އައިމަން ވިދާޅުވީ ސަރުކާރަށް ގޮނޑި ކަށަވަރު ކުރުމަށް އިންތިހާބު ގައި ފަހަތަށް ޖެހި ފަރުހަތަށް ތާއީދު ކުރަން ނިންމާފައިވާ ކަމަށެވެ.
ކުޅުދުއްފުށީ ދެކުނު ދާއިރާ އަށް އަމިއްލަ ގޮތުން ވާދަކުރާ އައިމަން މުހައްމަދު ޕީއެންސީގެ ކެންޑިޑޭޓް ފަރުހަތު މުހައްމަދު (ފަރޭ) އަށް ތާއީދު ކުރަން ނިންމައިފި އެވެ.
އައިމަންއާ ފަރުހަތަކީ އެއްބަނޑު އެއްބަފާ ދެ މީހުންނެވެ. ޕީއެންސީގެ ޓިކެޓް ހޯދުމަށް ދެ މީހުން ވެސް ޕާޓީގެ ޕްރައިމަރީގައި ވާދަ ކުރި އެވެ. އައިމަން ބަލިވީ ހަތް ވޯޓުންނެވެ.
ނަމަވެސް އައިމަން ނިންމީ އަމިއްލަ ގޮތުން އިންތިހާބުގައި ވާދަ ކުރާށެވެ. ސަރުކާރުގެ ނުފޫޒު ގަދަ ބޭފުޅުން އައިމަން އަށް ތާއީދު ވެސް ކުރި އެވެ. މިނިސްޓަރުން ވެސް އައިމަންގެ ކެމްޕެއިނަށް ވަޑައިގަތެވެ.
ކުޅުދުއްފުށި ސިޓީގައި ޒުވާނުންގެ މެދުގައި ވަރަށް މަގުބޫލު އައިމަން، އިންތިހާބު ގައި ފަހަތަށް ޖެހޭކަން ހާމަ ކޮށްފައި ވަނީ ދެ ކެންޑިޑޭޓުން ވާދަކޮށް އެއްވެސް ދާއިރާއެއްގެ ގޮނޑި ގެއްލެން ފުރުސަތު ނުދިނުމަށް ޕީއެންސީގެ ރައީސް އަދި ކޯލިޝަން ލީޑަރު، ރައީސް ޑރ. މުހައްމަދު މުއިއްޒު ގޮވާލެއްވުމުންނެވެ. އައިމަން ވިދާޅުވީ ސަރުކާރަށް ގޮނޑި ކަށަވަރު ކުރުމަށް އިންތިހާބު ގައި ފަހަތަށް ޖެހި ފަރުހަތަށް ތާއީދު ކުރަން ނިންމާފައިވާ ކަމަށެވެ.
އެ ދާއިރާއަށް ދެން ވާދަކުރަނީ ކުރީގެ ޓޫރިޒަމް މިނިސްޓަރު އަލީ ވަހީދެވެ. އަލީ ވަހީދު ވާދަ ކުރަނީ އެމްޑީޕީގެ ޓިކެޓް ގައެވެ. ކުރީން ކުރެވުނު ޖިންސީ ގޯނާގެ ތުހުމަތުގެ މައްސަލައާ ގުޅިގެން ހިންގި ތަހުގީގަށް ނެގި ބައެއް ބަޔާންތައް ލީކުވެ އަލީގެ ކެމްޕެއިނަށް ވަނީ ވަރަށް ބޮޑަށް ހިޔަނި އެޅިފައެވެ.