ފަވަރަ ޓްރާންސްފާ އިތުރުކޮށްފި، މިހާރު ދެ ލައްކަ ކުރެވޭ

ގައުމީ ޕޭމަންޓް ސިސްޓަމްގެ ފަވަރައިން ލިބޭނެ ފަސޭހައަކީ ކޮބައި ހެއްޔެވެ؟ މި ސުވާލުގެ މިވަގުތު ލިބޭނެ އެންމެ ބޮޑު އެއް ފަސޭހައަކީ އެއް ބޭންކުން އަނެއް ބޭންކްއަށް ފައިސާ ފޮނުވުމަށް ލިބުނު ފަސޭހަ އެވެ. ބޮޑު އަދަދުން އެއް ބޭންކުން އަނެއް ބޭންކްއަށް ފައިސާ ޖަމާކުރި ނަމަވެސް ކުރިން ނަގާ ވަގުތު ނެގުމެއް ނެތި ވަގުތުން ވަގުތަށް އެ ފައިސާ ކްލިއަ ވެގެންދެ އެވެ. 

އެމްއެމްއޭ އިން މިއަދު ވަނީ މިގޮތަށް ފަވަރަ މެދުވެރިކޮށް ފައިސާ ފޮނުވޭ ލިމިޓް ބޮޑުކޮށްފަ އެވެ. މިހާރު ފަވަރަ މެދުވެރިކޮށް އެއް ދެލައްކަ ރުފިޔާއާ ހަމައަށް ޓްރާންސްފާ ކުރެވުމުގެ އިތުރުން 10،000 ރުފިޔާއާ ހަމައަށް ފަވަރަ ރިކުއެސްޓް ވެސް ކުރެވޭނެ އެވެ.

ފަވަރަ ރިކުއެސްޓަކީ ކޮބާ ؟ - ފަވަރަ އައިޑީއަކީ ޕޭމަންޓް ހެދުމަށް އެކައުންޓް ނަންބަރު ބޭނުންކުރުމުގެ ބަދަލުގައި ފޯނު ނަމްބަރާއި އީމެއިލް އެޑްރެސް ފަދަ ހަނދާނުގައި ބަހައްޓަން ފަސޭހަ އައިޑީ އެއް ބޭނުންކޮށްގެން ފަސޭހަކަމާއެކު ފައިސާ ފޮނުވުމުގެ ހިދުމަތް ދޭން ފަރުމާކޮށްފައިވާ ވަސީލަތެކެވެ. މިއީ އަމިއްލަ ފަރުދުންނާއި ވިޔަފާރި ތަކަށް ވެސް ބޭނުން ކުރެވޭ ހިދުމަތެކެވެ. މި ހިދުމަތް މެދުވެރިކޮށް ފައިސާ ލިބެންވާ ފަރާތުން ފައިސާ ދައްކަންޖެހޭ ފަރާތަށް ޕޭމަންޓް ރިކުއެސްޓެއް ފޮނުވޭނެ އެވެ.

ފަވަރައަކީ ނަގުދު ފައިސާ ގެންގުޅުން މަދުކޮށް ނަގުދު ފައިސާ ނެތް ޑިޖިޓަލް ކަރަންސީގެ އިގްތިސޯދަކަށް ރާއްޖެ ހެދުމުގެ ގޮތުން އެމްއެމްއޭއިން ކުރިޔަށް ގެންދާ މޯލްޑިވްސް ޕޭމަންޓް ސިސްޓަމް ޑިވެލޮޕްމަންޓް ޕްރޮޖެކްޓްގެ ދަށުން ގާއިމްކޮށްފައިވާ އިންސްޓަންޓް ޕޭމަންޓް ސިސްޓަމްގެ ހިދުމަތް ފެށީ މިދިޔަ އަހަރު އެވެ. މި ބަދަލާއެކު ކޮންމެ ދުވަހަކު 24 ގަޑިއިރު މެދުނުކެނޑި ޕޭމަންޓް ހިދުމަތް ލިބޭނެ އެވެ. 

މި ހިދުމަތް ހޯދޭނީ އެ ބޭންކްއެއްގެ އިންޓަނެޓު ބޭންކިން އެޕްމެދުވެރިކޮށެވެ. ފަވަރައިގެ ހިދުމަތް ބޭންކް އޮފް މޯލްޑިވްސް (ބީއެމްއެލް) އާއި މޯލްޑިވްސް އިސްލާމިކް ބޭންކް (އެމްއައިބީ) އަދި ސްޓޭޓް ބޭންކް އޮފް އިންޑިއާ (އެސްބީއައި) އަދި މޮރިޝަސް ކޮމާޝަލް ބޭންކް (އެމްސީބީ) ގެ އިތުރުން ބޭންކް އޮފް ސިލޯން (ބީއޯސީ) އިން ވެސް މިހާރު ލިބެ އެވެ.

ގައުމީ ޕޭމަންޓް ސިސްޓަމަކީ ރާއްޖޭގައި ފަސޭހަކޮށް، އަވަސް އަދި ރައްކާތެރި ޕޭމަންޓް ހިދުމަތް ދޭން މަރުކަޒީ ބޭންކް، އެމްއެމްއޭއިން ކުރިޔަށް ގެންދާ މޯލްޑިވްސް ޕޭމަންޓް ސިސްޓަމް ޑިވެލޮޕްމަންޓް ޕްރޮޖެކްޓްގައި ގާއިމް ކުރި އިންސްޓަންޓް ޕޭމަންޓް ސިސްޓަމް (އައިޕީއެސް) - "ފަވަރަ" އެވެ. 


ގައުމީ ޕޭމަންޓް ސިސްޓަމް "ފަވަރަ" އިގެ މަސައްކަތް ފެށީ ރައީސް އަބްދުﷲ ޔާމީންގެ ވެރިކަމުގަ އެވެ. އޭރު ގަވަރުނަކަށް ހުންނެވީ އަހުމަދު ނަސީރެވެ. އެ މަސައްކަތް ފެށީ 2017 ވަނަ އަހަރު އެވެ. އަދި ރަސްމީކޮށް މި މަސައްކަތް ކުންފުންޏަކާ ހަވާލުކުރީ 2020 ވަނަ އަހަރު އެވެ.