ގެދޮރު ނެތް 18 އަހަރުން މަތީގެ މީހުންނަށް ބޯހިޔާވަހިކަމުގެ ލިޔުން ދޭން ފަށަނީ
ލިޔުން ހަވާލުކުރާއިރު އެ މީހަކަށް ގޯތި ނުވަތަ ފްލެޓް ލިބޭ ތަން ޔަގީންވެ، މާލެ ސަރަހައްދުގައި ހިއްކާ ބިންތަކުން، އެ މީހަކު ހިޔާރުކުރާ ތަނަކުން ގޯތި ނުވަތަ ފްލެޓް ހަމަޖެހިގެންދާނެ ކަމަށް އެ މަނިކުފާނު ވިދާޅުވި އެވެ.
މާލެ ސަރަހައްދުގައި ދާއިމީ ބޯހިޔާވަހިކަމެއް ނެތް ދިރިއުޅޭ، 18 އަހަރުން މަތީގެ ހުރިހާ އެންމެންނަށް ގޯތި ނުވަތަ ފްލެޓު ލިބޭނެކަމުގެ ލިޔުން މި އަހަރުގެ ތެރޭގައި ދޫކުރަން ފަށާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ޕީއެސްއެމްއަށް ދެއްވި ހާއްސަ އިންޓަވިއުއެއްގައި، ބޯހިޔާވަހިކަމާ ގުޅޭ ގޮތުން ވާހަކަ ދައްކަވަމުން ރައީސް ވިދާޅުވީ، އަމިއްލަ ގެދޮރެއް ނެތް 18 އަހަރުން މަތީގެ ކޮންމެ ރައްޔިތަކަށް ގެދޮރު ކަށަވަރުކޮށްދިނުމަކީ އެ މަނިކުފާނު ރިޔާސީ ވައުދުފުޅެއް ކަމަށެވެ.
"މާލޭގައިވެސް، އެއްވެސް ރަށެއްގައިވެސް "ފަސްޓް ހޯމް" ނުވަތަ އަމިއްލަ ފުރަތަމަ ގެ ނެތް މީހުންނަށް ބޯހިޔާވަހިކަން ހޯދައިދޭނަން. އެ މީހުންނަށް އަމިއްލަ ގެއެއް ނުވަތަ ފްލެޓެއް ލިބޭނެކަން ކަށަވަރުކޮށްދޭނަން. ރަސްމީގޮތުން އެކަން ކަށަވަރުކޮށް، މި އަހަރު ނިމުމުގެ ކުރިން ލިޔުން ދޭނަން،" ރައީސް ވިދާޅުވި އެވެ.
ލިޔުން ހަވާލުކުރާއިރު އެ މީހަކަށް ގޯތި ނުވަތަ ފްލެޓް ލިބޭ ތަން ޔަގީންވެ، މާލެ ސަރަހައްދުގައި ހިއްކާ ބިންތަކުން، އެ މީހަކު ހިޔާރުކުރާ ތަނަކުން ގޯތި ނުވަތަ ފްލެޓް ހަމަޖެހިގެންދާނެ ކަމަށް އެ މަނިކުފާނު ވިދާޅުވި އެވެ.
މިގޮތުން، މާލެ ސަރަހައްދަށް ބިން އިތުރުކުރުމަށް ގުޅިފަޅު، ގިރާވަރުފަޅު، އުތުރު ތިލަފަޅު އަދި ރަސްމާލެ އަންނަނީ ހިއްކަމުންނެވެ. މިގޮތުން، އެ ސަރަހައްދުތައް ހިއްކައި ނިންމައި، ތަރައްގީ ކުރެވޭ މިންވަރަކުން އެ މީހުންނަށް ގޯތި ނޫނީ ފްލެޓު ހަވާލުކުރަމުން ގެންދަވާނެ ކަމަށް ވިދާޅުވި އެވެ.
ކޮމެންޓް
Republic of Maldives