ބީސީސީ ކްރިއޭޓާސް ހަބް، 11 ބުރީގެ އިމާރާތުގެ މަސައްކަތް ފަށައިިފި

ކްރިއޭޓިވް މަސައްކަތް ކުރާ ފަރާތްތަކަށް ބޭނުންވާ ފުރިހަމަ ވަސީލަތްތަކާއެކު، ބިޒްނަސް ސެންޓާ ކޯޕަރޭޝަން (ބީސީސީ) އިން ހަދާ ކްރިއޭޓިވް ހަބް އިމާރާތުގެ ބިންގާ އަޅައިފި އެވެ. 

ޗާންދަނީމަގުގެ ޑީއެޗް 23 ކޮށީގައި އަޅާ 11 ބުރީގެ ކްރިއޭޓާސް ހަބް އިމާރާތުގެ ބިންގާ އަޅުއްވައި ދެއްވީ ރޭ އިކޮނޮމިކް މިނިސްޓަރު މުހައްމަދު ސައީދު އެވެ. ރަސްރަނި ބަގީޗާގައި އޮތް މި ރަސްމިއްޔާތުގައި ބީސީސީގެ މެނޭޖިން ޑިރެކްޓަރު އިބްރާހިމް ޒިޔާއު މުހައްމަދު ވެސް ބައިވެރިވެވަޑައިގަތެވެ. މި އިމާރާތް އަޅަން ހަވާލުކުރީ ޑިޒައިން ބިލްޑް އުސޫލުން ފެޑޯ ކުންފުންޏަށެވެ. 

މި ރަސްމިއްޔާތުގައި ބީސީސީގެ ޑެޕިއުޓީ މެނޭޖިން ޑިރެކްޓަރު ސާމިހް އާދަމް ވިދާޅުވި ގޮތުގައި އާމްދަނީ ހޯދުމުގެ ނިޔަތުގައި އަމިއްލަ މަސައްކަތް ކުރާ ފަންނުވެރި ފަރާތްތައް ދުވަހުން ދުވަހަށް އިތުރުވަމުން އަންނަ ކަމަށެވެ. މި ހަބްގެ ސަބަބުން އުފެއްދުންތެރި ގާބިލް ޖީލެއް އުފެދި އިގްތިސާދު ޑައިވާސިފައި ކުރެވި ކުދި އަދި މެދުފަންތީގެ ވިޔަފާރިތަކަށް ކުރިއެރުން ލިބިގެންދާނެ ކަމަށް އުންމީދު ކުރައްވާ ކަމަށެވެ. 

ކްރިއޭޓާސް ހަބް - މި އިމާރާތް އަޅަނީ ޗާންދަނީމަގުގައި ހުރި 1،500 އަކަފޫޓުގެ ބިމެއްގަ އެވެ. މި ބިނާ ވެގެން ދާނީ ރައީސް ޑރ. މުއިއްޒުގެ ސަރުކާރުން ކްރިއޭޓިވް އިންޑަސްޓްރީއެއް އުފައްދަން ކުރައްވާ މަސައްކަތްތަކަށް މުހިންމު ފެށުމަކަށް ކަމަށް ބީސީސީގެ މެނޭޖިން ޑިރެކްޓަރު ޒިޔާ ވިދާޅުވި އެވެ. މަގުސަދަކީ މި އިމާރާތް އަންނަ އަހަރުގެ ކުރީކޮޅު ހުޅުވުން ކަމަށް ވެސް ޒިޔާ ވިދާޅުވެފައިވެ އެވެ. 

މިތަން ފަރުމާ ކޮށްފައި ވަނީ ކުޑަ އަގެއް ނަގައިގެން ކްރިއޭޓިވް މަސައްކަތްތަކަށް ދޫކުރާ ގޮތަށެވެ. މިއީ ދުނިޔޭގެ ގިނަ ގައުމުތަކެއްގައި ކާމިޔާބުކަމެކު މިކަން ކުރިއަށް ގެންދާ ގޮތެވެ.