އަނިޔާވެރި އަމަލަށް އެންމެ ހަރުކަށި ފިޔަވަޅު އެޅިގެންދާކަން ޔަގީން ކުރާނަން: މިނިސްޓަރު

މުޖްތަމައު ގައި އަނިޔާވެރި އަމަލުތައް ހިންގާ ފަރާތްތަކާއި މެދު އެޅެން އޮތް އެއްމެ ހަރުކަށި ފިޔަވަޅު އެޅިގެންދާ ކަން ޔަގީން ކުރައްވާނެ ކަމަަށް ހޯމްލޭންޑް ސެކިއުރިޓީ އެންޑް ޓެކްނޯލޮޖީ މިނިސްޓަރު އަލީ އިހްސާން ވިދާޅުވެއްޖެ އެވެ.

މިނިސްޓަރު މިހެން ވިދާޅުވީ އއ. ރަސްދޫ މިސްކިތެއްގެ ތެރޭ ކުޑަކުއްޖަކަށް ވަރަށް ބޮޑަށް އަނިޔާ ކުރާ މަންޒަރު ފެންނަ ވީޑިއޯއެއް އާންމުވެ އެ މައްސަލަ ބަލަން ގިނަ ބަޔަކު ގޮވާލަމުން ދަނިކޮށެވެ.

މިނިސްޓަރު ވިދާޅުވީ ކުޑަކުއްޖާ އަށް އަނިޔާކުރި ކަމަށް ތުހުމަތު ކުރެވޭ 14 އަހަރުގެ ކުއްޖަކާއި 13 އަހަރުގެ ކުއްޖަކު ފުލުހުންގެ މަސައްކަތުން ވަނީ ދެނެގަނެވިފައެވެ. އަދި މި މައްސަލާ ގައި ގާނޫނީ ގޮތުން ދެން ކުރަން ޖެހޭ ކަންކަން ފުލުހުން ދަނީ ކުރަމުން ކަމަށް ވެސް ވިދާޅުވި އެވެ.

"މިފަދަ ކަންކަން މުޖުތަމައު ގައި ހިންގާ ފަރާތްތަކާއި މެދު އެޅެން އޮތް އެންމެ ހަރުކަށި ފިޔަވަޅު އެޅިގެންދާ ކަން ޔަގީން ކުރާނަން،" މިނިސްޓަރު ވިދާޅުވި އެވެ.

ފުލުހުން ބުނެފައިވަނީ ސޯޝަލް މީޑިއާގައި ދައުރުވަމުންދާ، ކުޑަ ކުއްޖަކަށް ބިރުދައްކައި އަނިޔާ ކުރާ މަންޒަރު ފެންނަ ވީޑިއޯ ފުލުހުންގެ ސަމާލުކަމަށް އައުމާ ގުޅިގެން އެ މައްސަލަ ފުލުހުން ގެންދަނީ ސީރިއަސް މައްސަލައެއްގެ ގޮތުގައި ތަހުގީގު ކުރަމުން ކަމަށާ މިހާތަނަށް ފުލުހުން ކުރި މަސައްކަތުން އެކަން ކުރިކަމަށް ތުހުމަތު ކުރެވޭ ކުދިން ވަނީ ދެނެގަނެވިފައި ކަމަށެވެ. އެއީ 13 އަހަރު އަދި 14 އަހަރުގެ ދެ ކުދިން ކަމަށް ވެސް ބުންޏެވެ.

"މި ވީޑިއޯ އިން ފެންނަ މަންޒަރު ތަކަކީ ބަލަން އުނދަގޫ އަދި ކުޑަ ކުއްޖާގެ ކަރާމާތަށް އުނިކަން އަންނާނެފަދަ މަންޒަރު ތަކަކަށް ވުމާއެކު މި ވީޑިއޯ އެކަކު އަނެކަކަށް ހިއްސާކޮށް ސޯޝަލް މީޑިއާގައި ސަރކިއުލޭޓް ނުކުރުމަށް ދަންނަވަން،"

އަދި ބުނީ އަނިޔާ ލިބުނު ކުއްޖާއަށް ބޭނުންވާ ސައިކޯ ސޯޝަލް ސަޕޯޓް ފޯރުކޮށްދިނުމުގެ މަސައްކަތް ކަމާ ގުޅުންހުރި އިދާރާތަކާ ގުޅިގެން ކުރަމުންދާ ކަަމަށެވެ.

އަނިޔާކުރީ ރަސްދޫ ދެ ކުދީންނެވެ. އަނިޔާވީ މަތިވެރި ކުއްޖަކަށެވެ. ކުއްޖާގެ މަންމަ އަކީ ރަސްދޫ މީހެކެވެ.

މި ހާދިސާ ހިނގީ ރޭ ތަރީވީސް ނަމާދު ވަގުތު އެވެ. އެކަން އެނގޭ މީހަކު ބުނީ ކުއްޖާ ދަމާ ނެރެ އަނިޔާ ކުރީ ތަރާވީސް ނަމާދަށް ހުއްޓާ ކަމަށެވެ. އަނިޔާކުރުމަށް ފަހު އެކަން ސިއްރު ކުރަން އެންގުމުން ކުއްޖާ އެ ވާހަކަ އޮތީ ސިއްރުކޮށްފަ އެވެ. އާއިލާ އަަށް އެކަން އެނގުނީ ވީޑިއޯ އާންމުވުމުންނެވެ.

ވީޑިއޯ ގައި ފެންނަނީ މިސްކިތުގެ ވުލޫކުރާ ބަޔަަށް ކުއްޖާ ގެންގޮސް ވަރަށް ބޮޑަށް އަނިޔާކުރާ މަންޒަރެވެ. އެ ކުއްޖާއަށް ރަބަރުގަނޑާއެކު އެއްޗެއް ކާން މަޖުބޫރު ކުރުވައެވެ. އެ ނުކެއުމުން ވަރަަށް ބާރަށް އަތާއި ފައިން އެ ކުއްޖާއަށް ހަމަލާދީ އަނިޔާ ކުރެ އެވެ.

އަދި ކުއްޖާއަށް ހުތުރުބަހުން މުހާތަބުކޮށް ތަޅުން މަތީ އިށީންނަށް މަޖުބޫރު ކުރުވައެވެ. އަދި ކުޑަކަކޫ ޖަހާ އާދޭސް ކުރުމަށް އަންގަ އެވެ. ކުއްޖާ ބިރުން ހުރެ ކުޑަކަކޫ ޖެހުމުން ބޯމަތީ ފައިން ވަރަށް ބާރަށް ޖަހަ އެވެ. މުޅި ވީޑިއޯގައި 16 ފަހަރު އެ ކުއްޖާގެ ގައިގައި އަތާއި ފައިން ވަރަށް ބާރަށް ޖަހާ މަންޒަރު ފެނެ އެވެ.

ކުއްޖާގެ މޫނު މަތީ ވަރަށް ބާރަށް އެތައް ފަހަރަކު ޖަހަ އެވެ. ކުއްޖާއަށް އަނިޔާ ކުރުން އެ މީހުން ހުއްޓާލަނީ މިސްކިތުގައި ކުރަމުން ދިޔަ ނަމާދު ނިމި އިމާމު ސަލާމް ދޭ އަޑުއިވުމުންނެވެ.