އެޗްޑީސިން އަބަދުވެސް އްޔިތުންނަށް ވީހާވެސް ފަސޭހަ ވާނެހެން ހިދުމަތްތައް ފޯރުކޮށްދޭން ޒަމާނީ ތަރައްގީތައް ގެނެސްދެމުން ގެންދެ އެވެ.
ހުޅުމާލޭގައި މި ޒަމާނުގެ ވަސީލަތްތަކާއެކު ފެންވަރު ރަނގަޅު ވެއާހައުސިން ކޮމްޕްލެކްސް އަޅަން ހަވާލު ކޮށްފި އެވެ.
އޮޓޮމޭޓެޑް ވެއާހައުސް މެނޭޖްމެންޓް ސިސްޓަމްގެ ވަސީލަތްތައް ހިމަނައިގެން ކޮމްޕްލެކްސް އިމާރާތް ކުރަން ދިނީ ހޮންކޮންގުގެ ރޮޓައިމް އިންޖިނިއަރިން އެންޑް ޓެކްނޮލޮޖީ ކޯ ލިމިޓެޑަށެވެ. މި ވެއާހައުސިން ކޮމްޕްލެކްސް އިމާރާތް ކުރުމުގެ އެއްބަސްވުމުގައި އެޗްޑީސީގެ ފަރާތުން ސޮއި ކުރެއްވީ މެނޭޖިން ޑިރެކްޓަރު އިބްރާހިމް ފަޒުލް ރަޝީދެވެ. ރޮޓައިމް އިންޖިނިއަރިން އެންޑް ޓެކްނޮލޮޖީން ސޮއި ކުރެއްވީ މެނޭޖިން ޑިރެކްޓަރު ޒޯ ވެއިޑޮން އެވެ.
އެޗްޑީސީން ހެދި މި އެއްބަސްވުމާއެކު ވެއާހައުސިން ކޮމްޕްލެކްސް އިމާރާތް ދެ އަހަރު ދުވަހުގެ ތެރޭގައި ނިންމަން ޖެހޭނެ އެވެ.
އެޗްޑީސީގެ އެމްޑީ ފަޒުލް ވިދާޅުވީ ޒަމާނީ ވަސީލަތްތަކާއެކު އިމާރާތްކުރާ އެ ކޮމްޕްލެކްސް އަކީ އިންޑަސްޓްރީ އަށް އަންނާނެ އިންގިލާބީ ބަދަލެއް ކަމަށާއި އޭގެ ސަބަބުން ވިޔަފާރިތަކަށް ބޮޑެތި ގިނަ ކުރިއެރުންތައް ލިބިގެން ދާނެ ކަމަށެވެ.
މި ކޮމްޕްލެކްސް އިމާރާތް ކުރާނީ އެކި ބާވަތުގެ މުދާ ރައްކާކުރަން ތަފާތު ޔުނިޓްތައް ހިމަނައިގެނެވެ. ކޯލްޑް ސްޓޯރޭޖާއި އިންޑަސްޓްރިއަލް ވެއާހައުސިން ޔުނިޓާއި ކާނާގެ ބާވަތްތަކާއި ކޮންޒިއުމަބްލް ރައްކާކުރެވޭ ޔުނިޓްތައް ހިމެނެއެވެ. މީގެ އިތުރުން އޮފީސް ޖާގައާއި ޝޯރޫމް ހިމެނޭ އިމާރާތެއް މި ކޮމްޕްލެކެސްގައި ހުންނާނެއެވެ.
ބާވަތްތަކުގެ މުދާ ރައްކާކުރެވޭ ގޮތަށް ފަރުމާކޮށްފައިވާ މި ކޮމްޕްލެކްސް އަކީ ވިޔަފާރިތަކަށް މުދާ ރައްކާކުރުމަށް ލުއި ފަސޭހަ ވަސީލަތަކަށް ވާނެއެވެ. ހާއްސަކޮށް ކުދި އަދި މެދުފަންތީގެ ވިޔަފާރިތަކުގެ މުދާ ރައްކާކުރާނެ އިތުރު ޖާގަ ތަނަވަސްވެ، ވިޔަފާރި ފުޅާކުރެވޭނެ ފުރުސަތު ތަނަވަސް ވާނެ އެވެ.