ބީއެމްއެލް ކޮމިއުނިޓީ ފަންޑަކީ ދެމެހެއްޓެނެވި ގޮތެއްގައި ރަށްރަށުގައި ހިންގަން ބޭނުންވާ ޕްރޮޖެކްޓްތަކަށް އެހީ ވެދޭން މީގެ ހަތަރު އަހަރު ކުރީން ފަށާފައިވާ ފަންޑެކެވެ.
ބީއެމްއެލް ކޮމިއުނިޓީ ފަންޑު (ބީސީއެފް) ން ށ. މާއުނގޫދޫގެ ބައެއް މަގުތަކުގެ މަގުބައްތިތައް ސޯލާ ބައްތިއަށް ބަދަލު ކޮށްދީފި އެވެ.
ބީއެމްއެލް ކޮމިއުނިޓީ ފަންޑަކީ ދެމެހެއްޓެނެވި ގޮތެއްގައި ރަށްރަށުގައި ހިންގަން ބޭނުންވާ ޕްރޮޖެކްޓްތަކަށް އެހީ ވެދޭން މީގެ ހަތަރު އަހަރު ކުރީން ފަށާފައިވާ ފަންޑެކެވެ. ހިލޭ ސާބަހަށް މަސައްކަތް ކުރާ ޖަމިއްޔާތަކުން ރަށްރަށުގައި ހިންގަން ބޭނުންވާ ޕްރޮޖެކްޓްތަކަށް މި ފަންޑުން މާލީ އެހީތެރިކަން ދެ އެވެ.
މާއުނގޫދޫގެ ސޯލާ ބައްތި ޕްރޮޖެކްޓް ހިންގީ ސޮސައިޓީ ފޯ މާއުނގޫދޫ ޔޫތު ލިންކޭޖްގެ ފަރާތުންނެވެ، މާއުނގޫދޫގެ މީހުން އާބާދުވަމުން އަންނަ ސަރަހައްދުގެ އިތުރުން އެ ރަށުގެ އެހެން މަގުތަކުގައި ފަންޑުގެ އެހީގައި އިޔާދަ ކުރަނިވި ހަކަތައިން ދިއްލޭ 25 މަގުބައްތި ޖެހި އެވެ.
ސޮސައިޓީ ފޯ މާއުނގޫދޫ ޔޫތު ލިންކޭޖްގެ އޮފިޝަލު، މުހައްމަދު ޒާހިރު، މި ޕްރޮޖެކްޓާއި ގުޅޭގޮތުން ވިދާޅުވީ ކުރިން އެ ރަށުގެ މަގުތަކުގައި އަލިކަމެއް ނެތުމުގެ ސަބަބުން ރައްޔިތުންނަށް ގިނަ ދަތިތަކާއި ކުރިމަތިވި ނަމަވެސް މިހާރު އޮތް އުންމީދަކީ މި ޕްރޮޖެކްޓާއެކު ރައްޔިތުންނަށް ރަށުގެ މަގުތަކަކީ އަމާން ތަނަކަށްވެގެން ދިއުން ކަމަށެވެ.
އަދި ސޯލާ މަގުބައްތި ހަރުކުރުމުގެ ސަބަބުން ހަކަތައަށް ކުރާ ހޭދަ ކުޑަވެ، ތިމާވެއްޓާއި ރަށްޓެހި މުޖުތަމައަކަށް ބަދަލުވުމަށް ކުރާ މަސައްކަތަށް އިތުރު ކުރިއެރުން ލިބޭނެ ކަމަށް ވެސް އޭނާ ވިދާޅުވި އެވެ.