އުމްރާ ގުރޫޕްތަކަށް ހުއްދައަށް އެދެން ހުޅުވާލައިފި

ރާއްޖެއިން އުމްރާއަށް މީހުން ގެންދިއުމަށް ޝައުގުވެރިވާ ގުރޫޕްތަކަށް ޕްރޮޕޯޒަލް ހުށަހެޅުމުގެ ފުރުސަތު ހުޅުވާލައިފި އެވެ.

އިސްލާމިކް މިނިސްޓްރީން މިއަދު ކުރި އިއުލާނެއްގައި ބުނީ އެ ފުރުސަތު މި މަހުގެ 16 ވަނަ ދުވަހުގެ ނިޔަލަށް ހުޅުވާލާފައިވާ ކަމަށެވެ. 

ޕްރޮޕޯޒަލް ހުށަހެޅޭނީ ރާއްޖެއިން މީހުން އުމްރާއަށް ގެންދިއުމާ ބެހޭގޮތުން ގެޒެޓް ކޮށްފައިވާ "ދިވެހިރާއްޖެއިން އުމްރާއަށް މީހުން ގެންދިއުމާބެހޭ އުސޫލު" ގައި ބުނެފައިވާ ޝަރުތު ފުރިހަމަވާ ކުންފުނި ތަކަށެވެ. ޝަރުތުތަކުގެ ތެރޭގައި ކުންފުނިތަކަކީ ސައްތައިން ސައްތަ ދިވެހި ކުންފުންޏަކަށް ވާން ޖެހެ އެވެ.

ޕްރޮޕޯޒަލް ހުށަހަޅާނީ ސިޓީއުރައެއްގައި ބަންދުކޮށް ސިޓީ އުރައިގެ ބޭރުގައި "ދިވެހިރާއްޖެއިން އުމްރާއަށް މީހުން ގެންދިއުމުގެ ހުއްދައަށް އެދި" މިހެން ލިޔެފަ އެވެ. ޕްރޮޕޯޒަލްތައް ބަލައިގަތުމަށް ހަމަޖެހިފައިވަނީ މެއި 12 ވާ އާދިއްތަ ދުވަހުން ފެށިގެން 16 މޭ ވާ ބުރާސްފަތި ދުވަހުގެ ނިޔަލަށް -- ސަރުކާރު ބަންދު ނޫން ކޮންމެ ދުވަހަކު 9:00 އިން 12:00 އަށް އެ މިނިސްޓްރީގެ ކައުންޓަރުންނެވެ.

ރާއްޖޭން މީހުން އުމްރާއަށް ގެންދިއުމުގެ 50 ކުންފުންޏަކަށް ވަނީ ހުއްދަ ދީފަ އެވެ. އޭގެ ތެރެއިން ހަތަރު ކުންފުންޏެއްގެ މުއްދަތު މިދިޔަ މާޗް މަހު ވަނީ ހަމަވެފަ އެވެ.