ދައުލަތަށް ނުދައްކާ ހުރި 600 މިލިއަނަށްވުރެ ގިނަ ރުފިޔާ ހޯދައިފި

ދައުލަތަށް ދައްކަން ޖެހި ނަމަވެސް ނުދައްކާ ހުރި 600 މިލިއަން ރުފިޔަށްވުރެ ގިނަ ރުފިޔާ މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ހޯދައިިފި އެވެ. 

ދައުލަތުގެ ޓެކްސް އިދާރާ މީރާ އިން އާއްމުކުރި މި އަހަރުގެ ފުރަތަމަ ތިން މަހުގެ ރިޕޯޓް ދައްކާ ގޮތުން ނިމިދިޔަ ތިން މަހު އެންސްފޯސްމަންޓް ކަލެކްޝަންގެ ގޮތުގައި ނުދައްކާ ހުރި ފައިސާ ހޯދަން ކުރި މަސައްކަތުން 616.39 މިލިއަން ރުފިޔާ ވަނީ ހޯދާފަ އެވެ. 

ޓެކްސް އަށް ރަޖިސްޓްރީކޮށްފައިވާ ފަރާތްތަކުން ދައުލަތަށް ނުދައްކާހުރި ފައިސާގެ ތެރޭން އެންމެ ގިނަ ފައިސާ ހޯދާފައިވަނީ މީރާއިން އެ ފަރާތްތަކަށް ހަނދާންކޮށް ދީގެން ކުރި މަސައްކަތުން ހޯދި ފައިސާ އެވެ. މި މުއްދަތުގައި މީރާއިން 5,041 ފަރާތްތަކަށް ފައިނަލް ނޯޓިސް ދީފައިވެ އެވެ. 

ފުރަތަމަ ތިން މަހު މީރާއިން ވަނީ 81 ފަރާތަކަށް ބަހާލައިގެން ޓެކްސް ދައްކަން އިންސްޓޯލްމަންޓް ޕްލޭންގެ ފުރުސަތު ދީފަ އެވެ. މި ފަރާތްތަކުން 62.48 މިލިއަން ރުފިޔާ ދައުލަތަށް ވަނީ ދައްކާފަ އެވެ. އަދި މި މުއްދަތުގައި ޖުމްލަ 1,087 މައްސަލައެއް ބަލައި 41.89 މިލިއަން ރުފިޔާގެ ޓެކްސްގެ ލުއި ދީފައިވެ އެވެ. މީގެތެރޭގައި ސަރުކާރުގެ ކުންފުނިތަކުގެ ހަ މައްސަލައަކާ ގުޅިގެން ދިން 1.27 މިލިއަން ރުފިޔާގެ ޓެކުހުގެ ލުއިވެސް ހިމެނެ އެވެ. 

މީރާގެ ހިސާބުތައް ދައްކާ ގޮތުން ރާއްޖޭގައި ޖުމްލަ މިދިޔަ ކުއާޓަރާ ހަމައަށް އިކަމް ޓެކްސް ދައްކަން މުޅިން އަލަށް 2,525 ފަރާތެއް ވަނީ ރަޖިސްޓްރީކޮށްފަ އެވެ. އަދި ޓީޖީއެސްޓީއަށް 104 ފަރާތެއް ރަޖިސްޓްރީކޮށްފައިވާއިރު އާއްމު ޖީއެސްޓީއަށް 355 ފަރާތެއް ރަޖިސްޓްރީކޮށްފައިވެ އެވެ. މީގެ އިތުރުން ގްރީން ޓެކްސް ދައްކަން 101 ފަރާތެއް އަލަށް ރަޖިސްޓްރީކޮށްފައިވެ އެވެ. 

ޓެކްސް އިދާރާގައި ޖުމްލަ 303 މުވައްޒަފުން މަސައްކަތް ކުރެ އެވެ. މި ކުއާޓަރުގައި އަލަށް 14 މުވައްޒަފުންނަށް ވަޒީފާ ދިނެވެ. އަދި 11 މުވައްޒަފުން މީރާ ދޫކޮށް ދިޔަ އެވެ.