ސިމްޑީ ރޯދަ ޕްރޮމޯޝަން: ހަދިޔާ އާއި އެއްލައްކަ ރުފިޔާ ހޯދުމުގެ ފުރުސަތު

ރޯދަ ހަދިޔާ ފޮނުވުމާއި، އެއްލައްކަ ރުފިޔާގެ ފައިސާގެ އިނާމެއް ލިބޭ ލަކީޑްރޯއެއްގެ ފުރުސަތާއެކު، ރާއްޖޭގައި ވިޔަފާރިގެ އެކި ދާއިރާތަކުގައި ހަރަކާތްތެރިވާ ސިމްޑީގެ ރޯދަ ހަދިޔާ ޕްރޮމޯޝަން ފަށައިފިއެވެ.

އެ ޕްރޮމޯޝަން ފެށުމަށް މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އެ ކުންފުނީގެ ޖެނެރަލް މެނޭޖަރު ޔޫޝައު ހަސަން ވިދާޅުވީ މާދަމާއިން ފެށިގެން، އަންނަ މޭ މަހުގެ ތިން ވަނަ ދުވަހުގެ ނިޔަލަށް ކުރިއަށްދާ މި ޕްރޮމޯޝަނުގައި، އެ ކުންފުނީގެ ތިން ޑިވިޝަނެއް ގުޅިގެން ބައިވެރިވާނެ ކަމަށެވެ. މިއީ އެފަދައިން ބޭއްވޭ ފުރަތަމަ ޕްރޮމޯޝަން ކަމަށް ވެސް އޭނާ ވިދާޅުވިއެވެ.

މި ޕްރޮމޯޝަނުގެ ދަށުން މައިގަނޑު ދެކަމެއް ކުރިއަށް ގެންދިއުމަށް ވަނީ ހަމަޖެހިފައެވެ. އެއީ، އެ ކުންފުނީގެ ފިހާރަތަކުން ވިޔަފާރިކުރާ މީހުންގެ މެދުގައި ނެގޭ ލަކީޑްރޯ އަކާއި، މޯބައިލް އެޕް މެދުވެރިކޮށް ބޭނުން މީހަކަށް ރޯދަ ހަދިޔާ ފޮނުވުމެވެ.

ސިމްޑީގެ ފިހާރަޔަކުން ނުވަތަ އޮންލައިން އެޕް މެދުވެރިކޮށް 500 ރުފިޔާއިން މަތީގެ ވިޔަފާރި ކުރުމުން މި ލަކީ ޑްރޯގައި ބައިވެރިވެވޭނެއެވެ. 

މި ފުރުސަތު ހުޅުވާލާފައި ވަނީ އެޕް ސްޓޯރުންނާއި، ޕްލޭ ސްޓޯރުން ފަސޭހަކަމާއެކު ޑައުންލޯޑުކުރެވޭ ސިމްޑީ މޯބައިލް އެޕް މެދުވެރިކޮށެވެ. މިގޮތަށް ހަދިޔާ ކުރުމަށް 500 ރުފިޔާއިން ފެށިގެން 2000 ރުފިޔާ އާ ދެމެދުގެ ގިފްޓް ޕެކްތައް ވަނީ ސިމްޑީން ތައްޔާރުކޮށްފައެވެ. މި ޕެކޭޖުތަކުގައި ހިމެނޭނީ ރޯދަމަހު ކޮންމެ ގެއަކުން ވެސް ބޭނުންކުރާނެ އަސާސީ ބާވަތްތަކެކެވެ. 

މޯބައިލް އެޕްލިކޭޝަނުން ހަދިޔާކުރަން ބޭނުންވާ ޕެކޭޖް އިހްތިޔާރު ކުރުމަށްފަހު، ފޮނުވަންވީ އެޑްރެސް ހިޔާރު ކުރުމުން ސިމްޑީން އެ ތަނަކަށް ހަދިޔާ ފޯރުކޮށްދޭނެއެވެ. މާލެ ސަރަހައްދުގެ ގޭގޭގެ އިތުރުން، ރަށްރަށުގެ ބޯޓުފަހަރަށް ވެސް އެ ކުންފުނީގެ ޑެލިވަރީ ޚިދުމަތްވަނީ ފުޅާކޮށްފައެވެ.