ނޭނގޭ ހިސާބެއް: ޓޫރިޒަމް އިމްޕޯޓް ކޮވިޑުގެ ކުރިއާ ގާތަށްވެސް ނާދެ

ޓޫރިސްޓުން އިތުރުވެ ޓޫރިޒަމް އެނދުގެ އަދަދު އިތުރުވި ނަމަވެސް، މަތީ ފަންތީގެ ޓޫރިޒަމް ސިނާއަތަށް ބޭނުންވާ މުދާ ރާއްޖެ އިމްޕޯޓް ކުރި މިންވަރު ކޮވިޑު-19 އިގެ ކުރީގައި ހުރި ވަރަށް އަދިވެސް ނުދާ ކަމަށް ދައްކައިފި އެވެ. 

އެމްއެމްއޭ އިން ނެރުނު މައުލޫމާތުތަކެއްގައިވާ ގޮތުން ފަސް އަހަރު ޓޫރިސްޓުން އައި މިންވަރު މަތިވެ ޓޫރިސްޓު ބެޑް ވެސް ވަނީ އިތުރުވެފަ އެވެ. 

ރާއްޖެއަށް 2019 ވަނަ އަހަރު 1,702,887 މިލިއަން ޓޫރިސްޓުން އައި ނަމަވެސް މިދިޔަ އަހަރު ވަނީ 1,878,543 މިލިއަން ޓޫރިސްޓުން އައިސްފަ އެވެ. ރާއްޖޭގެ ޓޫރިޒަމްގައި 2019 ވަނަ އަހަރު 47,274 އެނދު ހުރި ނަމަވެސް މިދިޔަ އަހަރުގެ ނިޔަލަށް ވަނީ އެނދު ހުރި އަދަދު އިތުރުވެފަ އެވެ. އެ ގޮތުން 14,288 އެނދު އިތުރު ވެފައި ވެއެވެ.

ރާއްޖޭގައި 2019 ވަނަ އަހަރު 10.6 މިލިއަން ރޭ ޓޫރިސްޓުން މަޑު ކުރިއިރު މިދިޔަ 2023 ވަނަ އަހަރު ޓޫރިސްޓުން މަޑު ކޮށްފައި ވަނީ 13 މިލިއަން ރެ އެވެ. އަދި 2019 ވަނަ އަހަރު 6.3 ރޭ ރާއްޖޭގައި ޓޫރިސްޓުން މަޑު ކޮށްފައި ވާއިރު މިދިޔަ އަހަރު މަޑުކުރީ 7.6 ރެ އެވެ. 

ފަސް އަހަރު ތެރޭ ރާއްޖޭގެ ޓޫރިޒަމްގެ ބެޑް އިތުރުވި ނަމަވެސް ޓޫރިޒަމަށް މުދާ އެތެރެކުރި މިންވަރު ކޮވިޑް-19 ގެ ކުރީގައި ހުރި މިންވަރަށް އަދިވެސް ނާންނަ ކަމަށް ދައްކަ އެވެ. ޓޫރިޒަމް ސިނާއަތަށް 2019 ވަނަ އަހަރު ވަނީ 753.2 މިލިއަން ޑޮލަރު (11 ބިލިއަން ރުފިޔާ) އިމްޕޯޓް ކޮށްފަ އެވެ. ނަމަވެސް މިދިޔަ އަހަރު ޓޫރިޒަމް އިމްޕޯޓް ހުރީ 515 މިލިއަން ޑޮލަރު (8 ބިލިއަން ރުފިޔާ) ގަ އެވެ. އެހެންވެ މިއީ 220 މިލިއަން ޑޮލަރު މަދު އަދަދެކެވެ.

މިދިޔަ އަހަރު ރާއްޖެއަށް ޖުމްލަ 3.4 ބިލިއަން ޑޮލަރުގެ މުދާ ވަނީ އެތެރެ ކޮށްފަ އެވެ. މި އަދަދު 2019 ވަނަ އަހަރު ހުރީ ތިން ބިލިއަން ޑޮލަރުގަ އެވެ. 

ޓޫރިޒަމް ހިސާބުތައް ދައްކާ ގޮތުގައި ޓޫރިޒަމް ސިނާއަތަށް އާމްދަނީގެ ގޮތުގައި 2019 ވަނަ އަހަރު ލިބިފައި ވަނީ 3.1 ބިލިއަން ޑޮލަރެވެ. ނަމަވެސް މިދިޔަ އަހަރު 4.2 ބިލިއަން ޑޮލަރު ލިބިފައިވެ އެވެ. ނަމަވެސް މިއީ 2022 ވަނަ އަހަރު ލިބުނު ފަސް ބިލިއަން ޑޮލަރާ އަޅާބަލާނަމަ ނިސްބަތުން ދަށް އަދަދެކެވެ.