ފިޝަރީޒް މިނިސްޓްރީން ބުނީ ރޯދަ މަސް ފެށުމުގެ ކުރިން ވާރުތަވީ ބެކްލޮގް އެއްކޮށް ކްލިއަ ކޮށްލެވޭނެ ކަމަށް އުންމީދު ކުރެވޭ ކަމަށެވެ.
މަސްވެރިންނަށް މިހާތަނަށް އެންމެ ފަހުން ދޫކުރި 50 މިލިއަން ރުފިޔާއާއެކު މަސްވެރިންނަށް ދިން ފައިސާގެ އަދަދު 600 މިލިއަނަށް އަރައި، ވާރުތަވީ ބެކްލޮގް 147 މިލިއަނަށް ކުޑަކޮށްފި އެވެ.
މަސްވެރިކަމާ ކަނޑުގެ ދިރުންތަކާ ބެހޭ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަހުމަދު ޝިޔާމް ވިދާޅުވީ މިދިޔަ ފެބްރުއަރީގައި 105 މިލިއަން ރުފިޔާ މަސްވެރިންނަށް ދޫކޮށްފައިވާއިރު، އެންމެފަހުން މިމަހުގެ ފަސް ވަނަ ދުވަހު 50 މިލިއަން ރުފިޔާ ދޫކުރަން ފަށާފައިވާ ކަމަށެވެ. މި ބަދަލާއެކު ސަރުކާރު އައިއިރު މަސްވެރިންނަށް ނުދީހުރި 250 މިލިއަން ރުފިޔާގެ ބެކްލޮގް 147 މިލިއަން ރުފިޔާއަށް ކުޑަ ވެގެން ގޮސްފައިވާ ކަމަށެވެ. މިހާތަނަށް ކްލިއަ ކުރެވިފައިވަނީ ފެބްރުއަރީ 25 ވަނަ ދުވަހާ ހަމައަށް ހުރި ފައިސާ ކަމަށް މިނިސްޓަރު ވިދާޅުވި އެވެ
"އަޅުގަނޑުމެންގެ ޓާގެޓަކީ ރޯދަ މަސް ފެށުމުގެ ކުރިން ނުދީހުރި ހުރިހާ ފައިސާއެއް އެއްކޮށް ދީ ނިންމާލުން. ފައިސާ ޑިސްޕާސް ކުރުމުގައި ލަސްތަކެއް ހުރިނަމަވެސް އިރާދުކުރެއްވިއްޔާ ނިންމާލެވޭނެ،" ޝިޔާމް ވިދާޅުވި އެވެ.
މިނިސްޓަރު ވިދާޅުވި ގޮތުގައި މަސްވެރިންގެ ބެކްލޮކް ކްލިއަ ކުރަމުން ގެންދަނީ އިގްތިސޯދަށް ގެއްލުންވަމުން ދިޔަ ފައިސާ ޗާޕު ކުރުމުގެ މަސައްކަތް ސަރުކާރުން ހުއްޓާލުމަށްފަހު އެވެ. އެކަން ހުއްޓާލީ އެކަމަކީ އާއްމު ރައްޔިތުންނަށް ގެއްލުންވާނެ ކަމަށް ވާތީ ކަމަށް މިނިސްޓަރު ފާހަގަ ކުރެއްވި އެވެ.