ގޯލްޑް 100 އެވޯޑު ދޭ މިއީ ހަ ވަނަ އަހަރެވެ. އެވޯޑު ދެނީ އެކަމަށް ހާއްސަކޮށް ބަލާ ބެލުންތަކާއި ކުންފުނީގެ މާލީ ކެޕޭސިޓީ އާއި ގިނަ އެހެން ކަންކަމަށް ބެލުމަށް ފަހު މިނިވަން ތިންވަނަ ފަރާތެއްގެ ބެލުމުގެ ދަށުންނެވެ.
ރާއްޖޭގެ އެންމެ ބޮޑު 100 ވިޔަފާރި ހޮވައި، އެ ވިޔަފާރިތަކުގެ މަސައްކަތުގެ އަގު ވަޒަން ކުރުމުގެ ގޮތުން "ގޯލްޑް 100" އެވޯޑު ދީފި އެވެ. މި އަހަރު ދިނީ މިދިއަހަރުގެ އެވޯޑެވެ.
ވިޔަފާރިއަށް ހާއްސަކޮށް އިނގިރޭސި ބަހުން ނެރޭ "ކޯޕަރޭޓް މޯލްޑިވްސް އިން ދޭ "ގޯލްޑް100" އެވޯޑު ދީފައި ވަނީ ކްރޮސްރޯޑް މޯލްޑިވްސްގައި ރޭ ބޭއްވި ކުލަ ގަދަ "ގޯލްޑް100 ގާލާ" އެވޯޑުގަ އެވެ. މި އެވޯޑުތައް ހަވާލު ކޮށްދެއްވީ ރާއްޖަށް އެކި ގައުމުތަކުން ކަނޑައަޅުއްވާފައިވާ އެމްސެޑަރުންނާއި ރާއްޖޭގެ ނައިބު ރައީސް ފައިސަލް ނަސީމެވެ.
މި އެވޯޑު ހަފުލާގައި ވާހަކަ ދައްކަވަމުން ނައިބު ރައީސް ފައިސަލް ނަސީމް ވިދާޅުވީ "ގޯލްޑް100" އެވޯޑަކީ ރާއްޖެއަށް ވަރަށް މުހިންމު އެވޯޑެއް ކަމަށެވެ. މި އެވޯޑު މުހިންމުވާ ސަބަބަކީ ވިޔަފާރިވެރިން ހާއްސަކޮށް ޕްރައިވެޓް ސެކްޓާއިން ރާއްޖެ ކުރިއަށް ގެންދަން ކުރަމުން ގެންދާ މަސައްކަތުގެ އަގު ވަޒަން ކުރާތީ ކަމަށް ވެސް ނައިބު ރައީސް ވިދާޅުވި އެވެ.
"ގައުމެއް ގައުމެއްގެ ގޮތުގައި ދެމި އޮންނަނީ އެ ގައުމެއްގެ އިގްތިސޯދު ބިނާވެފައިވާ ގޮތުގެ މައްޗަށް. ރާއްޖޭގެ އިގްތިސޯދު ހިފެހެއްޓުމުގައި ޕްރައިވެޓް ސެކްޓަރު އިން ކުރާ މަސައްކަތްތަކަށް ޝުކުރު އަދާ ކުރަން ޖެހޭ. ރާއްޖޭގެ ފަތުރުވެރިކަމުގެ ސިނާއަތަކީ މުޅިން ޕްރައިވެޓް ސެކްޓާގެ މައްޗަށް ބިނާވެފައިވާ ސިނާޢަތެއް،" ކުރިން ޓޫރިޒަމް ސެކްޓާގައި ގިނަ މަސައްކަތެއް ކުރެއްވި ފައިސަލް ވިދާޅުވި އެވެ.