އެމްޓީސީސީން ހަލާކުވި ޑްރެޖަރު ހެދުމުންވެސް ރަނގަޅެއް ނުވި

އެމްޓީސީސީން ބިން ހިއްކަން ބޭނުން ކުރާ ޑްރެޖަރެއް ހަލާކު ވުމުން ބޭރަށް ގެންގޮސް ހަދައިގެން ނެގައުމުން ވެސް ރަނގަޅަށް މަސައްކަތް ނުހިނގާ ކަމަަށް ހައުސިން މިނިސްޓަރު މުހައްމަދު އަސްލަމް ވިދާޅު ވެއްޖެ އެވެ. 

ޕީއެސްއައިޕީގެ މަޝްރޫއުތައް ބަލަހައްޓާ ހައުސިން / ޕްލޭނިން މިނިސްޓަރު އަސްލަމް މަޖިލީހުގައި މިއަދު ވިދާޅުވީ އެމްޓީސީސީން ބިން ހިއްކަން ބޭނުންކުރާ ޑްރެޖަރެއް ހަލާކު ވެގެން މަސައްކަތް ލަސްވަމުންދާ ކަމަށާ އެމްޓީސީސީގެ ޑްރެޖަރު ދުބާއީއަށް ފޮނުވައިގެން ހެދުމުން މުޅިން ރަނގަޅަށް މަސައްކަތް ނުހިނގާ ކަމަށެވެ. 

ކުންފުނީގެ ޕީއާރަށް ބޮޑު ހޭދައެއް ކުރާ އެމްޓީސީސީ ޑްރެޖަރެއްގެ ވާހަކަ ހައުސިން މިނިސްޓަރު ވިދާޅުވީ މުލަކު ދާއިރާގެ މެންބަރު އިކުރާމް ހަސަނަށް، އެމްޓީސީސީގެ ޑްރެޖަރެއްގެ މައްސަލާގައި މަޖިލީހުގައި ސުވާލު ކުރައްވަން ފެއްޓެވުމުންނެވެ. 

ނަމަވެސް މުލަކު ބިން ހިއްކަން ގެންގޮސްގެން އުޅެނިކޮށް ހަލާކު ވެގެން އުޅެނީ އެމްޓީސީސީގެ ކޮން ޑްރެެޖަރެއް ކަމެއް މިނިސްޓަރު ވެސް އަދި މެންބަރު އިކްރާމް ވެސް މަޖިލީހުގައި ވިދާޅެއެއް ނުވެއެވެ. 

އެމްޓީސީސީއަށް ރައީސް ޔާމީން އަބްދުލްގައްޔޫމުގެ ވެރިކަމުގައި "މަހާޖައްރާފު" ގެ ނަމުގައި ޑްރެޖަރެއް ގެނަ އެވެ. ނަމަވެސް މި ސަރުކާރު އައިސް ސަރުކާރުގެ ބައެއް ވެރިން ވަނީ މި ޑްރެޖަރަކީ ބޭނުން ކުރަން ދަތި އެއްޗެއްގެ ގޮތުގައި ސިފަ ކޮށްފައި ވެއެވެ. މަހާޖައްރާފަކީ 36 މިލިއަން ރުފިޔާ ހަރަދުކޮގެން ބޭރުގައި ބަނދެގެން ގެނައި އުޅަނދެކެވެ. އެ ކޮންނަ ބޯޓަށް 3،700 ކިއުބިކް މީޓަރުގެ ވެލި ނެގުމުގެ ގާބިލްކަން ލިބިގެންވެ އެވެ. މިއީ 50 މީޓަރު އަޑިން ވެލިގެނޭ އުޅަނދެކެވެ. 

އެ އުޅަނދު ބޭނުންކޮގެން އެމްޓީސީސީއިން ގިނަ މަޝްރޫއުތަކެއް ހިންގި އެވެ. އޭގެ ފަހުން އެ ކުންފުނިން މިދިޔަ އަހަރު "ބޮޑު ޖައްރާފާ" ގެ ނަމުގައި އެމްޓީސީސީ އިން އިތުރު ކޮންނަ ބޯޓެއް ގެނަ އެވެ. މި އުޅަނދަކީ 18 މީޓަރު އަޑިން ވެލި ނެގުމުގެ ގާބިލްކަން ހުރި އުޅަނދެކެވެ. މިއީ ފަޅުތެރޭން ވެލި ނަގައިގެން ހިއްކޭޒާތުގެ ކަޓާ ޑްރެޖަރެކެވެ. ނަމަވެސް މި އުޅަނދާބެހޭ މާގިނަ މައުލޫމާތެއް އެ ކުންފުނިން އާއްމުންނަކަށް ނާނގަ އެވެ. އަދި އެ ކުންފުނީގެ ކޯޕަރޭޓް ވެބްސައިޓުގެ ބިން ހިއްކުމާއި ފަޅު ކޮނުމުގެ ބައިގައި އެ ޑްރެޖަރުގެ ވާހަކައެއް ނެތެވެ.