އެމްޑީޕީ މެންބަރުން 7 ފެބްރުއަރީ އޮޅުވާލާތީ ހިތާމަ ކުރަން: ނަޝީދު

ހަތެއް ފެބްރުއަރީ ހާދިސާގެ ކަންކަން އޮޅޭ ގޮތަށް އެމްޑީޕީގެ މެންބަރުން ވާހަކަ ދައްކާތީ، އެކަމާ ހިތާމަ ކުރައްވާ ކަމަށް، 2012 ވަނަ އަހަރުގެ އެ ދުވަހުގެ ހާދިސާތަކުގެ މެދުތެރޭން ރައީސުލްޖުމްހޫރިއްޔާގެ މަގާމުން އިސްތިއުފާ ދެއްވަން ޖެހި ވަޑައިގެން އަމިއްލަފުޅަށް އިސްތިއުފާ އިއުލާން ކުރެއްވި ރައީސް މުހައްމަދު ނަޝީދު ވިދާޅު ވެއްޖެ އެވެ.

ރައީސް ނަޝީދު މިހެން ވިދާޅުވީ މަޖިލީހުގެ މިއަދުގެ ޖަލްސާގެ ތެރެއިން، ޕީއެންސީގެ މަޑުއްވަރީ ދާއިރާގެ މެންބަރު އާދަމް ޝަރީފް އުމަރާއި، އެމްޑީޕީގެ ހެންވޭރު އުތުރު ދާއިރާގެ މެންބަރު ހުސައިން ޝަހީމް (އަނދުން ހުސައިން) އެ މައްސަލައިގައި ދެއްކެވި ވާހަކަތަކަކަށް ރައްދު ދެއްވަމުންނެވެ.

މެންބަރު އާދަމް ޝަރީފް ވަނީ ފެބްރުއަރީ 7 ހާދިސާއަށް ފަހު، ޖެހިގެން އައި ދުވަހު ރާއްޖޭގައި ހިނގި ހުޅުޖެހުން ފަދަ ބޮޑެތި ހަމަނުޖެހުންތަކުގެ ޒިންމާ ނަގަން ޖެހޭނީ އެމްޑީޕީން ކަމަށް ވިދާޅުވެފަ އެވެ. އަދި މިހާރު އެމްޑީޕީގެ މެންބަރުން އެއީ ބަޣާވާތެއް ވެސް ނޫންކަމަށް ބުނަނީ ކީއްވެތޯ އޭނާ ވަނީ އައްސަވާފަ އެވެ. 

އޭނާގެ ވާހަކަތަކަށް ރައްދުދެއްވަމުން މެންބަރު އަނދުން ހުސެން ވިދާޅުވީ އެމްޑީޕީން ރަސްމީ ސިފައެއްގައި އެއީ ބަޣާވާތެއް ނޫންކަމަށް އެއްވެސް އިރަކު ބުނެފައި ނުވާނެ ކަމަށެވެ.

"އަޅުގަނޑުވެސް މި ޕާޓީގައި މިހިރީ. އެމްޑީޕީން އެއްވެއް ރަސްމީ ހައިސިއްޔަތެއްގައި، ހަތެއް ފެބްރުއަރީގައި ހިންގީ ބަޣާވާތެއް ނޫންކަމަށް ނުބުނޭ. އެއީ ބަޣާވާތެއް!" އޭނާ ވިދާޅުވި އެވެ.

ހުސައިންގެ އއެ ވާހަކައަށް ފަހު ވާހަކަފުޅު ދައްކަވަމުން ރައީސް ނަޝީދު ވިދާޅުވީ އެމްޑީޕީގެ އިސް ބައެއް ބޭފުޅުން 7 ފެބުރުއަރީގެ ކަންކަން އޮޅޭ ގޮތަށް، އަދި އެ މަނިކުފާނު ބަދުނާމުވާ ގޮތަށް ވާހަކަ ދައްކަވާތީ ހިތާމަ ކުރައްވާ ކަމަށެވެ.

"ފެބްރުއަރީ ހަތަކާ ބެހޭ ގޮތުން ދާދި ފަހުން އެމްޑީޕީގެ ބައެއް ވަޒީރު ބޭފުޅުންނާއި ރައްޔިތުންގެ މަޖިލީހުގެ ބައެއް މެންބަރުން އެކަން ހިނގި ގޮތް އޮޅޭ ގޮތަށް، އަދި އަޅުގަނޑުގެ މައްޗަށް ބަދުނާމުވާ ގޮތަށް ވާހަކަ ދައްކަވާފައިވޭ"، ރައީސް ނަޝީދު ވިދާޅުވި އެވެ. "އަޅުގަނޑު އެކަމާ ހިތާމަކުރަން ދެން އެބޭފުޅުން އެކަން އެ ކުރެއްވީ ކޮން ސަބަބަކާ ގުޅިގެންތޯ، ބޮޑަށް އެނގި ވަޑައިގަންނަވާނީ އެ ބޭފުޅުންނަށް"

ރައީސް ނަޝީދު މިހެން ވިދާޅުވިއިރު، އެމްޑީޕީގެ ޕްރައިމަރީގެ ކެމްޕޭނުގެ ތެރެއިން، އެމްޑީޕީގެ އިސް ބައެއް ބޭފުޅުން ވަނީ ހަތެއް ފެބްރުއަރީގެ ހާދިސާއަކީ ރައީސް ނަޝީދުގެ ނާގާބިލުކަން ހާމަވާކަމެއް ކަމަށް ދޭހަވާ ގޮތަށް ވަރަށް ގިނައިން ވާހަކަ ދައްކަވާފަ އެވެ.

ފެބުރުއަރީ 7 ހާދިސާގެ ހުރިހާ ކަމެއް ބަލައި ތަހުގީގު ކުރީ ބައިނަލްއަގުވާމީ ބައިވެރިވުމާއެކި ކޮމިޝަން އޮފް ނޭޝަނަލް އިންކްއަރީއަކުންނެވެ. އެ ތަހުގީތަކަށް ފަހު ނިންމާފައި ވަނީ އެއީ ބަޣާވާތެއް ނޫން ކަމަށެވެ.