މިއީ ރައީސް ޔާމީންގެ ވެރިކަމުގައި ހިންގި 7،000 ފްލެޓުގެ ހިޔާ މަޝްރޫއުގެ ފީޒިބަލް ކުރަން އޭރު ފަރުމާކުރި މަޝްރޫއެކެވެ. މަޝްރޫއުގެ ދަށުން ޓޫރިޒަމްގެ އެކި ޕްރޮޕަޓީތައް ހުޅުމާލެއާ ވަކިން ހަދާނެ އެވެ.
ހުޅުމާލޭ ދެވަނަ ފިޔަވަހީގައި ހަދާ އިންޓަގްރޭޑެޓް ޓޫރިޒަމް ރަށް "އާބަން އައިލްސް" ހައުސިން ޑިވްލޮޕްމަންޓް ކޯޕަރޭޝަން (އެޗްޑީސީ) އިން ލޯންޗް ކޮށްފި އެވެ.
ރާއްޖޭގެ އެންމެ ބޮޑެތި ވިޔަފާރިތައް ހޮވަން ރޭ ކްރޮސްރޯޑް މޯލްޑިވްސްގައި ބޭއްވި ކުލަގަދަ ހަފުލާއެއްގައި ހުޅުމާލެ ޓޫރިޒަމް ޕްރޮޖެކްޓް "އާބަން އައިލް" އިންވެސްޓަރުންނަށް ހުޅުވާލިކަން އިއުލާނު ކޮށްދެއްވީ އެޗްޑީސީގެ މެނޭޖިން ޑިރެކްޓަރު އަހުމަދު އާތިފެވެ. އޭނާ ވިދާޅުވީ މި މަޝްރޫއު ލޯންޗް ވެގެން ދިއުމާއެކު އެކަން ވާނީ އިންވެސްޓް ކުރަން ޝައުގުވެރިކަން ހުރި ފަރާތްތަކަށް ރާއްޖޭގައި ހުޅުވިގެންދާ އާ ދޮރަކަށެވެ.
"މިއީ އުންމީދީ ޕްރޮޖެކްޓެއް. މި ތަނުގައި އެކި ފަންތީގެ ވިޔަފާރިތަކަށް ފުރުސަތު އޮންނާނެ،" އާތިފު ވިދާޅުވި އެވެ.
މި މަޝްރޫއަކީ ރައީސް އަބްދުﷲ ޔާމީންގެ ވެރިކަމުގައި ހުޅުމާލެ ދެވަނަ ފިޔަވަހި ހިއްކުމުގެ މަޝްރޫއު ހިންގިއިރު ދެވަނަ ފިޔަވަހީގެ ސޯޝަލް ހައުސިން މަޝްރޫއު ފީޒިބަލް ކުރަން ބޭނުންކުރި އެންމެ ބޮޑު ބިޒްނަސް މޮޑެލްގައި ހިމެނޭ މަޝްރޫއެކެވެ.
"އާބަން އައިލް" ގެ ނަމުގައި ހުޅުމާލެ ދެވަނަ ފިޔަވަހިން ދެބައިކޮށްލައި ބްރިޖަކުން ގުޅާލާއިގެން ހިންގާ މި މަޝްރޫއުގެ ދަށުން އެކި ފަންތީގެ ވިލާތަކާއި ޓޫރިޒަމް ޕްރޮޕަޓީތައް މިތަނުގައި ހުންނާނެ ކަމަށް އެޗްޑީސީ އިން ބުނެފައިވެ އެވެ.
މި މަޝްރޫއުގެ މައުލޫމާތު އާއްމު ކުރަން ރޭ އާއްމުކުރި މައުލޫމާތު ތަކުގައިވާ ގޮތުން މި މަޝްރޫއުގައި ގެސްޓްހައުސްތަކާއި ލަގްޒަރީ ވިލާތައް ސާވިސް އެޕާޓްމަންޓް އަދި ކޮމާޝަލް ސްޕޭސް އާއި މިޑްރޭންޖް ނުވަތަ މެދުފަންތީގެ ހޮޓާތަކުގެ އިތުރުން މަތީ ފަންތީގެ ހައިއެންޑް ހޮޓާތަކާއި ސިޓީ ހޮޓާތަކާއި ލަގްޒަރީ ވިލާތައްވެސް ހުންނާނެ އެވެ. މިތަންތަނުގެ ސައިޒު އުޅެނީ 2،800 އަކަފުޓޫން ފެށިގެން 50،00 އަކަފޫޓާ ދެމެދުގަ އެވެ. މި ތަންތަން ހަދަނީ ތިން ބުރި އާއި 12 ބުރިއާ ދެމެދުގު އުސްމިނުގަ އެވެ.
މި ރަށުގައި ހަދާ ޓޫރިޒަމް ޕްރޮޕަޓީތަކުގެ ތެރޭން އެންމެ ބޮޑު ޖާގައެއް ހާއްސަކޮށްފައިވަނީ 10 ބުރިއަށް އިމާރާތް ކުރާ "އަޕްސްކޭލް ހޮޓެލް" ނުވަތަ މަތީ ފަންތީގެ ހޮޓާތަކަށެވެ. މި ތަންތަނުގެ ސައިޒަކީ 50،681 އަކަފޫޓެވެ. އަދި ދެން އެންމެ ބޮޑު ޖާގައެއް ދީފައިވަނީ "މިޑްލްސްކޭލް" ހޮޓާތައް ހަދަން ހާއްސަ ކުރާ ބިންތަކުގަ އެވެ. މި ތަންތަން ހަދަން 19،000 އަކަފޫޓު ލިބޭނެ އެވެ.
އެޗްޑީސީ އިން ވަނީ މި މަޝްރޫއަށް އިންވެސްޓް ކުރާ ފަރާތްތަކަށް ތަފާތު ބިޒްނަސް މޮޑެލްތަކުގައި އިންވެސްޓް ކުރަން ފުރުސަތު ދީފަ އެވެ. މި ތަންތަން އިންވެސްޓް ކުރާ ފަރާތްތަކުން ލީސް މޮޑެލް އާއި ފިކްސްޑް ލީސް މޮޑެލް އަދި ޖޮއިންޓް ވެންޗާ (ޖޭވީ) ހަދައިގެން ވެސް ތަރައްގީ ކުރެވޭނެ އެވެ. މި ތަން ފަރުމާކޮށްފައިވަނީ ސަރުކާރުގެ ސިޔާސތުތަކާ އެއްގޮތަށް ދިގު މުއްދަތަކަށް ތިބޭ މީހުންނަށް ވެސް މި ޕްރޮޕަޓީތައް ނެގޭ ގޮތަށެވެ. އިންޓަގްރޭޓެޑް ޓޫރިޒަމް އައިލެންޑުގެ ޓޫރިޒަމް ވަސީލްތައް އެއާޕޯޓް ކައިރީގައި ހުރުމުން ޓްރާންސިޓްގެ ބޭނުމުގައި ކުރު މުއްދަތަކަށް ތިބުމަށް ވެސް ބޭނުން ކުރެވިދާނެ އެވެ.