އުތުރު ތިލަފަޅުން ބިން ހިއްކައިގެން ދަނޑުވެރިކަމުގެ މަޝްރޫއެއް ހިންގަން ހަވާލުކުރީ ޗައިނާ ހާބާ އިންޖިނިއަރިން ކޮމްޕެނީ ލިމިޓެޑާ އެވެ.
ޗައިނާގެ ކުންފުންޏަކަށް ދީގެން އުތުރުތިލަފަޅުގައި ހިންގަން ނިންމާފައިވާ ދަނޑުވެރިކަމުގެ މަޝްރޫއު ވެގެން ދާނީ އާދަޔާހިލާފު ބޮޑު މަޝްރޫއަކަށް ކަމަށް ރާއްޖޭގެ އިކޮނޮމިކް މިނިސްޓަރު މުހައްމަދު ސައީދު ވިދާޅު ވެއްޖެ އެވެ.
ސައީދު މި މޭރުމުން ވާހަކަފުޅު ދެއްކެވީ ދަނޑުވެރި އެ މަޝްރޫއުގެ އެއްބަސްވުން ބާތިލު ކުރާނެ ކަމަށް އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެ އެއީ ޗައިނާއިން އަސްކަރީ މަސައްކަތް ކުރާނެ ޕްރޮޖެކްޓެއް ކަމަށް ތުހުމަތުތައް ކުރެއްވުމުންނެވެ.
ސައީދު ވިދާޅުވީ އުތުރުތިލަފަޅުގައި ތަރައްގީ ކުރާ އެގްރިކަލް ޒޯނަކީ ބޮޑު އަދި އާދަޔާހިލާފު ވުމުގެ އިތުރުން ޓެކްނޮލޮޖީން މުއްސަނަދިކަން ހިމެނޭ މަޝްރޫއެއް ކަމަށެވެ. އެމްޑީޕީއަށް ވެރިކަން ކުރަން ލިބޭ ކޮންމެ ފަހަރަކު ކުރާނެ ކަމަކީ ގައުމު ބަންގުރޫޓް ކޮށްލުން ކަމަށެވެ.
"ވެރިކަންކުރަން ފަސް އަހަރު ސްޕަމެޖޯރިޓީއާއެކު ލިބުނު. އާހިރު ނަތީޖާއަކީ ގައުމު ބަނގުރޫޓް ކޮށްލުން!." ސައީދު ވިދާޅުވި އެވެ.
އުތުރު ތިލަފަޅުން ބިން ހިއްކައިގެން ދަނޑުވެރިކަމުގެ މަޝްރޫއެއް ހިންގަން ހަވާލުކުރީ ޗައިނާ ހާބާ އިންޖިނިއަރިން ކޮމްޕެނީ ލިމިޓެޑާ އެވެ. އެ އެއްބަސްވުމުގައި ސޮއި ކުރީ މިދިޔަ މަހުގެ 29 ގަ އެވެ. އުތުރު ތިލަފަޅުގެ އެގްރި ޒޯންގައި ފުޑް ސެކިއުރިޓީ އިތުރުކުރަން މަސައްކަތް ކުރާނެ އެވެ.