ފަހި ދިރިއުޅުން ފްލެޓުގެ މުހިންމު ވަސީލަތްތަކަށް ފައިސާ ހަމަޖައްސާފައެއް ނެތް

ފަހި ދިރިއުޅުން ފްލެޓުތަކަށް މީހުން ވަނުމުގެ ކުރިން ގާއިމް ކުރަން ޖެހޭ މުހިންމު ހިދުމަތްތަކަށް ބޭނުންވާ ފައިސާ ކުރީ ސަރުކާރުން ހަމަޖައްސާފައި ނުވާ ކަމަށް ފަހި ދިރިއުޅުން ކުންފުނިން ބުނެފި އެވެ. 

އިންޑިއާ ސަރުކާރުން ބޮޑު ލޯނެއް ނަގައިގެން ހަދަމުން ފެށި 4،000 ފްލެޓުގެ މަސައްކަތުގެ އަޕްޑޭޓެއް ދެއްވަމުން މެނޭޖިން ޑިރެކްޓަރު ހަމްދާން ޝަކީލް ވިދާޅުވީ މި ފްލެޓުތަކުގެ މުހިންމު ހިދުމަތްތަކަަށް ފައިސާ ހަމަޖައްސާފައި ނެތް ކަމަށާ، އެހެންކަމުން ސަރުކާރުގެ ތެރެއިން އެކަމަށް ފައިސާ ވެސް ހޯއްދަވަމުން ގެންދަވާ ކަމަށެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ނިންމި މި މަޝްރޫއުގެ ދާއިރާގައި ޓަވަރުތައް ޕަވާ ގްރިޑާ ގުޅުވައި، ސެކިއުރިޓީ ސިސްޓަމްތަކާއި ޓަވަރުތަކާއި ކުއްޔަށް ދިރިއުޅޭ މީހުނަށް އިންޓަނެޓާއި އެހެނިހެން މީޑިއާ ކަނެކްޝަން ކުރެވޭނެ ޖީޕީއޯއެން ނެޓްވޯކުގެ އިތުރުން ކުނި ނައްތާލުން ފަދަ މުހިއްމު ހިދުމަތްތަކާއި ވަސީލަތްތަކާއި ލޭންޑްސްކޭޕިން މަސައްކަތްތަކަށް ފައިސާ ހަމަޖައްސާފައި ނުވެ އެވެ. މިކަމަށް އިތުރު 454.5 މިލިއަން ބޭނުންވާ ކަމަށާ އެ ފައިސާ ސަރުކާރުން ހޯދުމުގެ މަސައްކަތްވެސް ކުރަމުން އަންނަ ކަމަށް ހަމްދާން ވިދާޅުވި އެވެ.

ފަހި ދިރިއުޅުން ފްލެޓުތަކަކީ އިންޑިއާއިން ދެ ބިލިއަން ރުފިޔާ ލޯނެއް ނަގައިގެން ހަދާ ޓަވަރުތަކެވެ. އެތަންތަން ނިންމަނީ އިންޑިއާގެ ދެ ކުންފުނިންނެވެ. 

ބޭނުންވާ އެ ފައިސާ ހޯދުމަށް މި އިތުރު މަސައްކަތްތަކަށް ފައިނޭންސް ހޯދުމަށް ސަރުކާރާއެކު އެފްޑީސީން ދަނީ މަސައްކަތް ކުރައްވަމުންދާ ކަމަށް ހަމްދާން ވިދާޅުވި އެވެ.

އޭނާ އިތުރަށް ވިދާޅުވީ ފްލެޓަށް ބޭނުންވާ މުހިންމު ވަސީލަތް ގާއިމް ކުރަން ބޭނުންވާ ފައިސާ ނެތް ނަމަވެސް ފްލެޓު ނިންމަން ކުރަން ޖެހޭ މަސައްކަތް އެ ކުންފުނިން ހަލުއި ކަމާއެކު ކުރަމުން ގެންދާ ކަަމަށެވެ. މިގޮތުން ގެނެވުނު ބަދަލާއެކު ފްލެޓުގެ މަސައްކަތް ބޮޑުތަނުން ހަލުއި ކޮށްފައިވާ ކަމަށެވެ.

ހަމްދާން ވިދާޅުވީ އެފްޑީސީން ހުޅުމާލެ ދެވަނަ ފިޔަވަހީގައި އަޅަމުން ގެންދާ 4،000 ފްލެޓުގެ މަސައްކަތް ކުރިއާ އަޅާބަލާއިރު ބޮޑުތަނުން ހަލުއި ކޮށްފައިވާ ކަމަށެވެ. އެގޮތުން ކުރީގެ ވެރިކަމުގައި 22 މަސް ދުވަސް - ގާތްގަނޑަކަށް ދެ އަހަރުން އެޅިފައިވަނީ ޖުމްލަ 216 ސްލެބް ފްލޯ އެވެ.

އެކަމަކު މި ސަރުކާރުން މި ފްލެޓުތަކާ ހަވާލުވެ ހަތަރު މަސްތެރޭ ޖުމްލަ 192 ސްލެބް ނުވަތަ ފްލޯ ހަދާފައިވާ ކަމަށެވެ. ކޮންސްޓްރަކްޝަން ޝެޑިއުލަށް ގެނެސް އޮޕްޓިމައިޒްކޮށް، ވަސީލަތްތަކާއި އެހެނިހެން ހިދުމަތްތަކަށް ގެނެވުނު ބަދަލާއެކު މަހަކު އަޅާ އަދަދު 10 ފްލޯއިން 48 ފްލޯއަށް އިތުރު ކޮށްފައިވާ ކަމަށެވެ.