ޔުމްނު ކޮމިޝަނުން ފާހަގަކުރި މައްސަލަތައް ބަލައި ފިޔަވަޅު އަޅަން ރައީސް އަންގަވައިފި
ރައީސް މިއަދު ވަނީ ރިޕޯޓުގައި ފާހަގަކޮށްފައިވާ މައްސަލަތައް ބެލުމަށް ހޯމްލޭންޑް މިނިސްޓްރީއަށާއި ހެލްތު މިނިސްޓްރީއަށް އަންގަވާފަ އެވެ.
ހ. ފެންޓެނޯއީ ގޭ މަތިން ގުދަނެއްގެ ފުރާޅު މައްޗަށް އުމުރުން 21 އަހަރުގެ ހައްވާ ޔުމްނު ރަޝީދު ވެއްޓުނު މައްސަލަ ތަހުގީގު ކުރުމަށްފަހު ރިޔާސީ ކޮމިޝަނުން އެކުލަވާލި ރިޕޯޓުގައި ފާހަގަކޮށްފައިވާ މައްސަލަތައް ބަލައި ފިޔަވަޅު އެޅުއްވުމަށް ގުޅުންހުރި އިދާރާތަކަށް ރައީސް ޑރ. މުހައްމަދު މުއިއްޒު އަންގަވައިފި އެވެ.
ގާނޫނުއަސާސީން ރައީސަށް ލިބިވަޑައިގަންނަވާ ބާރުގެ ދަށުން ޔުމްނު ވެއްޓުނު މައްސަލައިގެ އިންކުއަރީއެއް ހެދުމަށް މިދިޔަ އޭޕްރީލް މަހުގެ 27 ވަނަ ދުވަހު އުފެއްދެވި ހާއްސަ ކޮމިޝަނުން މަސައްކަތް ނިންމާލުމަށްފަހު މިމަހުގެ 17 ވަނަ ދުވަހު ވަނީ ރިޕޯޓް އާންމުކޮށްފަ އެވެ.
އެ ރިޕޯޓުގައި ފުލުހުންނާއި ބައެއް ފަރާތްތަކުން އަމަލުކޮށްފައިވާ ގޮތުން، މައްސަލަ ބެލުމަށް ލަފާދީފައިވެ އެވެ. އެހެންކަމުން ރައީސް މިއަދު ވަނީ ރިޕޯޓުގައި ފާހަގަކޮށްފައިވާ މައްސަލަތައް ބެލުމަށް ހޯމްލޭންޑް މިނިސްޓްރީއަށާއި ހެލްތު މިނިސްޓްރީއަށް އަންގަވާފަ އެވެ.
ހޯމް މިނިސްޓްރީއަށް އެންގެވި ކަންކަން
- އިންވެސްޓިގޭޝަން އޮފިސަރު ކްރައިމް ސީނަށް ދިއުން ލަސްވުމާއި، ކުށުގެ ވެށީގެ ހުރިހާ ސަރަހައްދެއް އެކަށީގެންވާ ގޮތެއްގައި ޕްރޮސެސްކޮށްފައި ނުވާކަމަށާއި އަދި ފަރުވާކުޑަކޮށްފައިވާތީ އެކަންކަން ބެލުން
- މައްސަލައިގައި އެންމެ މުހިންމު އެއް ތަންކަމުގައިވާ ހ. މިޓާޒްގެ ފުރާޅުމަތިން އެއްވެސް ހެއްކެއް ލިބޭތޯ މަސައްކަތެއް ކޮށްފައި ނުވުމާއި، ކުށުގެ ވެށީގެ ބައުންޑްރީއެއް ކަނޑައެޅިފައި ނެތުމާއި، ކުށުގެ ވެށި ރައްކައުތެރިކުރެވިފައި ނުވާ މައްސަލަ ބެލުން
- މައްސަލައާ ގުޅިގެން ދައުވާކޮށްފައިވާ ރައުދު އަހުމަދު ޒިލާލްގެ ބޭބެ، ދާއޫދު އަހުމަދު ޒިލާލް ފުލުހުންނަށާއި ކޮމިޝަނަށް ދިން ބަޔާން ތަފާތުވި މައްސަލަ ބެލުން
- ރައުދުގެ ގެ، ހ. މާއިރާއިން އޭގެ އަނެއް ދުވަހުގެ ހެނދުނު ބައްދަލުވި މީހުންގެ ބައިވެރިވުން ހިމެނޭތީ އެކަން އިތުރަށް ތަހުގީގު ކުރުން
މި މައްސަލައިގައި ރައުދުގެ މައްޗަށް ކުރަނީ، ގާނޫނުލްއުގޫބާތުގެ ދަށުން، އެހީއަށް ބޭނުންވެފައިވާ މީހާއަށް އެކަށީގެންވާ ސަބަބެއްނެތި، އެހީތެރިކަން ފޯރުކޮށްނުދިނުމުގެ ކުށުގެ ދައުވާ ކަމަށެވެ. އޭނާގެ ބޭބެ ދާއޫދަށް ވެސް އެ ތުހުމަތު މިހާރު ކުރެ އެވެ.
މި މައްސަލައިގައި ހެލްތު މިނިސްޓްރީއަށް ރައީސް ބަލަން އެންގެވީ އައިޖީއެމްއެޗާއި އެ ހޮސްޕިޓަލުގައި ހުންނަ ފެމިލީ ޕްރޮޓެކްޝަން ޔުނިޓް (އެފްޕީޔޫ) އިން އަމަލުކޮށްފައިވާ ގޮތާ ގުޅިގެން ކޮމިޝަނުން ފާހަގަކުރި ކަންކަން ބެލުމަށެވެ.
އެގޮތުން؛
- ޔުމްނުއަށް ޖިންސީ ގޯނާގެ އެއްވެސް އަނިޔާއެއް ލިބިފައިވޭތޯ އައިސީޔޫއިން އެފްޕީޔޫއަށް އެންގުމުން އެކަން ނުކޮށް ދޫކޮށްލި މައްސަލަ
- އަނިޔާ ލިބިފައިވާ މީހަކު ހޮސްޕިޓަލަށް ގެންދިއުމުން އެމީހަކަށް ލިބިފައިވާ އަނިޔާތައް ދެނެގަތުމަށް ސާމްޕަލްތައް ނެގޭނެ އިންތިޒާމްތައް ހަމަޖެއްސުން
ކޮމެންޓް
Republic of Maldives