އޭޓީއެމްގައި ރާއްޖެ | ލަގްޒަރީ ދުބާއީގައި ގަދައީ ރާއްޖޭގެ އަޑު
މި އަހަރު ރާއްޖޭގެ 111 ކުންފުންޏެއްގެ 230 ބައިވެރިން ވަނީ މި ފެއާގައި ބައިވެރިވެފަ އެވެ. އަދި ގިނަ ހަރަކާތްތަކެއްވެސް ހިންގާފަ އެވެ.
ދުބާއީގައި ކުރިއަށްދާ މެދުއިރުމަތީގެ އެންމެ ބޮޑު ޓޫރިޒަމް ފެއާ، އެރަބިއަން ޓްރެވަލް މާކެޓް (އޭޓީއެމް) ގައި ހުރި ދިވެހި ކުންފުންޏަކަށް ގުޅައިލުމުން ބުނީ މިއީ މިހާތަނަށް ބޭއްވި އެންމެ ރަނގަޅު އެއް އިވެންޓު ކަމަށެވެ.
"ހުރިހާ ގޮތަކުން ވެސް ފެއާ ރަނގަޅު. އެންމެ ޕާފެކްޓެއް ނުވާނެ. އެކަމަކު ވިޔަފާރީގެ ގޮތުންވެސް މި ފެއާ ރަނގަޅު،" ޓޫރިޒަމަށް ހާއްސަ މަޖައްލާއެއްވެސް ހިންގާ ޓްރެވަލް ކުންފުންޏެއްގެ އިސްވެރިއަކު މިއަދު ބުންޏެވެ.
ދުބާއީގައި މިހާރު ކުރިއަށްދާ އޭޓީއެމް ފެއާގައި މި އަހަރު ޓޫރިޒަމް ސިނާއަތުގެ 111 ކުންފުންޏެއްގެ 230 މަންދޫބުން ދަނީ ބައިވެރިވަމުންނެވެ. މި ފެއާގައި ޓޫރިޒަމާ ތިމާވެއްޓާ ބެހޭ ވަޒީރު ތާރިގު އިބުރާހިމް ބައިވެރިވަޑައިގަންނަވާ، ފަތުރުވެރިކަމުގެ ސިނާއަތުގައި ހަރަކާތްތެރިވާ އެކި ފަރާތްތަކާ ބައްދަލުކުރައްވާ، މެދު އިރުމަތީގެ މާރކެޓަށް ދިވެހިރާއްޖެ ޕްރޮމޯޓްކުރުމުގައި ކުރަމުންގެންދާ މަސައްކަތްތައް އިތުރަށް ހަރުދަނާކުރުމަށް މަސައްކަތްކުރައްވާނެއެވެ.
އަންނަ މަހުގެ އެއްވަނަ ދުވަހުގެ ނިޔަލަށް ކުރިއަށްދާ އޭޓީއެމް އޮތީ ޔޫއޭއީގެ ދުބާއީގައި ހުންނަ ދުބާއީ ވޯލްޑް ޓްރޭޑް ސެންޓަރުގަ އެވެ. މި ފެއާގައި ވިޒިޓް މޯލްޑިވްސްގެ އޮފިޝަލް އެއާލައިން ޕާޓްނަރަކީ ދިވެހިރާއްޖޭގެ ސިމްޑީއާ ގުޅިގެން ހިންގާ ބިއޮންޑް އެވެ. މިއީ ދުނިޔޭގެ ފުރަތަމަ ލަގްޒަރީ އެއާލައިން އެވެ.
އޭޓީއެމް އަކީ މެދުއިރުމަތީގެ ބައިނަލްއަގްވާމީ ދަތުރުފަތުރާއި ފަތުރުވެރިކަމުގެ މުހިއްމު ޕްލެޓްފޯމްއެކެވެ. މީގެ އިތުރުން، އިންބައުންޑް އަދި އައުޓްބައުންޑް ޕްރޮފެޝަނަލުންނަށް އެފަރާތްތަކުގެ އުފެއްދުންތަކާއި ހިދުމަތްތައް އެކި ފަރާތްތަކަށް ދައްކާލާ، ދިގު މުއްދަތުގެ ޕާޓްނަޝިޕްތައް އުފެއްދުމަށް ބައިނަލްއަގްވާމީ ސްޓޭޖެއް ފޯރުކޮށްދޭ ފެއާއެކެވެ. ހަތަރު ދުވަހުގެ މި ފެއަރގައި ބައިވެރިންނަށް ނެޓްވޯކްކޮށް، ހިޔާލު ބަދަލުކޮށް، ޓްރެވަލް އިންޑަސްޓްރީއަށް ބަދަލު ގެނައުމަށް މަތީ ފަންތީގެ ތަޖުރިބާކާރުންނާއި އީޖާދީވިޔަފާރިވެރިންނާ ގުޅިގެން މަސައްކަތް ކުރެވޭނެ އެވެ.
