ޣައްސާން 241 ކޮމިޓީ އަށް ހާޒިރު ކުރަނީ

ޑިފެންސް މިނިސްޓަރު މުހައްމަދު ޣައްސާން މައުމޫން، މަޖިލީހުގެ ސަލާމަތީ ހިދުމަތްތަކާ ބެހޭ ކޮމެޓީ -- 241 ކޮމެޓީއަށް ހާޒިރު ކުރަން އެ ކޮމެޓީން ނިންމައިފި އެވެ.

ޣައްސާން، ކޮމެޓީއަށް ހާޒިރު ކުުރުމަށް ހުށައެޅުއްވީ ހެންވޭރު ހުޅަނގު ދާއިރާގެ މެންބަރު ހަސަން ލަތީފެވެ. ހަސަން އެެގޮތަށް ހުށައެޅުއްވީ ކުރީގެ ރައީސް މުހައްމަދު ނަޝީދު އަވަހާރަ ކޮށްލަން ދިން ބޮމުގެ ހަމަލާއާ ގުޅޭ އިތުރު މައުލޫމާތު ލިބިފައިވާ ކަމަށް މަޖިލީހުގެ އިއްޔެގެ ޖަލްސާގައި ވިދާޅުވުމާއި ގުޅިގެން އެ މައުލޫމާތު ސާފު ކުރެއްވުމަށެވެ.

މީގެ އިތުރުން ރާއްޖޭގެ ކަނޑުގެ ސަރަހައްދު އަމިއްލައަށް ބެލެހެއްޓުމަށް ދިވެހި އަސްކަރިއްޔާއަށް ސަރުކާރުން ހޯދައިދިން އެންމެ ޒަމާނީ ޑްރޯންތައް ގަތް އަގު ސާފު ކުރުން ވެސް ޣައްސާން ހާޒިރު ކުރަން ހުށައަޅާ ސަބަބުތަކުގެ ތެރޭގައި ހަސަން ހިމެނުއްވި އެވެ. އޭނާ ވިދާޅުވި ގޮތުގައި އެ މައުލޫމާތު 241 ކޮމެޓީގެ ސިއްރު ބައްދަލްވުމެއް ގައި ހާމަ ކުރައްވާނެ ކަމަށް މިނިސްޓަރު ޣައްސާން ވަނީ ވިދާޅުވެފައެވެ. އެ މައުލޫމާތު ހޯދަން ޖެހޭ ކަމަށް ވިދާޅުވި އެވެ.

ކޮމެޓީއަށް ހަސަން ހުށައެޅުއްވި އެ ހުށައެޅުއްވުން ކޮމެޓީ މެންބަރުން ވަނީ ފާސްކޮށްފައެވެ. ކޮމެޓީން ފާސް ކުރީ ކުރިއަށް އޮތް ފަސް ދުވަހުގެ ތެރޭގައި ޣައްސާން އެ ކޮމެޓީއަށް ހާޒިރުކޮށް މައުލޫމާތު ހޯދުމަށެވެ.