އެމްއެންޕީގެ ރިޔާސީ ޓިކެޓް އެރުވުމުގެ ގޮތުން ނާޒިމަށް ވަނީ ބޮޑުތަކުރުފާނުގެ އައްޑަނަކޮޅުގެ ރަމްޒެއް އަރުވާފައެވެ. އަދި "ނާޒިމް 2023" ގެ ކެމްޕެއިން ވަނީ ފަށާފައެވެ.
މޯލްޑިވްސް ނެޝަނަލް ޕާޓީ (އެމްއެންޕީ) ގެ ރިޔާސީ ޓިކެޓް ލިބިވަޑައިގެންފައިވާ އެޕާޓީގެ ރައީސް މުހައްމަދު ނާޒިމަށް ރަސްމީކޮށް ރިޔާސީ ޓިކެޓް އަރުވައިފި އެވެ.
ނާޒިމަށް އެމްއެންޕީގެ ރިޔާސީ ޓިކެޓް އެރުވީ މިރޭ ހެދިގޮނޑުދޮށް -- އާޓިފިޝަލް ބީޗު ސަރަހައްދުގައި ބޭއްވި ވަރަށް ކުލަ ގަދަ ރަސްމިއްޔާތެއް ގައެވެ. މިރޭގެ ރަސްމިއްޔާތަށް މުޅި ސަރަހައްދު އޮތީ ވަރަށް ބޮޑަށް ތައްޔާރު ކޮށްފައެވެ.
އެތައް ސަތޭކަ ބަޔަކު ބައިވެރިވި މި ރަސްމިއްޔާތުގައި ނާޒިމަށް އެމްއެންޕީގެ ރިޔާސީ ޓިކެޓް އެރުވީ ޕާޓީގެ ބައެއް މެންބަރުންނެވެ. ރިޔާސީ ޓިކެޓް އެރުވުމުގެ ކުރީން ރަސްމިއްޔާތުގައި އިއްވި އޯޑިއޯ މެސެޖެއްގައި ބުނެފައިވަނީ ރާއްޖޭގެ ހާލަތު މިހާރު އޮތީ ވަރަށް ނާޒުކު ފައްތަރެއްގައި ކަމަށެވެ. އެ ޕާޓީގެ ރިޔާސީ ޓިކެޓް ނާޒިމަށް އަރުވަނީ ދިވެހީންގެ މިނިވަން ކަމާއި އިސްތިގުލާލު އަލުން ހޯދާއި އިގްތިސާދީ މިނިވަން ކަމާއި ސިޔާސީ ހަމަޖެހުން ރާއްޖޭގައި ގާއިމު ކުރުމަށް އެފަދަ ލީޑަރަކަށް ގައުމު އެދޭތީ ކަމަށެވެ.
އެމްއެންޕީގެ ރިޔާސީ ޓިކެޓް އެރުވުމުގެ ގޮތުން ނާޒިމަށް ވަނީ ބޮޑުތަކުރުފާނުގެ އައްޑަނަކޮޅުގެ ރަމްޒެއް އަރުވާފައެވެ.
އަދި "ނާޒިމް 2023" ގެ ކެމްޕެއިން ވަނީ ފަށާފައެވެ. ނާޒިމްގެ ކެމްޕެއިން ހިންގަވާނީ "އުޖާލާ ޒަމާން" ނަމުގައެވެ.
ރާއްޖޭގެ އެކިކަންކޮޅުންތަކުގައި ތިބި އެމްއެންޕީގެ މެންބަރުން ވަނީ މިރޭގެ ރަސްމިއްޔާތަށް މާލެ އައިސްފައެވެ.
ކުރިއަށް އޮތް ރިޔާސީ އިންތިހާބުގައި ކުރިމަތިލާނެ ކަމަށް ނިންމައި، އެމްއެންޕީ އިން ވާދަކުރާނެ ކެންޑިޑޭޓަކު ހޮވުމަށް ހުޅުވާލުމުން ފޯމު ހުށަހެޅީ ނާޒިމް އެކަންޏެވެ. އެހެންވެ، އިންތިހާބަކާ ނުލައި ނާޒިމަށް ވަނީ ޓިކެޓް ލިބިވަޑައިގެންފަ އެވެ.
ދާދި ފަހުން ރަޖިސްޓްރީކޮށްފައިވާ އެމްއެންޕީ އިން ދަނީ ފަހުގެ އެކި އިންތިހާބުތަކުގައި ވާދަކުރަމުންނެވެ. އިލެކްޝަންސް ކޮމިޝަންގެ ދަފްތަރުގައިވާ ގޮތުން އެމްއެންޕީގައި މިހާރު 10،424 މެންބަރުން އެބަ ތިއްބެވެ. އެ ޕާޓީއަކީ އެންމެ ހަރަކާތްތެރި އަދި މެންބަރުންގެ އަދަދު މިހާ އަވަހަށް 10،000 މައްޗަށް ގެންދިޔަ މަދު ޕާޓީތަކުގެ ތެރެއިން ޕާޓީއެކެވެ.
ކުރިއަށް އޮތް ރިޔާސީ އިންތިހާބުގައި އެމްޑީޕީން ރައީސް އިބްރާހިމް މުހައްމަދު ސޯލިހު ވާދަކުރައްވާއިރު ޖުމްހޫރީ ޕާޓީން ގާސިމް އިބްރާހިމް ވާދަކުރައްވާނެ އެވެ. ކުރީގެ ހޯމް މިނިސްޓަރު އުމަރު ނަސީރާއި ބަންޑާރަ ނައިބު ޑރ. މުހައްމަދު މުނައްވަރު ވެސް އަމިއްލަ ގޮތުން ވާދަކުރައްވަން ނިންމާފައިވެ އެވެ.
އިދިކޮޅުގެ ރިޔާސީ ޓިކެޓް އަރުވާފައިވަނީ ރައީސް އަބްދުﷲ ޔާމީނަށެވެ. ނަމަވެސް މިވަގުުތު އެމަނިކުފާނު ހުންނެވީ ދިގު ޖަލު ހުކުމެއް ތަންފީޒު ކުރައްވާށެވެ. އިންތިހާބުގައި ވާދަކުރުމާމެދު ސުވާލު އޮތް ނަމަވެސް އިދިކޮޅު ޕީޕީއެމް / ޕީއެންސީން ބުނަނީ އިންތިހާބުގައި ޔާމީންގެ ނަން އޮންނާނެ ކަމަށެވެ. އެމަނިކުފާނަށް ވާދަނުކުރެވޭނެ ގޮތަށް އިންތިހާބެއް ނުބޭއްވޭނެ ކަމަށެވެ.