ޒަރީޒުގެ ބޮލު ފުއްކިބައިގައި ޖެހީ މަރުތޭލަކުން

ރައްޔިތުންގެ މަޖިލީހުގެ މަތިވެރި ދާއިރާގެ މެންބަރު ހަސަން ޒަރީރަށް ހަމަލާ ދިނީ މަރުތޭލަކުން ކަމަށާއި އެ މަރުތޭލުން އޭނާގެ ބޮލުގެ ފުއްކިބައިގައި ޖެހުމަށްފަހު ހަށިގަނޑުގެ އެކި ތަންތަނުގައި ތަޅާފައިވާ ކަމަށް ވެއެވެ. 

މި ހަމަލައަށް ފަހު ފުރަތަމަ ފުލުހުން ބުނެފައި ވަނީ މެންބަރަށް ހަމަލާ ދިނީ ތޫނު ހަތިޔާރަކުން ކަމަށެވެ. ނަމަވެސް ފަހުން ބުނެފައި ވަނީ ހަމަލާ ދިނީ ނުރައްކާތެރި ހަތިޔާރެއްގެ ގޮތުގައި ބޭނުން ކުރެވިދާނެ އާލާތަކުން ކަމަށެވެ. މަރުތޭލަކުން ކަމެއް ނުބުނެ އެވެ.

ޒަރީރުގެ ހާލު ބައްލަވައިލައްވަން އޭޑީކޭ ހޮސްޕިޓަލަށް ވަޑައިގެންނެވި ބައެއް މެންބަރުން ވިދާޅިވީ ޒަރީރަށް މިދިއަ އާދީއްތަ ދުވަހުގެ ރޭ ހަމަލާ ދީން އިރު ފުރަތަމަ ޖަހާފައި ވަނީ މަރުތޭލަކުން ބޮލުގެ ފުއްކިބައިގައި ކަމަށެވެ. އަދި އޭގެ ފަހުން ހަށިގަނޑުގެ އެކި ތަންތަނަށް ހަމަލާ ދިން ކަމަށެވެ.

"މިވަގުތު ޒަރީރުގެ ހާލުކޮޅު ގޯހެއް ނޫން. އިރާދަ ކުރެއްވީތީ އެތެރެހައްޓަށް ގެއްލުމެއް ނެތް،" އެއް މެންްބަރަކު ވިދާޅުވި އެވެ. 

އެހެން ބޭފުޅަކު ވިދާޅުވި ގޮތުގައި އެރޭ ފަތިހު މާލޭގެ ބޮޑުތަކުރުފާނު މަގު، "ހަބީބީ ކެފޭ އެންޑް ބިސްޓްރޯ" ތެރޭގައި މެންބަރު ޒަރީރަށް މަރުތޭލަކުން ހަމަލާ ދިން މީހުން ތިބީ ފޮރުވިގެނެއް ނޫނެވެ. މޫނުވެސް ނިވާ ނުކޮށް ކެފޭއަށް ވަދެ ހަމާލާ ދިނުމަށް ފަހު ދިޔައީ އެވެ.

ޒަރީރަށް ދިން އަނިޔާތަކާއި ގުޅިގެން އޭނާއަށް އޭޑީކޭގައި ފަރުވާ ދެމުންދާ އިރު މިހާތަނަށް އެއްވެސް މީހަކު ހައްޔަރު ކޮށްފައިވާ ކަމަށް ފުލުހުންނެއް ނުބުނެ އެވެ. އަދި އޭނާއަށް އެފަދަ ހަމަލާއެއް ދިނީ ކޮން ސަބަބަކާ ގުޅިގެން، ކޮން ބައެއް ކަމެއް ވެސް ސާފު ވެފައެއް ނުވެއެވެ. 

މަޖިލީހުގައި ވަރަށް ގިނައިން ވާހަކަފުޅު ދެއްކެވި ނަމަވެސް ޒަރީރަކީ ވަރަށް މަޑުމައިތިރު ބޭފުޅެކެވެ. އޭނާ ނިސްބަތްވެ ވަޑައިގަންނަވާ އެމްޑީޕީން ވަނީ އެ ހަމަލާ ކުށްވެރިކޮށް. ސީރިއަސް މައްސަލައެއްގެ ގޮތުގައި ދިވެހި ފުލުހުންގެ ހިދުމަތުން ތަހުގީގުކޮށް ކުށްކުރި މީހުން އިންސާފުގެ ކުރިމައްޗަށް ގެންދަން ގޮވާލާފަ އެވެ.