އާންމުންނަށް އިތުރު ލުޔެއް؛ ޓަނަކަށް ނަގާ 750ރ، 500ރ އަށް ކުޑަ ކުރަނީ

ވެމްކޯ ޓްރާސްފާ ސްޓޭޝަންތަކުން ނަގާ ފީ ކުޑަ ކުރުމުގެ މަސައްކަތުގެ ދަށުން އާންމުންގެ ކުނި އުކާލުމުގެ އަގު އިތުރަށް ކުޑަ ކުރަން ނިންމާފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިރޭ އިއުލާނު ކުރައްވައިފި އެވެ.

ކެމްޕެއިން ހަރަކާތެއް ގައި ވާހަކަފުޅު ދައްކަވަމުން ރައީސް ވިދާޅުވީ އެމަނިކުފާނުގެ އެންމެ ބޮޑު އަމާޒަކީ ހުރިހާ ގޮތަކުން ވެސް ރައްޔިތުންނަށް ލުއި ފަސޭހަ ހޯދާ ދިނުން ކަމަށެވެ. ހާއްސަކޮށް އެކި ކަންކަމަށް ރައްޔިތުން ކުރަން ޖެހޭ ހޭދަ ކުޑަކުރުން ކަމަށް ވިދާޅުވި އެވެ.

އެގޮތުން ކުނި އުކާލުމަށް ބޮޑު ހަރަދެއް ކުރަން ޖެހުމަކީ އާންމުންގެ ވަރަށް ބޮޑު ޝަކުވާއަކާއި ކަންބޮޑުވުމެއް ކަމަށް ވިދާޅުވި އެވެ. މިހާރު ރޭޓުން ކުނި އުކާލަން ޓަނަކަށް 750 ރުފިޔާ ހަރަދު ކުރަން ޖެހޭ ޖެހުމަކީ ބޮޑު އަދަދެއް ކަމަށް ރައީސް ވިދާޅުވި އެވެ. އެހެން ކަމުން އެ އަގު ކުޑަ ކުރުމަށް ވެމްކޯގެ ވެރީންނާއި ކަމާގުޅޭ މިނިސްޓްރީގެ އިސް ވެރީންނާއި މަޝްވަރާކޮށް ނިންމުންތަކެއް ނިންމާފައިވާ ކަމަށް ރައީސް ވިދާޅުވި އެވެ.

"ޓަނަކަށް މިނަގާ 750 ރުފިޔާ 500 ރުފިޔާއަށް ސަރުކާރުން ކުޑަކޮށް ދޭނަން،"

ރައީސް ވިދާޅުވީ އެ ނިންމުން ވެމްކޯ އިން ވަރަށް އަވަހަށް އިއުލާނު ކުރާނެ ކަމަށެވެ. މާލެ ސަރަހައްދުގައި އުފެދޭ ކުންފުނި އުކާލުމަށް ޓްރާސްފާ ސްޓޭޝަންތަކުގެ ކުރީން ނަގަމުން އައީ ޓަނަކަށް 1،060 ރުފިޔާ އެވެ.