އާ އަމުރެއްގެ ދަށުން އަނެއްކާވެސް ރައުދު ހައްޔަރުކޮށްފި

މިދިޔަ އޭޕްރީލް މަހުގެ 18 ވަނަ ދުވަހުގެ ރޭ ހ. ފެންޓެނޯއީ ގޭގެ ނުވަވަނަ ފަންގިފިލާއިން ގުދަނެއްގެ ފުރާޅު މައްޗަށް ހައްވާ ޔުމްނު ރަޝީދު ވެއްޓުނު މައްސަލައިގައި ހައްޔަރު ކޮށްފައި ހުރި ރައުދު އަހުމަދު ޒިލާލް މިއަދު ދޫކޮށްލުމަށްފަހު އަލުން ހައްޔަރު ކޮށްފި އެވެ.

މިއަދު ހެނދުނު ރައުދުން ބަންދުން ދޫކޮށްލާފައި ވަނީ އެންމެ ފަހުން އޭނާގެ ބަންދަށް ކްރިމިނަލް ކޯޓުން ޖެހި 20 ދުވަހުގެ މުއްދަތު ހަމަނުވަނީހެވެ. 

ރައުދު ބަންދުކުރި އަމުރެއް ހައިކޯޓުގައި އިސްތިއުނާފް ކޮށްފައިވާއިރު، އެ މައްސަލައިގެ ފުރަތަމަ އަޑުއެހުން މިއަދު މެންދުރުފަހަށް އޮތީ ތާވަލުކޮށްފަ އެވެ. ނަމަވެސް އެކޯޓުން މިއަދު ވަނީ ރައުދު ބަންދުން ދޫކޮށްލާފައިވާތީ މައްސަލަ ބާތިލު ކުރުމަށް އޭނާގެ ފަރާތުން އެދިފައިވާތީ މައްސަލަ ބާތިލުކޮށްފަ އެވެ.

ނަމަވެސް އާ އަމުރެއްގެ ދަށުން އަނެއްކާ ވެސް ފުލުހުން ވަނީ އޭނާ ހައްޔަރުކޮށްފަ އެވެ. ހެނދުނު އޭނާ ބަންދުން ދޫކޮށްލާފައި ވަނީ ރޮސެކިއުޓާ ޖެނެރަލްގެ އޮފީހުގެ އިޖުރާއީ ލަފައެއްގެ މަތިން ކަމަށް ފުލުހުން ބުނެފައިވެ އެވެ.

ހ. މިޓާޒްގޭ ފުރާޅު މައްޗަށް ޔުމްނު ވެއްޓިފައި އޮއްވައި ފެނުނީ ހާދިސާ ހިނގިތާ އަނެއް ދުވަހުގެ ހެނދުނުގެ ވަގުތެއްގަ އެވެ. މި މައްސަލައާ ގުޅިގެން ރައުދު ހައްޔަރުކޮށްފައި ވަނީ މިހާދިސާ ހިނގިތާ ހަ ދުވަސް ފަހުން، އޭޕްރީލް މަހުގެ 25 ވަނަ ދުވަހު އެވެ.

ފުލުހުން ވަނީ ޔުމްނު ވެއްޓުމުގައި ރައުދުގެ ބައިވެރިވުން އޮތް ކަމަށް ތުހުމަތު ކޮށްފަ އެވެ. ރައުދުއަކީ ޔުމްނު ވެއްޓުމުގެ ކުރިން އެންމެ ފަހު ވަގުތާ ޖެހެންދެން ފެންޓެނޯއީ ގޭގެ ސިޑިމަތީގައި އުޅުނު ޒުވާނާ އެވެ. އެމަންޒަރުތައް ފެންނަ ސީސީޓީވީ ފުޓޭޖްތައް ފުލުހުން ކުރިން ވަނީ ދައްކާފަ އެވެ.

މި މައްސަލަ ބެލުމަށް ރައީސް ޑރ. މުހައްމަދު މުއިއްޒު ވަނީ ރިޔާސީ ކޮމިޝަނެއް ވެސް އުފައްދަވާފަ އެވެ. އެކޮމިޝަނުން މިހާރު ވަނީ ރައުދުއާ ބައްދަލުކޮށް ސުވާލު ކޮށްފަ އެވެ.