ގޯލްޑް 100: ލައިފް ޓައިމް އެޗީވްމަންޓް ޑިމްސް ސޯލިހަށް

ރާއްޖޭގެ އެންމެ ބޮޑު 100 ވިޔަފާރި ހޮވައި އެ ވިޔަފާރިތަކަށްދޭ އެންމެ ޝަރަފުވެރި އެވޯޑްގެ ގޮތުގައި ބްރޭންޑް ވެފައިވާ "ގޯލްޑް 100" ގެ ތެރެއިން ދޭ "ކޯޕަރޭޓް މޯލްޑިވްސް ލައިފްޓައިމް އެޗީވްމަންޓް" އެވޯޑް މަޝްހޫރު ވިޔަފާރިވެރިޔާ މުހައްމަދު ސޯލިހް (ޑިމްސް ސޯލިހު) އަށް ދީފި އެވެ.

ރާއްޖޭގެ ވިޔަފާރީގެ ދާއިރާގައި "ޑިމްސް ސޯލިހު" ގެ ނަމުން މަޝްހޫރު ވެފައިވާ ހިދުމަތްތެރި ވިޔަފާރިވެރިޔާ ސޯލިހަށް މި ހާއްސަ އެވޯޑް ރޭ ހަވާލު ކޮށްދެއްވީ ކްރޮސްރޯޑް މޯލްޑިވްސްގައި ކޯޕަރޭޓް މޯލްޑިވްސް ގޯލްޑް 100 ގާލާ އިވެންޓުގައި ނައިބް ރައީސް ފައިސަލް ނަސީމު އެވެ. -- "ކޯޕަރޭޓް މޯލްޑިވްސް" އަކީ ވިޔަފާރިއަށް ހާއްސަކޮށް އިނގިރޭސި ބަހުން ނެރޭ މަޖައްލާއެކެވެ.

މީގެ ކުރިން "ކޯޕަރޭޓް މޯލްޑިވްސް ލައިފްޓައިމް އެޗީވްމަންޓް" އެވޯޑް، ވިޔަފާރީގެ ޕައިނިއަރުންގެ ގޮތުގައި ތިއްބެވި ބައެއް ބޭފުޅުންނަށް ލިބި ވަޑައިގެންފައި ވެއެވެ. މި އެވޯޑް މަޝްހޫރު ވިޔަފާރިވެރިޔާ ގާސިމް އިބްރާހިމް އަށް ލިބި ވަޑައިގެންފައިވާއިރު ޗަމްޕާ ހުސެއިން އަފީފުގެ އިތުރުން ދަ ހޯކްސް ޕްރައިވެޓް ލިމިޓެޑުގެ ފައުންޑާ އަދި ޗެއާމަން އަހުމަދު ހަސަން ރަޝީދާއި ބައިސަން މޯލްޑިވްސްގެ ފައުންޑާ އަދި މެނޭޖިން ޑިރެކްޓަރު އަބްދުލް މަޖީދަށް ވެސް ލިބި ވަޑައިގެންފައި ވެ އެވެ.