ހޮޓާ ވިޔަފާރީގައި މަޝްހޫރުކަން ހޯދި ދަނބުމާ ފާއިޒު ނިޔާވެއްޖެ

ސައި ހޮޓާ ވިޔަފާރީގައި މަޝްހޫރުކަން ހޯދި މުހައްމަދު ފާއިޒު (ދަނބުމާ ފާއިޒު) ނިޔާވެއްޖެ އެވެ.

ފާއިޒު ނިޔާވީ މިއަދު އެވެ. ނިޔާވިއިރު އުމުރަކީ 81 އަހަރެވެ.

ފާއިޒުގެ މައްޗަށް ކަށުނަމާދު ކުރުން އޮތީ މިރޭގެ ތަރާވީހު ނަމާދަށް ފަހު 8:30 ގައި ހުޅުމާލެ މަސްޖިދު ޒައިދު ބިން ޘާބިތު (ހުޅުމާލެ ސަހަރާ މިސްކިތް) ގައެވެ.

މާލޭގައި ސައިހޮޓާ ވިޔަފާރީގައި އެންމެ ބޮޑު މަޝްހޫރު ކަމެއް ހޯދި އެކަކީ ފާއިޒު އެވެ. 1970 ގެ އަހަރުތަކުގައި މާފަންނުކޮޅު ގައި "ފިޒާ ނައިޓް" ނަމުގައި ފާއިޒު ހިންގި ރެސްޓޯރަންޓަކީ އެ ދުވަސްވަރު އެންމެ މަޝްހޫރު ރެސްޓޯރަންޓެވެ.

ބާޒާރުމަތީގައި ވެސް ސައި ވިއްކުމުގައި ފާއިޒު ވަނީ އަހަރުތަކެއް ހޭދަކޮށްފައެވެ. އޭނާ އަކީ ބާޒާރުމަތީ އެންމެ ނަން މަޝްހޫރު އެކަކެވެ. ފަހުން ފަރީދީމަގު ގައި "ދަނބުމާ ހޮޓާ" ނަމުގައި ހިންގި ހޮޓަލަކީ ވެސް މާލޭ ގައި އެންމެ މަޝްހޫރު ވި އެއް ހޮޓަލެވެ.