ތިލަމާލެ ބްރިޖު އަޅާތާ ތިން އަހަރު | ނިމުނީ 35 ޕަސެންޓް
ބްރިޖަކީ 500 މިލިއަން ޑޮލަރުގެ ލޯނަކުން އަޅާ ބްރިޖެކެވެ، ބްރިޖު އަޅަނީ އިންޑިއާގެ އެފްކޮންސް ކުންފުނިންނެވެ.
އިންޑިއާގެ އެފްކޮންސް ކުންފުނި އަޅަމުން ގެންދާ ތިލަމާލެ ބްރިޖުގެ މަސައްކަތް މިވަގުތު ހުރީ ތާވަލަށްވުރެ އެއް ޕަސެންޓް ކުރީގައި ހުރިއިރު މިހާތަނަށް ނިމިފައިވަނީ 35 ޕަސެންޓް ކަމަށް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތޮލިބު ވިދާޅުވެއްޖެ އެވެ.
ޗައިނާއިން ދެ އަހަރުތެރޭ ނިންމި ސިނަމާލެ ބްރިޖުގެ މަރާމާތުގެ މަސައްކަތް ހަވާލު ކުރަން ބޭއްވި ރަސްމިއްޔާތުގައި އިންފްރާސްޓްރަކްޗާ މިނިސްޓަރު މުއްތޮލިބު ވިދާޅުވީ މާލެ އިން ފެށިގެން ތިލަފުއްޓާ ހަމައަށް ގުޅާލުމަށް އަޅާ ބްރިޖުގެ މިހާތަނަށް ނިމިފައިވަނީ 35 ޕަސެންޓް މަސައްކަތް ކަމަށެވެ. މިވަގުތު މަސައްކަތް ކުރިއަށްދާ ދުވެއްޔަށް ބަލާއިރު ސްޕީޑް ހުރީ ތާވަލަށްވުރެ 1.11 ޕަސެންޓް ކުރީގަ އެވެ.
ނޫސްވެރިންގެ ބައްދަލުވުމުގައި މި މަސައްކަތުގެ ޕްރެޒެންޓޭޝަނެއް ވަނީ މިނިސްޓަރު ދެއްވާފަ އެވެ.
ބްރިޖުގެ މިހާރު މަސައްކަތް ހުރި ހިސާބު
- މުޅި ބްރިޖުގެ 35.53 ޕަސެންޓް ނިމިފައި
- ތަނބުތަކުގެ ޕައިލިންގެ 58 ޕަސެންޓް ނިމިފަ
- ޕައިލް ކެޕިންގެ 43 ޕަސެންޓް މަސައްކަތް ނިމިފައި
- ޕިއާ ކޮލަމްގެ ނުވަތަ ދިގުކޮށް ޖަހާފައި ހުންނަ ކޮލަމްތަކުގެ 40 މަސައްކަތް ނިމިފައި
- ސުޕަ ސްޓްރަކްޗާގެ ޕްރީ ކާސްޓިންގެ 24 ޕަސެންޓް ނިމިފަ
އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތޮލިބު މީގެ ކުރިން ބޭއްވި ނޫސްވެރިންގެ ބައްދަލުވުމުގައި ވިދާޅުވީ ބްރިޖު އެއްކޮށް ނިމޭނެ ކަމަށް ބެލެވެނީ 30، ސެޕްޓެމްބަރު 2026 ގަ އެވެ. ނަމަވެސް ބްރިޖު އަވަސް ކުރަން މަސައްކަތް ކުރައްވަމުން ގެންދާކަން މިނިސްޓަރު ފާހަގަ ކުރެއްވި އެވެ.
ބްރިޖުގެ މަސައްކަތުގެ އަޕްޑޭޓް ސަރުކާރުން ދެމުން ގެންދާއިރު ބްރިޖުގެ މަސައްކަތް ފެށި މިދިޔަ ސަރުކާރުން ބްރިޖުގެ މައުލޫމާތު ގެންގުޅުނީ ސިއްރުކޮށްގެންނެވެ. އޭރު މައުލޫމާތު ދެނީ ހަމައެކަނި އިންޑިއާ އެމްބަސީއިންނެވެ.
ތިލަމާލެ ބުރިޖްގެ މައުލޫމާތު ކުރުކޮށް
- ތިލަމާލެ ބްރިޖް އަޅަން އެފްކޮންސްއަށް ދިނީ އޮގަސްޓް 26، 2021 ގައި
- ކޯޒްވޭ ތަކާއެކު ބްރިޖްގެ ދިގު މިން 6.7 ކިލޯ މީޓަރު
- ސުޕަ ބްރިޖްގެ ދިގު މިނަކީ 3.6 ކިލޯ މީޓަރު
- ބްރިޖަށް 400 މިލިއަން ޑޮލަރުގެ ލޯނު ދެނީ އިންޑިއާގެ އެގްޒިމް ބޭންކުން
- މުޅި މަޝްރޫއުގެ އަގަކީ 500 މިލިއަން ޑޮލަރު
- އިންޑިއާގެ ހިލޭ އެހީގައި 100 މިލިއަން ޑޮލަރު
- 220،000 ކިއުބިކް މީޓަރުގެ ސަރަހަދެއް ހިއްކާ ތޮށިލާން
- ބްރިޖާ ގުޅިފައިވާ ތިން ކިލޯމީޓަރުގެ މަގާއި ފާލަން ހިމެނޭ
- މަޝްރޫއުއަށް ލޯނު ދިނީ އިންޑިއާގެ އެގްޒިމް ބޭންކުން
ކޮމެންޓް
Republic of Maldives