އައިޑީ ކާޑުގެ ފަރުމާ ކޮށްދޭނެ ބަޔަކު ނުވި ؛ އަނެއްކާ ހުޅުވާލައިފި

ދިވެހި ރައްޔިތެއްކަން އަންގައިދޭ ކާޑު މުޅިން އާ ޑިޒައިނަކަށް ފަރުމާ ކޮށްދޭނެ ފަރާތެއް ހޯދަން ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން (ޑީއެންއާރް) އިން އަނެއްކާ ވެސް އިއުލާނެއް ކޮށްފި އެވެ.

ޑީއެންއާރް އިން އަންނަނީ މި އަހަރުގެ ޖޫން މަހުން ފެށިގެން އެކި ފަހަރު މަތިން އިއުލާނުތައް ކުރަމުންނެވެ. އެ އޮފީހުން ބުނެފައި ވަނީ އެންމެ ފަހުން ކުރި އިއުލާނަށް ވެސް އެކަށީގެންވާ ތަރުހީބެއް ނުލިބޭތީ އެކަމަށް ޝައުގުވެރިވާ ފަރާތްތަކުން އަންނަ މަހުގެ އެއްވަނަ ދުވަހުގެ ކުރިން ޕްރޮޕޯސަލް ހުށަހަޅަން އެދޭ ކަމަށެވެ.

އެންމެ ފުރިހަމަ ޑިޒައިނެއް ހުށަހަޅާ ފަރާތަކަށް އިނާމެއްގެ ގޮތުގައި ދެ ލައްކަ ރުފިޔާ ވެސް ހުށަހަޅާފައި ވެއެވެ.

ޑީއެންއާރް އިން ބުނެފައި ވަނީ އަލަށް ޑިޒައިން ކުރާ އައިޑީ ކާޑު ވާން ޖެހޭނީ ސަލާމަތީ ގޮތުން ފުރިހަމަ، އިތުބާރާ ޔަގީންކަން އޮންނަ، ޒަމާނީ ފީޗާތަކާއެކު ތައާރަފު ކުރާ ސްމާޓް އައިޑީ ކާޑަކަށް ކަމަށެވެ.

ޑީއެންއާރް އިން އައިޑީ ކާޑުގެ ޑިޒައިން ބަދަލު ކުރަން ނިންމާފައި ވަނީ ރާއްޖޭގައި ޑިޖިޓަލް އައިޑެންޓިޓީ ނިޒާމެއް ގާއިމްކުރުމުގެ މަސައްކަތް ކުރަން މިދިޔަ ފެބްރުއަރީ މަހު ރައީސް އިބްރާހިމް މުހައްމަދު ސޯލިހު ވަޒީރުންގެ މަޖިލީހުގައި ނިންމެވުމާއި ގުޅިގެންނެވެ.

ރާއްޖޭގައި މިހާރު ބޭނުން ކުރަމުން އަންނަ އައިޑީ ކާޑުގެ ޑިޒައިނަކީ ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި 1984 ގައި ފަރުމާ ކޮށްފައިވާ ޑިޒައިނެކެވެ.

ޑީއެންއާރް ހިންގަން ޑިރެކްޓަރު ޖެނެރަލަކު ވެސް ހޯދަ އެވެ. އެ އިއުލާން ސިވިލް ސާވިސް ކޮމިޝަނުން ކޮށްފައިވެ އެވެ. އެ މަގާމަށް ބޭފުޅަކު ހޯދާއިރު އެ ޑިޕާޓްމަންޓް ހިންގަން ދިގު ޒަމާންތަކެއް ވަންދެން ހުންނެވި ފަރީދާ ޔޫސުފު ރިޓަޔާ ކުރެއްވިތާ މިހާރު އަހަރަކަށްވުރެ ގިނަ ދުވަސް ވެފައިވެއެވެ.

އެ މަގާމުގައި ހުންނަވާ ބޭފުޅަކީ ޒިންމާދާރު ވެރިޔާގެ ގޮތުގައި ޑީއެންއާރްގެ ހުރިހާ ކަމެއް އިސްވެ ހިންގާ ބަލަހައްޓާ ފަރާތެވެ. ފަރީދާ، ޑީއެންއާރުން ރިޓަޔާ ކުރެއްވި ފަހުން ޑީއެންއާރުގެ މަސައްކަތްތަކާ ބެހޭ ގޮތުން އާންމު މީހުންގެ ޝަކުވާތައް ވަރަށް ގިނަ އެވެ.