އީރާންއިޒްރޭލް ހަނގުރާމައާއެކު ތެލުގެ އަގު އުފުލެނީ

އީރާނާއި އިޒްރޭލުން މިހާރު ކުރަމުންދާ ހަނގުރާމައިގެ ސަބަބުން ދުނިޔޭގެ ބާޒާރުގައި ތެލުގެ އަގު ބޮޑުތަނުން އުފުލެން ފަށައިފި އެވެ. 

ދުނިޔޭގައި އެންމެ ގިނައިން ތެޔޮ އުފައްދާ އެއް ގައުމު ކަމަށްވާ އީރާނާއި އިޒްރޭލާ ދެމެދު ފެށިފައިވާ ހަނގުރާމައިގެ ސަބަބުން މި ކުރިމަތިލުންތައް ފެށުނުއިރު 60 ޑޮލަރަށްހުރި ސާފު ނުކުރާ ތެޔޮ ފީފާއެއްގެ އަގު މިހާރު ވަނީ 75.15 ޑޮލަރަށް އުފުލިފަ އެވެ. އަދި ކުރިމަގުގައި މި ކޯޅުން ނުހުއްޓި ކުރިއަށް ގޮސްފިނަމަ ތެލުގެ އަގު 13 ޕަސެންޓުގެ އުފުލެއް އަންނާނެ ކަމަށް ތަޖުރިބާކާރުން ވަނީ އަންދާޒާކޮށްފަ އެވެ. 

ދުނިޔޭގެ މަޝްރަހުގައި މިހާރު އުފެދިފައިވާ އެންމެ ބޮޑު ނުތަނަސް ކަމަކީ ސްޓްރެއިޓް އޮފް ހޯރްމޫޒް ނުވަތަ ހޮރުމޫޒް ކަނޑުއޮޅި ބަންދުކޮށްލުގެ ފުރުސަތު އޮތުމެވެ. އީރާނުން ވެސް ވަނީ މިކަމަށް ސީރިއަސްކޮށް ވިސްނަމުން ގެންދާ ކަމަށް ބުނެފަ އެވެ. މިގޮތަށް އަމަލުކޮށްފިނަމަ ދުނިޔޭގެ ބާޒާރުގައި ތެލުގެ އަގު އަތް ނުފޯރާ ފަށަން އުފުލިގެންދާނެ އެވެ. މި ސަރަހައްދަކީ ދުނިޔޭގެ އެކި ކަންކޮޅުތަކަށް ގެންދާ ތެލުގެ 20 ޕަސެންޓް ދަތުރުކުރާ މައިމަގެވެ. މިތަން ބަންދުކޮށްފިނަމަ ތެލުގެ އަގު ފީފާއެއް 120 ޑޮލަރަށް އުފުލުމުގެ ފުރުސަތު އޮތް ކަމަށް ތަޖުރިބާކާރުން އަންދާޒާ ކުރެ އެވެ.