ޗައިނާ ޓޫރިސްޓުންގެ އަދަދު 80،000 އަށްވުރެ މައްޗަށް
މިހާރު ޗައިނާއިން ރާއްޖޭގެ ޓޫރިޒަމްގައި 10 ޕަސެންޓް ހިއްސާ އަދާކުރެ އެވެ. މިވަގުތު ދެ ވަނާގައި އޮތީ ރަޝިއާ އެވެ.
ރާއްޖެއަށް މި އަހަރު އައި ޗައިނާ ޓޫރިސްޓުންގެ އަދަދު 80،000 އަށްވުރެ އިތުރުވެ ޓޫރިޒަމަށް ކުރިއެރުން ލިބިއްޖެ އެވެ.
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާ ގޮތުގައި މި އަހަރުގެ މިހާތަނަށް ޗައިނާއިން 81,914 ޓޫރިސްޓުން އައިސްފައިވެ އެވެ. މިހާރު ޗައިނާއަކީ ރާއްޖެ އަންނަ ޓޫރިސްޓުންގެ އެންމެ ބޮޑު ހިއްސާއެއް އޮންނަ ގައުމަށް ވަނީ ވެފަ އެވެ. މިހާރު އެ ގައުމުން ރާއްޖޭގެ ޓޫރިޒަމްގެ 10.7 ޕަސެންޓް ހިއްސާ ވަނީ ނަގާފަ އެވެ.
ޗައިނާ ފިިޔަވައި އެންމެ ގިނައިން ޓޫރިސްޓުން އަންނަ ގައުމެއްގެ ގޮތުގައި އޮތީ ރަޝިއާ އެވެ. އެ ގައުމުން ރާއްޖޭގެ ޓޫރިޒަމްގެ 10 ޕަސެންޓް ހިއްސާ ނަގާފައިވެ އެވެ.
އެންމެ ގިނައިން ޓޫރިސްޓުން އައި ގައުމުތައް
- ޗައިނާ - 81,914
- ރަޝިއާ - 76,138
- ޔޫކޭ - 74,626
- އިޓަލީ - 70,174
- ޖަރުމަނުވިލާތް - 59,093
- އިންޑިއާ - 42,167
- ފްރާންސް - 28,912
- ޔޫއެސްއޭ - 26,726
- ސުވިޒަލޭންޑް - 19,440
- ޕޮލެންޑް - 16,008
ރާއްޖެ އަށް އެންމެ ގިނައިން ޓޫރިސްޓު އައި ގައުމުގެ ގޮތުގައި މިދިޔަ އަހަރު އޮތް އިންޑިއާ މިވަގުތު އޮތީ ހަ ވަނާގަ އެވެ. ނަމަވެސް އެ ގައުމުން އަންނަ މީހުންގެ އަދަދު ވެސް އިތުރުވަމުން އަންނަކަން ފާހަގަވެ އެވެ. މިހާރު އިންޑިއާއިން ރާއްޖެއަށް 42,167 ޓޫރިސްޓުން ވަނީ އައިސްފަ އެވެ.
ޓޫރިޒަމް ތަފާސް ހިސާބުތައް ދައްކާ ގޮތުގައި ރާއްޖެއަށް މިހާތަނަށް 762,125 ޓޫރިސްޓުން އައިސްފައިވެ އެވެ. މިއީ މިދިޔަ އަހަރު އައި 676,975 މީހުންނާ އަޅާބަލާއިރު 12 ޕަސެންޓުގެ އިތުރުވުމެކެވެ.
ކޮމެންޓް
Republic of Maldives