އިހަވަންދިއްޕޮޅުން މެރިޓައިމް ހިދުމަތް ހޯދަން ޕެނަމާގެ ބޯޓެއް އަންނަނީ

ބަންކަރިން ހިދުމަތާއެކު އިހަވަންދިއްޕޮޅުގައި މި ސަރުކާރުން ތައާރަފުކުރި މެރިޓައިމް ހިދުމަތްތައް ހޯދުމަށް ޕެނަމާގެ ބޯޓެއް މިއަދު އަންނަ ހަމަޖެހިއްޖެ އެވެ.

ރާއްޖޭގެ މެރިޓައިމް ދާއިރާ އިތުރަށް ފުޅާކުރުމަށް ސަރުކާރުން ފެށި މަސައްކަތުގެ ދަށުން ބަންކަަރިން ހިދުމަތާއެކު އިހަވަންދިއްޕޮޅުގައި 14 ހިދުމަތެއް ތައާރަފުކޮށްފައިވެ އެވެ. އޭގެ ތެރޭގައި ފެން ފޯރުކޮށްދިނުމާއި، ސްޕެއާ ފޯރުކޮށްދިނުމާއި ފަޅުވެރިން ބަދަލުކުރުން ފަދަ ހިދުމަތްތައް ހިމެނެ އެވެ.  

އެކަމަށް ހާއްސަކޮށް އުތުރު މެރިޓައިމް ސާވިސަސްގެ ނަމުގައި ހިދުމަތްތައް ތައާރަފުކޮށް، ހާއްސަ ގޭޓްވޭއެއް ހުޅުވާފައިވެ އެވެ. ސަރުކާރުން އެ ހިދުމަތްތައް ފޯރުކޮށްދިނުން ހަވާލުކުރީ އެމްޕީއެލްއާއެވެ. 

އެމްޕީއެލުން ބުނި ގޮތުަގއި އެ ހިދުމަތްތަކުގެ ތެރެއިން ޕައިލެޓޭޖު ހިދުމަތާއި، ފެން ސަޕްލައި ކުރުމާއި ކްރޫން ބަދަލުކުރުމާއި، ކާބޯތަކެތި ފޯރުކޮށްދިނުމާއި ސްޕެއާ ސަޕްލައިކޮށްދިނުމުގެ ހިދުމަތް ހޯދުމަށް ޕަނަމާގައި ރަޖިސްޓަރީކޮށްފައިވާ ބޯޓެއް މި މަހުގެ 3 ވަނަ ދުވަހު އިހަވަންދިއްޕޮޅަށް ބަދަރުކުރާނެ ކަމަށެވެ.