީއެއް. ފުރަތަމަ ޓެސްޓަކަަށް ސްޓާފުން ތައްޔާރު ވެލަން އެކްސްޕޯޓް ކުރަން މިފެށީ ދެ ޓަނު،" މާނު ވިދާޅުވި އެވެ. 

ޝިޕިން އަދި ލޮޖިސްޓިން ދާއިރާގެ ވިދާޅުވީ އެ ކުންފުންޏަކީ ރާއްޖޭގައި އެންމެ ބޮޑު ޝިޕިން ކުންފުނީގެ ހިދުމަތް ދެމުން ގެންދާ ކުންފުނި ކަމަށާ އެހެންވެ މިއީ މަސްވެރި ކަމަށް ލިބޭނެ ކުރިއެރުމެއް ކަމަށެވެ. 

"އާ ވިޔަފާރިއާއެކު އަޅުގަނޑުމެން ދެން މަސައްކަތް ކުރާނީ [ރީފާ] ކޮންޓެއިނާގައި މަސް އެކްސްޕޯޓް ކުރަން ފަށަން. އެ މަސައްކަތް ދެ މަސް ތެރޭގައި އިރާދަ ކުރެއްވިއްޔާ ފެށޭނެ،" މާނު ވިދާޅުވި އެވެ.