"ހާމަ ކުރައްވާ އެ ވަޒީފާ ދިން މީހުންގެ އަދަދު. ނުކުރާ ކަމަށް ވަންޏާ ރައްޔިތުންގެ މަޖިލީހުގެ ތެރެއިން އަޅުގަނޑުމެން ޖަވާބުދާރީ ކުރުވާނަން. އަޅަން ޖެހޭ ފިޔަވަޅު އަޅުގަނޑުމެން އަޅާނަން،"
ސަރުކާރުގެ ސިޔަސީ މަގާމުތަކުގެ އަދަދު ހާމަނުކޮށްފިނަމަ އަޅަން ޖެހޭ ފިޔަވަޅު އަޅާނެ ކަމުގެ އިންޒާރު ކުރީގެ ރައީސް / އެމްޑީޕީގެ އެޑްވައިޒަރު އިބްރާހިމް މުހައްމަދު ސޯލިހް މިރޭ ދެއްވައިފި އެވެ.
އައްޑޫ ސިޓީގެ ދާއިރާތަކަށް އެމްޑީޕީގެ ޓިކެޓް ގައި ވާދަކުރާ ކެންޑިޑޭޓުންގެ ކެމްޕެއިން ރެލީއެއްގައި މިރޭ ވާހަކަ ދައްކަވަމުން ރައީސް ސޯލިހް ވިދާޅުވީ މި ސަރުކާރުން ސިޔާސީ މަގާމުތަކުގެ އަދަދު ސިއްރު ކުރަމުންދާ ކަމަށެވެ. ސަރުކާރުގެ ސިޔާސީ މަގާމުތަކުގެ އަދަދު 1500 އިން މައްޗަށް އަރާފައިވާ ކަމަށް ވިދާޅުވި އެވެ.
އަދި ވިދާޅުވީ ސިޔާސީ މަގާމުތަކުގެ އަދަދު ހާމަކުރަން މި ސަރުކާރަށް ނުކުރޭނެ ކަމަށެވެ. މަޖިލީސް ހުޅުވުމަށް ބޭއްވި ޖަލްސާ ގައި އިއްވެވި ރިޔާސީ ބަޔާނުގައި ކޮންމެހެން ބޭނުންވެގެން ނޫނީ ދެން މަގާމަކަށް މީހަކު ނުނަގާނެ ކަމަށް ރައީސް މުއިއްޒު ވައުދުވެވަޑައިގެންފައިވާ ކަމަށާ ނަމަވެސް އޭގެ ފަހުން ވެސް ހުއްޓުމެއް ނެތި މަގާމުތަކަށް މީހުން ނަގަމުންދާ ކަމަށެވެ.
އެއީ ރައްޔިތުންގެ ފައިސާ ކަމަށާ ސިޔާސީ މަގާމުތަކުގެ އަދަދު ސިއްރު ނުކުރެވޭނެ ކަމަށެވެ.
"ހާމަ ކުރައްވާ އެ ވަޒީފާ ދިން މީހުންގެ އަދަދު. ނުކުރާ ކަމަށް ވަންޏާ ރައްޔިތުންގެ މަޖިލީހުގެ ތެރެއިން އަޅުގަނޑުމެން ޖަވާބުދާރީ ކުރުވާނަން. އަޅަން ޖެހޭ ފިޔަވަޅު އަޅުގަނޑުމެން އަޅާނަން،"
ސޯލިހް ވިދާޅުވީ މަޖިލީސް އިންތިހާބުގެ ކުރީން އެ މައުލޫމާތު ހާމަ ކުރަން މި ސަރުކާރަށް ނުކުރެވޭނެ ކަމަށެވެ. އެމަނިކުފާނު ވިދާޅުވީ ވެރިކަމަށް ވަޑައިގެން ފެނަކަ ބަގުރޫޓް ވެފައިވާ ކަމަށް ވިދާޅުވުމަށް ފަހު ބައެއް މުވައްޒިފުން ވަޒީފާ އިން ވަކިކޮށްފައިވާ ކަމަށާ ނަމަވެސް އެގޮތަށް ވަކިކުރި ކޮންމެ މީހަކަށް ދެ މީހަކު ވަޒީފާއަށް ވައްދާފައިވާ ކަމަށެވެ.
ސޯލިހް ވިދާޅުވީ ރައީސް މުއިއްޒު ވެރިކަމަށް ވަޑައިގެންނެވީ ވައުދުތަކެއްވެވަޑައިގެން ކަަމަށާ ނަމަވެސް އެއީ ވެރިކަމަށް ވަޑަައިގަތުމަށް ހެއްދެވި ދޮގުތަކެއް ކަން ރައްޔިތުން ގަބޫލު ކުރާ ކަމަށެވެ.
އަދި މިއަދު ނިކުންނަވާ މަޖިލީސް އިންތިހާބު ކާމިޔާބު ކުރުމަށް ދޮގު މައްޗަށް ދޮގު ހަދާ އޮޅުވާލައްވަމުން ގެންދަވާ ކަމަށެވެ. އަދި ވިދާޅުވީ އެކަން ހުއްޓުވަން ޖެހޭ ކަަމަށެވެ. ބަޖެޓަށް ލިބޭ ފައިސާގެ އަދަދާއި އެ ހަރަދު ކުރާ ގޮތާއި ސިޔާސީ މަގާމުތަކުގެ އަދަދުތަކާއި މެދު ސުވާލު ކުރަން ޖެހޭ ކަމަށް ވިދާޅުވި އެވެ.
"ވެރިކަމަށް އައުމަށްޓަކާ ރައީސް ޑރ މުއިއްޒު ވައުދުތަކެއް ވި. މިއަދު އަޅުގަނޑުމެންނަށް އެނގެނީ ރައްޔިތުން ގިނަ ބަޔަކު ގަބޫލު ކުރަނީ އެއީ ހަމަ ހެދި ބޮޑު ދޮގުތަކެއް ކަމަށް. އެއަކާ ދޭތެރޭ މިހާރަކު ޝައްކު ކުރާ އެއްވެސް މީހަކު ރާއްޖެ އަކު ނޫޅެ،" ރައީސް ސޯލިހް ވިދާޅުވި އެވެ.
މީނައަށް އެޅޭނީކޮން ފިޔަވަޅެއް ހަމަހިނިއަންނަނީ