އެސްއޯއީ ސަބްސިޑީ އަށް ޕަންޕުކުރި ފައިސާ ބޮޑުތަނުން މައްޗަަށް

ސަރުކާރުގެ ބަޖެޓުން މިދިޔަ އަހަރު އެސްއޯއީތަކަށް ދިން ފައިސާގެ އަދަދު 50 ޕަސެންޓަށްވުރެ އިތުރު ވެއްޖެ އެވެ.

ސަރުކާރު ކުންފުނިތައް ބަލަހައްޓާ، ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން މަޖިލީހުގައި ބުނި ގޮތުގައި ސަރުކާރު ކުންފުނިތަކަށް ސަބްސިޑީގެ ގޮތުގައި ދޭން މިދިޔަ އަހަރު 2.4 ބިލިއަން ރުފިޔާ ބަޖެޓު ކޮށްފައި އޮތް ނަމަވެސް މިދިޔަ އަހަރު 5.2 ބިލިއަން ރުފިޔާ ވަނީ ދީފަ އެވެ. 

އިތުރު ތަފުސީލް ދެއްވަމުން ޕީސީބީގެ ފައިނޭންޝަލް އެނަލިސްޓް ފާތުމަތު ސަނާ ވިދާޅުވީ ސަރުކާރުގައި 31 ކުންފުނި އޮތްއިރު ސަބްސިޑީދޭން ވަނީ އިތުރަށް ދީފަ އެވެ. ސަރުކާރު ކުންފުނިތަކަށް ބޮޑު އަދަދެއް ސަބްސިޑައިޒް ކުރަން ޖެހުނު މައިގަނޑު ސަބަބަކީ ދުނިޔޭގެ ބާޒާރުގައި ތެލުގެ އަގު އިންތިހާއަށް އުފުލިގެން ދިއުމެވެ.

"އެންމެ ގިނައިން ފައިސާ ދެވިފައިވަނީ އެސްޓީއޯ. އެސްޓީއޯއަށް ބޮޑު އަދަދެއް ދޭން ޖެހުނީ ތެލުގެ އަގު އުފުލުމާއެކު ފިއުލް ސަބްސިޑީ މަތިވެ އިންކްރީޒްވުން. މިދިޔަ އަހަރު 926 މިލިއަން ފެނަކައަށް ވެސް ވަނީ،" ސަނާ ވިދާޅުވި އެވެ.

އޭނާ ވިދާޅުވީ ސަބްސިޑައިޒް ކުރި އަދަދު އިތުރުވީނަމަވެސް ކުންފުނި ހިންގަން ދިން "ކެޕިޓަލް" ގެ ގޮތުގައި ދިން ފައިސާގެ އަދަދު މަދުވެފައިވާ ކަމަށެވެ.

ޕީސީބީއިން ބުނި ގޮތުގައި ކޮވިޑް-19 އަށްފަހު ސަރުކާރު ކުންފުނިތަކުގެ މާލީ ހާލަތު ރަނގަޅުވަމުންދާކަން ފާހަގަ ކުރެވެ އެވެ. މިގޮތުން 2021 ގައި ކުންފުނިތަކަށް 22 ބިލިއަން ރުފިޔާގެ އާމްދަނީ ލިބުނު ނަމަވެސް މިދިޔަ އަހަރު މި އަދަދު ވަނީ 45 ބިލިއަން ރުފިޔާ އަށް އިތުރުވެފަ އެވެ. އެންމެ ބޮޑަށް އާމްދަނީ ރަނގަޅުވެފައިވަނީ އެސްޓީއޯ އާއި އެމްއޭސީއެލްގެ އެވެ. މިދިޔަ އަހަރުގެ ފަހު ކުއާޓަރުގެ މާލީ ރިޕޯޓް ހަތަރު ކުންފުންޏަކުން ނުފޮނުވަ އެވެ. ހަތަރު ވަނަ ކުއާޓަރުގެ މާލީ ރިޕޯޓް ނުފޮނުވާ ކުންފުނިތަކަކީ ފަހިދިރިއުޅުމާއި ޓްރޭޑްނެޓް އަދި އެމްޕީއެލްގެ އިތުރުން ރޯޑްޑިވްލޮޕްމަންޓް ކޯޕަރޭޝަން އެވެ. 

ސަނާ ވިދާޅުވީ ކުންފުނިތަކުގެ އާމްދަނީ އިތުރުވެގެން ދިޔަ ނަމަވެސް ކުންފުނިތަކުގެ ސާފު ފައިދާ އިތުރުވަމުން ނުދާ ކަމަށެވެ.

"ސަބަބަކީ ސަރުކާރުން ކެޕިޓަލް ދީގެން ހިންގާ ކުންފުނިތައް. ގިނަ ކުންފުނިތަކަކީ ގެއްލުންވާ ކުންފުނިތައް. ކޮވިޑަށްފަހު ކުންފުނިތައް ރަނގަޅު ނުހިނގާ. ނަމަވެސް 2022 ގައި ކުންފުނިތައް ހިނގަން ފެށުމާއެކު ހަރަދުތައްވެސް ވަނީ އިތުރުވެފަ. ބައެއް ކުންފުނިތަކަކީ އެކަށީގެންވާ ވަރަށް އާމްދަނީ ޖެނެރޭޓް ނުކުރާ ކުންފުނިތައް. އެހެންވެ ލޮސްވެސް ވަނީ އިތުރުވެފަ،" ސަނާ ވިދާޅުވި އެވެ.

"ނަމަވެސް ކެޕިޓަލް ނުދީ ހިންގާ ކުންފުނިތަކުގެ ޕާފޯމަންސް ވަނީ އިތުރުވެފަ."