ހުރިހާ ދިވެހިންނަށް ހިލޭ މެޑިކަލް ޗެކަޕް ހެދޭ ގޮތް ހަމަޖައްސައިފި

އާސަންދައިގެ ދަށުން ހުރިހާ ދިވެހިންނަށް ހިލޭ މެޑިކަލް ޗެކަޕު ހެދޭނެ އިންތިޒާމު ހަމަޖައްސައިފި އެވެ. 

އާސަންދައިން ސޯޝަލް މީޑިއާގައި މިއަދު ޝާއިއުކުރި ޕޯސްޓެއްގައި ބުނެފައިވަނީ މި އަހަރުގެ ޖުލައި މަހުގެ އެއްވަނަ ދުވަހުން ފެށިގެން އާސަންދައިގެ ދަށުން އުމުރުން 19 އަހަރާއި 39 އަހަރާއި ދެމެދުގެ އުމުރުފުރާގެ މީހުންނަށް ހިލޭ މެޑިކަލް ޗެކަޕް ހެދުމުގެ ފުރުސަތު ހުޅުވާލާފައިވާ ކަމަށެވެ. 

މި އަހަރުގެ ޖަނަވަރީ އެއްވަނަ ދުވަހުން ފެށިގެން 50 އަހަރުން މަތީ އުމުރުފުރާގެ މީހުންނަށް ހިލޭ މެޑިކަލް ޗެކަޕު ހެދޭނެ އިންތިޒާމު ހަމަޖައްސާފައިވެ އެވެ. އަދި އޭޕްރީލް އެއްވަނަ ދުވަހުން ފެށިގެން 18 އަހަރުން ދަށުގެ އުމުރުފުރާއާއި، 40 އަހަރުން މަތީގެ އުމުރުފުރާގެ ފަރާތްތަކަށް އާސަންދަ ސްކީމުގެ ދަށުން މެޑިކަލް ޗެޕަކު ހެދޭނެ އިންތިޒާމު ހަމަޖައްސާފައިވެ އެވެ. 

އެހެންކަމުން އުމުރުން 19 އަހަރާއި 39 އަހަރާ ދެމެދުގެ މީހުންނަށް ހިލޭ މެޑިކަލް ޗެކަޕް ހެދޭނެ އިންތިޒާމު ހަމަޖެއްސުމާއެކު މިހާރު ކޮންމެ ދިވެއްސަކަަށްވެސް ހިލޭ މެޑިކަލް ޗެކަޕް ހެދޭނެ އެވެ. 

އާސަންދައިން ހާމަކޮށްފައިވާ ގޮތުގައި ހިލޭ މެޑިކަލް ޗެކަޕް ހެދުމުގެ ފުރުސަތު ހުޅުވައިލުމާއެކު މި އަހަރުގެ ފުރަތަމަ ދެ މަހު އެކަނި 1،200 މީހަކު މެޑިކަލް ޗެކަޕް ހަދާފައިވެ އެވެ.