ބަޖެޓު އަރަނިކޮށް، ލޯނު ދެއްކި މިންވަރު ތިން ބިލިއަނާ ގާތަށް

މި އަހަރުގެ ޖުމްލަ ބަޖެޓުން ބަޖެޓު ބޮޑުތަނުން އަރަނިކޮށް ލޯނު ދެއްކި އަދަދު ރެކޯޑް އިތުރުވުމަކާއެކު ތިން ބިލިއަން ރުފިޔާއާ ގާތަށް ޖެހިލައިފި އެވެ. 

ފިނޭންސް މިނިސްޓްރީން މި މަހުގެ ފަސް ވަނަ ދުވަހުގެ ނިޔަލަށް ނެރުނު ވީސްލީ ފިސްކަލް ރިޕޯޓް (ޑަބްލިއުފްބީ) ރިޕޯޓުގައިވާ ގޮތުން މި އަހަރުގެ މިހާތަނަށް ބަޖެޓުގެ އޯވަރޯލް ބެލެންސުން ވަނީ އެއް މިލިއަން ރުފިޔާ ސަލާމަތްކޮށްފަ އެވެ.

މި އަހަރުގެ މިހާތަނަށް ދައުލަތަށް 16.6 ބިލިއަން ރުފިޔާގެ އާމްދަނީއެއް ލިބުނުއިރު ހަރަދުވެފައިވަނީ 15.5 ބިލިއަން ރުފިޔާ އެވެ. އަދި މި އަހަރުގެ މިހާތަނަށް ޕްރައިމެރީ ބެލެންސުން ވެސް ވަނީ މި ބަދަލު ފެންނަމުންނެވެ. މިހާރު ޕްރައިމެރީ ބެލެންސް ހުރީ 3.1 ބިލިއަން ރުފިޔާގަ އެވެ. 

ބަޖެޓު ބޮޑުތަނުން ހަރަދު ކުޑަވާ ކަމަށް ދެއްކިއިރު ލޯނު ދައްކަން ބަޖެޓުން ކުރާ ހަރަދުވެސް ވަނީ މަތިވެފަ އެވެ. މި އަހަރުގެ މިހާތަނަށް 2,9 ބިލިއަން ރުފިޔާ ވަނީ ލޯނު ދައްކަން ހަރަދުކޮށްފަ އެވެ. މިގޮތުން މިފަހުން ސަރުކާރަށް ވާރުތަވީ ގިނަ ލޯނުތަކެއް ދައްކާފައިވެ އެވެ. މިގޮތުން ލޯނު ދެއްކި މިންވަރު 125 މިލިއަން ޑޮލަރަށްވުރެ މައްޗެވެ. 

ފިނޭންސް މިނިސްޓްރީގެ މައުލޫމާތުތައް ދައްކާ ގޮތުން މިދިޔަ އަހަރަށްވުރެ މި އަހަރުގެ މިހާތަނަށް ދައުލަތަށް ލިބުނު އާމްދަނީ ވަނީ އިތުރުވެފަ އެވެ. މި އަހަރުގެ މިހާތަނަށް ބަޖެޓަށް އާމްދަނީގެ ގޮތުގައި ލިބުނީ 16,6 ބިލިއަން ރުފިޔާ އެވެ. މިދިޔަ އަހަރު މި އަދަދު ހުރީ 15.7 ބިލިއަން ރުފިޔާގަ އެވެ. 

މިދިޔަ އަހަރު ބަޖެޓުގެ ޖުމްލަ ހަރަދު މިދިޔަ އަހަރުގެ ޖޫން ފަސް ވަނަ ދުވަހުގެ ނިޔަލަށް 22 ބިލިއަން ރުފިޔާގައި ހުރިނަމަވެސް މި އަހަރުގެ މިހާތަނަށް މި އަދަދު ވަނީ 20 ބިލިއަން ރުފިޔާއަށް ކުޑަކޮށްފަ އެވެ. އަދި ރިކަރަންޓް ހަރަދަށް މި އަހަރުގެ މިހާތަނަށް 15,5 ބިލިއަން ރުފިޔާ ހަރަދު ކޮށްފައިވެ އެވެ. ނަމަވެސް މިދިޔަ އަހަރުގެ ރިކަރަންޓް ހަރަދު ހުރީ 19 ބިލިއަން ރުފިޔާގަ އެވެ. 

މި އަހަރަށް ފާސްކޮށްފައިވަނީ 56.6 ބިލިއަން ރުފިޔާގެ ބަޖެޓެކެވެ. މި ބަޖެޓުގައި ހިލޭ އެހީއާއި އާމްދަނީގެ ގޮތުގައި 39.7 ބިލިއަން ރުފިޔާ ލިބޭނެކަމަށް އަންދާޒާކޮށްފައިވެ އެވެ. އެއީ ހިލޭ އެހީގެ ގޮތުގައި ލިބޭނެކަމަށް އަންދާޒާކުރާ 2.5 ބިލިއަން ރުފިޔާއާއި، އާމްދަނީގެ ގޮތުގައި ލިބޭނެކަމަށް އަންދާޒާކުރާ 37.2 ބިލިއަން ރުފިޔާ އެވެ. ޖުމްލަ އާމްދަނީީއާއި ހިލޭ އެހީގެ ގޮތުގައި 39.7 ބިލިއަން ރުފިޔާ ލިބޭނެކަމަށް އަންދާޒާކުރާއިރު ދައުލަތުގެ ހަރަދުތަކަށް ހިނގާނެކަމަށް ލަފާކުރަނީ 49.2 ބިލިއަން ރުފިޔާ އެވެ. އެއިން 35.8 ބިލިއަން ރުފިޔާއަކީ ރިކަރަންޓު ހަރަދުތަކެވެ. އަދި ކެޕިޓަލް ހަރަދުގެ ގޮތުގައި 13.4 ބިލިއަން ރުފިޔާ ހަރަދުވާނެކަމަށް ލަފާކޮށްފައިވެ އެވެ. އެއިން 12.4 ބިލިއަން ރުފިޔާއަކީ ޕީއެސްއައިޕީ މަޝްރޫއުތަކަށް ހިނގާނެކަމަށް ބެލެވޭ ހަރަދެވެ. މި ބަޖެޓުގެ ޖުމްލަ ޑެފިސިޓަކީ 9.4 ބިލިއަން ރުފިޔާ އެވެ. އަދި ދަރަނި އަދާކުރުމުގެ ހަރަދުތައް ނުހިމަނައި އާމްދަނީއާއި ހަރަދުގެ ފަރަގު ނުވަތަ ޕްރައިމަރީ ޑެފިސިޓުގެ ގޮތުގައި ލަފާކޮށްފައިވަނީ 3.9 ބިލިއަން ރުފިޔާ އެވެ.