މިއީ މައިސް ޓޫރިޒަމަށް ހާއްސަ ފެއާއެއް
އެމްއެމްޕީއާރުސީ އިން އޭޓީއެމްގައި ބައިވެރިވުމަކީ މެދުއިރުމަތީގެ މާކެޓުގެ ތެރޭގައި ރާއްޖޭގެ މަގުބޫލުކަން އިތުރުކުރުމަށް އެހީތެރިވެދޭނޭ ކަމެކެވެ. މި ފެއާގައި ބައިވެރިވުމުގެ މައިގަނޑު މަގުސަދަކީމަތީ ފެންވަރުގެ މާރކެޓު ފުޅާކޮށް، ލަގްޒަރީ އަދި "މައިސް" ދާއިރާގެ ފަތުރުވެރިކަން ކުރިއެރުވުމެވެ. އަދި މި ފެއަރގެ ތެރޭގައި މެދުއިރުމަތީގެ ދަތުރުފަތުރުގެ ވިޔަފާރިއާ ގުޅިގެން ސަރަހައްދީ އަދި ދުނިޔޭގެ ޓްރެވަލް ޕާޓްނަރުންނާ އެއްބަޔަކު އަނެއްބަޔަކާ މުއާމަލާތް ކުރުމަށް މަގުފަހިކުރުމުގެ އެތައް ފުރުސަތުތަކެއް ފަހިވެގެންދާނެ އެވެ. މީގެ އިތުރުން އޭޓީއެމް އިން ރާއްޖޭގެ ފަތުރުވެރިކަމުގެ ސިނާއަތުގެ ބައިވެރިންނަށް ރާއްޖޭގެ ތަފާތު އުފެއްދުންތަކާއި ހިދުމަތްތަކާއި ތަޖުރިބާތައް ދައްކާލުމަށް މުހިންމު ޕްލެޓްފޯމެއް ފޯރުކޮށްދޭނެއެވެ. މިކަމުގެ ސަބަބުން، ދިވެހިރާއްޖެއަކީ ދިގު ދަތުރުތަކުގައި ޗުއްޓީ ހޭދަކުރަން ބޭނުންވާ ހުރިހާ ފަރާތްތަކަށް އެންމެ އެދެވޭ މަންޒިލެއްގެ ގޮތުގައި ދެމިއޮންނާނެއެވެ.
ރާއްޖޭން މި އަހަރު ގިނަ ހަރަކާތްތަކެއް
މި އަހަރުގެ އޭޓީއެމް ސްޓޭންޑަށް ޒިޔާރަތްކުރާ ފަރާތްތަކަށް ޓްރެވަލް އިންޑަސްޓްރީގެ ލީޑަރުންނާއި ޕާޓްނަރުންނާއެކު ބައްދަލުވުންތައް ބޭއްވުމުގެ ފުރުސަތު ލިބެ އެވެ. އަދި މި ފެއާގެ ތެރެއިން އެމްއެމްޕީއާރުސީ އިން އިސް ނަގައިގެން ރާއްޖެއާ ގުޅޭ ހާއްސަ މީޑިއާ އިންޓަވިއުތައް ދަނީ ކުރިއަށެވެ. ރާއްޖޭގެ ޕާފޯމަންސްއަށް ހާއްސަކޮށްފައިވާ ސަރަހައްދުން ރާއްޖޭގެ މުއްސަނދި ތަރިކައާއި ސަގާފަތް ޒިޔާރަތްކުރާ ފަރާތްތަކަށް ތަޖުރިބާ ކުރެވެ އެވެ. މިއާއެކު ގޭސްޓްރޮނޮމީ ކައުންޓަރުން ދިވެހި ރަހަތައް ބަލާލުމުގެ ފުރުސަތުތައް ވެސް ލިބެއެވެ. ދިވެހިންގެ ހުނަރު ދައްކުވައިދޭ ލައިވް އާޓް ޑެމޮންސްޓްރޭޝަންތަކާއި، އާޓް ޑިސްޕްލޭތައް މުޅި ސްޓޭންޑްގެ ތެރެއިން ފެނިގެންދެ އެވެ.
ރާއްޖެ ތަމްސީލުކުރާ ސްޓޯލުގެ އިތުރުން، ވިޒިޓް މޯލްޑިވްސްއިން ވެސް އެތަކެއް ހަރަކާތްތަކެއް ބޭއްވުމަށް ހަމަޖެހިފައިވެއެވެ. އެގޮތުން، ދިވެހިރާއްޖޭގެ ވިޒިބިލިޓީ އިތުރުކުރުމުގެ ގޮތުން މި ފެއާ ބާއްވާ ތަނުގެ ދޮރުމަތީގައި ރާއްޖޭގެ އިސްތިހާރު ހިމެނޭގޮތަށް ބްރޭންޑްކޮށްފައިވާ ޓެކްސީ ފެންނާނޭ އިންތިޒާމު ހަމަޖައްސައި މި މާކެޓުގައި ދިވެހިރާއްޖޭގެ އެކްސްޕޯޝާ ފުޅާކުރުމަށް މަސައްްކަތްކުރަމުންދެ އެވެ. އަދި މެދުއިރުމައްޗާއި ބައިނަލްއަގްވާމީ ޓްރެވަލް ޓްރޭޑް ޕާޓްނަރުންނާއި، މީޑިއާގެ މަންދޫބުންނާއި، އިއްޒަތްތެރިންނާއި ސިނާއަތުގެ އެހެން ފަރާތްތައް އެއްތަނަކުން ފެނިގެންދިޔަ މޯލްޑިވިއަން އީވްނިންގް ވަނީ ކާމިޔާބުކަމާއެކު ބާއްވާފައެވެ.
ކޮމެންޓް
Republic of Maldives