އަލަށް އަޅާ އެއާޕޯޓްތަކާއެކު ރާއްޖޭގެ އެއާޕޯޓުގެ އަދަދު 35 އަށް

ލާމު އަތޮޅުގައި އިތުރު އެއާޕޯޓެއް ތަރައްގީ ކުރުމުގެ އިތުރުން އިތުރު ނުވަ އެއާޕޯޓެއް އަޅަން ރައީސުލް ޖުމްހޫރިއްޔާގެ ގަރާރަކުން ނިންމައި ލިސްޓަށް އިތުރު ރަށްތަކެއް އިތުރު ކުރައްވާފަ އެވެ. މި އެއާޕޯޓްތަކާއެކު މިހާރު ހުރި އެއާޕޯޓްތައް ހިމެނުމުން ރާއްޖޭގެ ޑޮމެސްޓިކް އަދި އިންޓަނޭޝަނަލް އެއާޕޯޓްތަކުގެ އަދަދު 35 އަށް އިތުރު ވެގެންދާނެ އެވެ. 

ދައުލަތުގެ އާންމު މަންފާއަކަށް ޓަކައި ހާސިލުކުރަން ބޭނުންވާ އިގްތިސާދީ ސިޔާސަތެއްގެ ދަށުން ހިންގާނޭ މުހިންމު މަޝްރޫޢުތައް ކަނޑައެޅުމަށް އެކަށައެޅި ރައީސުލްޖުމްހޫރިއްޔާގެ ޤަރާރު ނަންބަރު 2023/6 އިސްލާހުކޮށް ވަނީ އިތުރު ރަށްތަކެއް އިތުރުކޮށް އާ ލިސްޓެއް ނެރެފަ އެވެ. މި ލިސްޓުގައި ގިނަ އަދަދެއްގެ އާ އެއާޕޯޓް އަޅަން ނިންމަވާފައިވެ އެވެ. 

ރައީސުލް ޖުމްހޫރިއްޔާގެ ގަރާރުގައި ހިމަނުއްވާފައިވާ މި ލިސްޓުގައި ރާއްޖޭގެ ނުވަ ސަރަހައްދެއްގައި އެއާޕޯޓްތައް ތަރައްގީ ކުރަން ހިމަނާފައިވެ އެވެ. މި މަޝްރޫއަށް ހަރަދު ކުރަން ޖެހޭ އެންމެ ކުޑަ އިންވެސްޓްމަންޓެއްގެ ގޮތުގައި ކަނޑައަޅުއްވާފައިވަނީ 4 މިލިއަން ޑޮލަރާއި 10 މިލިއަން ޑޮލަރާ ދެމެދުގެ އަދަދެކެވެ. 

ފެށިފަ އެއާޕޯޓްތައް ނިންމަން - މީގެ އިތުރުން މިހާރު މަސައްކަތް ފެށިފައިވާ ހދ. މަކުނުދޫ އާއި މ. މުލި އަދި ބ. ތުޅާދޫއާއި ރ. ފައިނު އަދި ށ. ވިލެއްފަހީގެ އިތުރުން ތ. ވިލުފުށީ އެއާޕޯޓް މަސައްކަތް ނިންމުން ވެސް މި ގަރާރުގައި ކަނޑައަޅާފައިވެ އެވެ. މި މަސައްކަތްތަކަށް އިންވެސްޓް ކުރަން ކަނޑައަޅާފައިވާ ކުޑަ އަގަކީ ހަތަރު މިލިއަން ޑޮލަރެވެ. މީގެ ގިނަ އެއާޕޯޓް ތަރައްގީ ހަމައެކަނި ބިން ހިއްކަން ފެށުން ނޫން މަސައްކަތެއް ނުކޮށް ހުރި ތަންތަނެވެ. މުޅި މި މަޝްރޫއުވެސް އޮތީ ބަޖެޓަށް ބުރަ ބޮޑުވާ ގޮތަށެވެ. 

މި އެއާޕޯޓް ތަރައްގީ ނިމިދިޔަ ރިޔާސީ އިންތިހާބުގެ ތެރޭގައި މި ރަށްރަށަށް ރައީސް ޑރ. މުހައްމަދު މުއިއްޒު ކުރެއްވި ދަތުރުފުޅުތަކުގައި އެއާޕޯޓް އަޅަން ވައުދުވެވަޑައިގަތް ރަށްތަކެކެވެ. މިގޮތުން ގއ. ވިލިނގިލީ އިންޓަނޭޝަނަލް އެއާޕޯޓާއި ތިނަދޫ އިންޓަނޭޝަނަލް އެއާޕޯޓް ވެސް ހިމެނެ އެވެ. 

ރައީސްގެ ގަރާގަށް އިތުރުކުރި ރަށްތަކުގެ ލިސްޓުން އެންމެ ފާހަގަކޮށްލެވެނީ ލ. އަތޮޅުގައި އިތުރު އެއާޕޯޓެއް އެޅުމުގެ އިތުރުން ހައްދުމަތީ އައްސޭރި ޓޫރިޒަމް މަޝްރޫއެވެ. ލ. ގަމުގައި ހިންގާ ހައްދުންމަތީ އައްސޭރި ޓޫރިޒަމް މަޝްރޫ އަށް ހަރަދު ކުރަން ޖެހޭނެ އެންމެ ކުޑަ މިންވަރަކީ ހަތް މިލިއަން ޑޮލަރެވެ. ހައްދުންމަތީގައި އެއާޕޯޓު އަޅާނެ ސަރަހައްދެއް އަދި ފާހަގަކޮށްފައެއް ނެތެވެ. މިކަން ކުރަން ޖެހެނީ ސަރުކާރުން ކަނޑައަޅާ ރަށެއްގަ އެވެ. 

ރައީސުލް ޖުމްހޫރިއްޔާގެ ގަރާނުގައި ހިމަނުއްވާފައިވާ އާ އެއާޕޯޓްތަކާއި މިހާރު ރާއްޖޭގައި ހިންގާ 18 އެއާޕޯޓާއި އަލަށް ތަރައްގީ ކުރާ ނުވަ އެއާޕޯޓް އަދި އަޅަމުން ގެންދާ ހަ އެއާޕޯޓާއެކު ޖުމްލަ އެއާޕޯޓުގެ އަދަދު 35 އަށް އިތުރުވާނެ އެވެ. ސަރުކާރުގެ އަމާޒަކީ ކޮންމެ ރަށަކުން ވެސް 20 މިނެޓުން ދެވޭ ރާސްތާގައި އެއާޕޯޓެއް ތަރައްގީ ކުރުމެވެ.