ޓޫރިޒަމަށް މި އަހަރުގެ މިހާތަނަށް 15 ޕަސެންޓުގެ ކުރިއެރުމެއް ވަނީ ލިބިފަ އެވެ. ނަމަވެސް ޓެކުހުގެ އާމްދަނީ އިތުރުވެފައިވަނީ ނިސްބަތުން ކުޑަކޮށެވެ.
ޓޫރިޒަމް ރަނގަޅުވެ، ޓޫރިސްޓުން އިތުރުވަމުން ދިޔަ ނަމަވެސް ޓެކުހުގެ އާމްދަނީ ނިސްބަތުން އިތުރުވުން މަދު ކަމަށް ހިސާބު ތަކުން ދައްކައިިފި އެވެ.
ފިނޭންސުގެ ހަފުތާގެ މާލީ ހިސާބުތައް ދައްކާ ގޮތުގައި ޓެކުހުގެ އާމްދަނީގެ ގޮތުގައި މިދިޔަ އަހަރު ލިބިފައި ވަނީ 5,235.4 މިލިއަން ރުފިޔާ އެވެ. މި އަހަރުގެ މިހާތަނަށް މި އަދަދު އުޅެނީ 5,659.5 މިލިއަން ރުފިޔާގަ އެވެ. އެހެންވެ މިއީ 424.1 މިލިއަން ރުފިޔާގެ އިތުރުވުމެކެވެ.
މި އަހަރުގެ މިހާތަނަށް ޓޫރިޒަމް ޓެކުހުގެ ގޮތުގައި ލިބިފައި ވަނީ 2.8 ބިލިއަން ރުފިޔާ އެވެ. މިދިޔަ އަހަރުވެސް ލިބިފައިވަނީ 2.8 ބިލިއަން ރުފިޔާ އެވެ. ޓޫރިސްޓުންގެ ބޮލަކަށް ވަކި އަދަދެއްގެ މަގުން ޓެކްސް ނަގާ ގްރީން ޓެކުހުން މިދިޔަ އަހަރު 192.7 މިލިއަން ރުފިޔާ ލިބުނުއިރު، މި އަހަރު ލިބިފައިވަނީ 180.9 މިލިއަން ރުފިޔާ އެވެ.
ޓޫރިޒަމް ހިސާބުތައް ދައްކާ ގޮތުގައި މި އަހަރުގެ މިހާތަނަށް 443,128 ޓޫރިސްޓުން ވަނީ ޒިޔާރަތްކޮށްފަ އެވެ. މިދިޔަ އަހަރު އައިސްފައިވަނީ 382,190 ޓޫރިސްޓުންނެވެ. އެހެންވެ މިއީ ގާތްގަނޑަކަށް 15.9 ޕަސެންޓުގެ އިތުރު ވުމެކެވެ.