ކޯޓަށް ހާޒިރު ނުކުރެވިގެން އައްބާސްގެ އަޑުއެހުން އަނެއްކާ ކެންސަލް

އިންޑިއާ ހައިކޮމިޝަނުގައި ހުޅު ޖަހައި އަންދާލަން ގޮވާލި މައްސަލައިގައި ދައުވާ ކޮށްފައިވާ އައްބާސް އާދިލް ރިޒާ ބަންދުގައި ބަހައްޓައިގެން ކޯޓަށް ހާޒިރުކުރަން އިއުލާނުކޮށް، މިއަދު ފުލުހުންނަށް ހާޒިރުނުކުރެވުމުން އަނެއްކާވެސް އަޑުއެހުން ކެންސަލް ކޮށްފި އެވެ.

މާލޭގެ އެކިތަންތަނާއި އިންޑިއާ ހައިކޮމިޝަންގައި ހުޅުޖަހަން ގޮވައިލި މައްސަލައިގައި އައްބާސްގެ މައްޗަށް އުފުލީ ފަނާ ކޮށްފާނެ ކަމުގެ ބިރު ދެއްކުމުގެ ކުށުގެ ދައުވާ އެވެ.

މި މައްސަލަ ނުފެށި ލަސްވެފައި ވަނީ އައްބާސް ކޯޓަށް ހާޒިރުނުވެގެންނެވެ. އެ މައްސަލަ އެތައް ދުވަހަލު ތާވަލުކުރުމުން ވެސް އައްބާސް ކޯޓަށް ހާޒިރުވެފައެއް ނުވެ އެވެ. މިއަދަށް ވެސް އެ މައްސަލަ ފަށަން އަޑުއެހުމެއް ތާވަލުކޮށްފައިވެ އެވެ.

މިއަދުގެ އަޑުއެހުމަށް އޭނާ ބަންދުގައި ބަހައްޓައިގެން ކޯޓަށް ހާޒިރުކުރާން ކޯޓުން ވަނީ ފުލުހުންނަށް އަމުރެއް ކޮށްފަ އެވެ. ފުލުހުންގެ ބަންދުގައި ބަހައްޓައިގެން އޭނާ މިއަދު މެންދުރު 2:30 އަށް ކްރިމިނަލް ކޯޓަށް ހާޒިރުކުރުމަށް ފުލުހުންނަށް ކޯޓުން އަމުރުކޮށްފައިވެ އެވެ.

އެކަމަކު އަދި ފުލުހުންނަށް އޭނާ ފެނިފައި ނުވާތީ ކްރިމިނަލް ކޯޓުން ވަނީ މިއަދުގެ އަޑުއެހުން ވެސް ކެންސަލް ކޮށްފަ އެވެ.

"އަޑުއެހުން ކެންސަލް ކުރީ ފުލުހުން ހޯދަން އިއުލާނުކޮށްގެން ހާޒިރު ނުކުރެވޭތީ،" ކްރިމިނަލް ކޯޓުން ބުންޏެވެ.

ފުލުހުން މިއަދު ބުނެފައި ވަނީ އައްބާސްއާ ގުޅޭ އެއްވެސް މައުލޫމާތެއް އެނގޭނަމަ ޕޮލިސް ކަސްޓޯޑިއަލް ޑިޕާޓްމަންޓުގެ ނަންބަރު 9991442 އަށް ގުޅައި މައުލޫމާތު ހިއްސާކޮށްދިނުމަށެވެ،